រដ្ឋមន្ត្រីការពារជាតិចិនគម្រាមអាមេរិកក្នុងសន្នីស្តីពីសន្តិសុខស៊ែងហ្គ្រី-ឡានីសាំងហ្គាពួ
19-November-2024 / ព័ត៌មានអន្តរជាតិ
ប្រទេសសឹង្ហាបុរី៖រដ្ឋមន្ត្រីការពារជាតិចិនលោក វេ ហ្វេង(Wei Fenghe)បាននិយាយកាលពីថ្ងៃអាទិត្យទី១២មិថុនាថាវាអាស្រ័យលើអាម៉េរិកក្នុងការធ្វើអោយប្រសើរឡើងនូវទំនាក់ទំនងទ្វេភាគីជាមួយចិន ដោយទំនាក់ទំនងនេះឥឡូវស្ថិតក្នុងផ្លូវបំបែកដ៏សំខាន់។
លោកវេបានប្រាប់គណៈប្រតិភូនៅជំនួបសន្តិសុខស៊ែងហ្គ្រី-ឡា ដាយឡក(Shangri-La Dialogue)នៅសិង្ហបុរីថា «យើងស្នើសុំភាគីអាម៉េរិកឈប់មួលបង្កាច់និងទប់មិនអោយចិនងើបរួច។ឈប់ជ្រៀតជ្រែកកិច្ចការផ្ទៃក្នុងចិន ។ទំនាក់ទំនងទ្វេភាគីមិនអាចល្អប្រស់រឡើងទេ ដរាបណាភាគីអាម៉េរិកមិនបញ្ចប់អំពើទាំងនេះ»។វេ ហ្វេង(Wei Fenghe)ក៏បានព្រមានថា យុទ្ធសាស្ត្រឥណ្ឌូប៉ាស៊ីហ្វិករបស់អាម៉េរិកកំពុងរុញភាគីទាំងពីរឆ្ពោះទៅរកការប្រឈមមុខគ្នា ។
ក្នុងសុន្ទរកថាមួយនៅក្នុងកិច្ចប្រជុំស៊ែងហ្គ្រី-ឡា ដាយឡកថ្ងៃ១២មិថុនា លោកបានច្រានចោលយុទ្ធសាស្ត្រដាក់ចេញដោយរដ្ឋមន្ត្រីការពារជាតិអាម៉េរិក ឡយ អូស្ទីន កាលពីមួយថ្ងៃមុន ដោយចាត់ទុកវាជាកិច្ចខិតខំមួយដើម្បីទប់ការអភិវឌ្ឍ ការរីកចំរើនរបស់ចិន។លោកវេបាននិយាយថា «ចំពោះយើង យុទ្ធសាស្ត្រនេះជាការប៉ុនប៉ងមួយដើម្បីស្ថាបនាក្រុមផ្តាច់មុខតូចមួយក្នុងនាមតំបន់ឥណ្ឌូប៉ាស៊ីហ្វិកសេរីនិងបើកចំហមួយ ដើម្បីចាប់ជំរិតប្រទេសនានានៅក្នុងតំបន់របស់យើង និងផ្តោតលើប្រទេសជាក់លាក់មួយ។វាជាយុទ្ធសាស្ត្របង្កជម្លោះនិងការប្រឈមមុខគ្នាមួយដើម្បីទប់ទល់និងឡោមព័ទ្ធអ្នកដទៃ»។
សុន្ទរកថារដ្ឋមន្ត្រីការពារជជាតិចិនបាន បញ្ជាក់អះអាងឡើងវិញការប្តេជ្ញាចិត្តរបស់ចិនប៉េកាំងក្នុងការប្រយុទ្ធប្រឆាំងនឹងការប៉ុនប៉ងណាមួយដើម្បីឯករាជ្យភាពតៃវ៉ាន់។លោកវេថា «យើងនឹងប្រយុទ្ធគ្រប់ទិសដើម្បីបញ្ឈប់មិនអោយតៃវ៉ាន់ប្រកាសឯករាជ្យភាព។យើងនឹងប្រយុទ្ធទោះត្រូវបង់ក្នុងតំលៃណាក៏ដោយ ហើយយើងនឹងប្រយុទ្ធដល់ទីបញ្ចប់។នេះជាជំរើសតែមួយគត់សំរាប់ចិន»។លោកបន្តថា «អ្នកណាដែលស្វះស្វែងរកឯករាជ្យភាពតៃវ៉ាន់ក្នុងបំណងបំបែកបំបាក់ចិននឹងពិតជាជួបចុងបញ្ចប់មិនល្អ។គ្មាននរណាដឹងអំពីការប្តេជ្ញាចិត្តនិងលទ្ធភាពរបស់កងកម្លាំងប្រដាប់អាវុធចិនក្នុងការការពារបូរណភាពទឹកដីខ្លួនទេ»។
សូមបញ្ជាក់ដា អាម៉េរិកនិងចិនបានប្រើជំនួបប្រចាំឆ្នាំនេះដើម្បីដាក់ចេញទស្សនវិស័យរបស់គេសំរាប់សន្តិសុខតំបន់ក្រោយរុស្ស៊ីចូលឈ្លានពានអ៊ុយក្រែន។នៅពេលរដ្ឋាភិបាលរបស់លោកបៃដិនបានរកបានអ្នកគាំទ្រមួយចំនួនក្នុងអាស៊ីដើម្បីការពារអធិបតេយ្យភាពរបស់គេ ខ្លួនក៏ជួបការមិនជឿទាំងស្រុងអំពីការតាំងចិត្តរបស់អាម៉េរិកចំពោះតំបន់ កន្លែងដែលចិនកំពុងមានឧត្តមភាពសេដ្ឋកិច្ច។រដ្ឋមន្ត្រីការពារជាតិអាម៉េរិកលោកឡយអូស្សទីនកាលពីម្សិលបានវាយប្រហាររិះគន់ចិនជាខ្លាំងដោយចោទប្រកាន់រដ្ឋាភិបាលក្រុងប៉េកាំងថា អនុវត្តមធ្យោបាយបំភ័យសម្លុតគំរាមនិងឈ្លានពានដោយសារតែការអះអាងទឹកដីនៅឥណ្ឌូប៉ាស៊ីហ្វិក។លោកបានរំលេចអំពីអំពើរបស់ចិននៅសមុទ្រចិនខាងកើត កន្លែងដែលចិនមានជម្លោះទឹកដីជាមួយជប៉ុន នៅសមុទ្រចិនខាងត្បូង កន្លែងដែលចិនអះអាងអធិបតេយ្យភាពជាន់ប្រទេសអាស៊ានជាច្រើន និងជម្លោះព្រំដែនគោកជាមួយឥណ្ឌា។
ប្រធានាធិបតីអាមេរិក Joe Biden បាននិយាយកាលពីថ្ងៃទី២៣ឧសភាថាអាមេរិកនឹងធ្វើអន្តរាគមន៍ផ្នែកយោធាប្រសិនបើចិនវាយប្រហារកោះតៃវ៉ាន់ ដោយលើកហេតុផលថា ទីក្រុងប៉េកាំងគ្មានសិទ្ធិដណ្តើមយកកោះនេះដោយកម្លាំង។ ប្រធានាធិបតីអាមេរិកក៏បានព្រមានថាប្រទេសចិនកំពុងប្រថុយប្រថាននៅពេលបញ្ជូនយន្តហោះជាច្រើនទៅកៀកដែនអាកាសនៃកោះតៃវ៉ាន់ក៏ដូចជាការធ្វើសមយុទ្ធកងទ័ពជើងទឹកនៅក្នុងតំបន់។ទោះជាយ៉ាងណាក៏ដោយ មួយថ្ងៃក្រោយមក លោក Biden បានបញ្ជាក់ថាគោលនយោបាយ “ភាពមិនច្បាស់លាស់ជាយុទ្ធសាស្ត្រ”ជាមួយតៃវ៉ាន់នៅតែមានដែលក្នុងនោះទីក្រុងវ៉ាស៊ីនតោនបានជួយកសាងសមត្ថភាពការពារខ្លួនសម្រាប់កោះតៃវ៉ាន់។ប៉ុន្តែមិនបានសន្យាការពារកោះនេះដោយវិធានការយោធា ដើម្បីជៀសវាងការខឹងសម្បារពីទីក្រុងប៉េកាំងនោះទេ។កិច្ចសន្ទនា Shangri-La បានធ្វើឡើងនៅថ្ងៃទី១០-១២ខែមិថុនា បន្ទាប់ពីរយៈពេល២ឆ្នាំត្រូវបានលុបចោល ដោយសារជំងឺរាតត្បាត Covid-19។ វេទិការសន្តិសុខត្រូវបានដំណើរការឡើងវិញក្នុងបរិបទនៃការអភិវឌ្ឍន៍ដ៏ស្មុគស្មាញក្នុងពិភពលោក និងក្នុងតំបន់ ជាពិសេសការប្រកួតប្រជែងមហាអំណាចរវាងសហរដ្ឋអាមេរិក និងចិនក្នុងវិស័យសេដ្ឋកិច្ច ពាណិជ្ជកម្មបច្ចេកវិទ្យា។ល។ភូមិសាស្ត្រនយោបាយមិនបង្ហាញសញ្ញានៃការចុះត្រជាក់ឡើយ៕
