បន្ទាប់ពីចាយលុយអស់ជាង៣រយលានដុល្លារសាលាកក្តីខ្មែរក្រហមនៅបន្ត៣ឆ្នាំទៀតតែមិនដឹងថាបានថិការពីណា?
05-September-2022 / ផ្សេងៗ
ភ្នំពេញ៖ ប្រធានការិយាល័យកិច្ចការសាធារណៈ និងជាមន្ត្រីអ្នកនាំពាក្យអង្គជំនុំជម្រះតុលាការកំពូល នៃអង្គជំនុំជម្រះវិសាមញ្ញក្នុងតុលាការកម្ពុជា(អ.វ.ត.ក) ឬហៅថា សាលាក្តីខ្មែរក្រហម លោក នេត្រ ភក្ត្រា បានឱ្យដឹងថា ចាប់ពីខែកុម្ភៈ ឆ្នាំ២០០៦ រហូតមកដល់ខែសីហា ឆ្នាំ២០២២ សាលាក្តីកូនកាត់មួយនេះ បានចំណាយថវិកាចំនួន៣៣៧,៧០លានដុល្លារ ទៅលើភាគីចម្រុះ កម្ពុជា-អង្គការសហប្រជាជាតិ។ ក្នុងចំណោមថវិកាទាំងនេះ មានការចំណាយរបស់ភាគីជាតិនៃសាលាក្តីខ្មែរក្រហមចំនួន ៩៨,៦លានដុល្លារ និងភាគីអន្តរជាតិចំនួន ២៣៩លានដុល្លារ។
ក្នុងសន្និសីទសារព័ត៌មានមួយនៅព្រឹកថ្ងៃទី២០ ខែកញ្ញា ឆ្នាំ២០២២ ពោលគឺ មុនការប្រកាសសាលដីកាលើសំណុំរឿង០០២/០២ ពាក់ព័ន្ធនឹងជនជាប់ចោទ ខៀវ សំផនលោកនេត្រភក្ត្រាបញ្ជាក់ថា៖ម្ចាស់ជំនួយលើបេសកកម្មរបស់អង្គជំនុំជម្រះវិសាមញ្ញក្នុងតុលាការកម្ពុជា ក្នុងរយៈពេល ១៦ឆ្នាំមកនេះ មានចំនួន ៣៩ប្រទេស ក្នុងនោះក៏មានក្រុមហ៊ុនឯកជនផងដែរ។ ប្រទេសជប៉ុនជាម្ចាស់ជំនួយធំជាងគេ មានចំនួន ៨៨,២៦លានដុល្លារ ស្មើនឹង ៣១ភាគរយ នៃការចំណាយសរុបរបស់តុលាការមួយនេះ។
សម្រាប់រាជរដ្ឋាភិបាលកម្ពុជាគឺ ជាម្ចាស់ជំនួយធំទី២ ដែលបានផ្តល់វិភាគទានថវិកា និងសម្ភារសរុបជាទឹកប្រាក់ចំនួន ៤៥,៥លានដុល្លារ ស្មើនឹងប្រមាណ ១៤ភាគរយ។ ប្រទេសអូស្ត្រាលី បានផ្តល់ទឹកប្រាក់៣៥លានដុល្លារ, សហរដ្ឋអាមេរិកចំនួន ៣២លានដុល្លារ, សហភាពអឺរ៉ុបចំនួន ៣២លានដុល្លារ, អាល្លឺម៉ង់ ១៤លានដុល្លារ, ស៊ុយអែតចំនួន ១៤លានដុល្លារ, អង់គ្លេសចំនួន ១៣លានដុល្លារ និងបារាំង ១០លានដុល្លារ។ ក្រៅពីនេះប្រទេសមួយចំនួនទៀត ក៏បានផ្តល់ថវិកាដល់សាលាក្តីខ្មែរក្រហមមួយនេះផងដែរ។
សូមបញ្ជាក់ថា អ.វ.ត.ក ត្រូវបានបង្កើតឡើងក្រោមកិច្ចព្រមព្រៀងរវាងរាជរដ្ឋាភិបាលកម្ពុជា និងអង្គការសហប្រជាជាតិ(UN) កាលពីខែមិថុនា ឆ្នាំ២០០៣។ តុលាការកូនកាត់មួយនេះ ជាតុលាការឯករាជ្យ ម្ចាស់ការ មិនចំណុះរាជរដ្ឋាភិបាល ឬអង្គការសហប្រជាជាតិទេ បង្កើតឡើងដើម្បីដំណើរការកាត់សេចក្ដីឧក្រិដ្ឋកម្មលើមេដឹកនាំកំពូលៗមួយចំនួន ដែលបានប្រព្រឹត្ដអំពើប្រល័យពួជសាសន៍នៅក្នុងប្រទេសកម្ពុជា ក្នុងសម័យខ្មែរក្រហម ពីឆ្នាំ១៩៧៥-១៩៧៩។សាលាក្តីខ្មែរក្រហមដែលជាសាលាក្តីចម្រុះកម្ពុជា-អង្គការសហប្រជាជាតិ បានចាប់ផ្តើមដំណើរការសវនាការកាត់ទោសអតីតមេដឹកនាំ និងអ្នកទទួលខុសត្រូវខ្ពស់បំផុតនៃរបបកម្ពុជាប្រជាធិបតេយ្យ ដែលរួមមាន៤សំណុំរឿង គឺសំណុំរឿង ០០១ សំណុំរឿង ០០២ សំណុំរឿង ០០៣ និងសំណុំរឿង ០០៤។ ក៏ប៉ុន្តែសំណុំរឿង ០០២/០២ ប្រឆាំងនឹង លោក ខៀវ សំផន នៅមិនទាន់បិទបញ្ចប់នៅឡើយទេ ក្រៅពីនេះ សំណុំរឿងផ្សេងទៀតត្រូវបានបិទបញ្ចប់អស់ហើយ។
ទាក់ទងទៅនឹងសំណុំរឿង ០០២/០២ ប្រឆាំងនឹងលោក ខៀវ សំផន លោក នេត្រ ភក្ត្រា បានឲ្យដឹងថា សាលាក្តីខ្មែរក្រហមនឹងបិទបញ្ចប់នីតិវិធីច្បាប់របស់ខ្លួនលើសំណុំរឿងទាំង៤ ក្រោយការប្រកាសសាលដីការបស់តុលាការកំពូលនៅថ្ងៃទី២២ ខែកញ្ញា ក៏ប៉ុន្តែតុលាការនេះត្រូវការពេលវេលា៣ឆ្នាំ បន្ថែមទៀត ដើម្បីបញ្ចប់ការងារដែលនៅសេសសល់ យោងតាមកិច្ចព្រមព្រៀងបន្ថែមរវាងរដ្ឋាភិបាលកម្ពុជា និងអង្គការសហប្រជាជាតិកាលពីពេលកន្លងទៅនេះ។លោក នេត្រ ភក្ត្រា បញ្ជាក់ថាកិច្ចការដែលនៅសេសសល់ក្នុងសាលាក្តីនោះគឺទី១ ការគ្រប់គ្រងបណ្ណសារនៃសំណុំរឿងទាំងអស់ដែលត្រូវរក្សាទុកតាមស្តង់ដារអន្តរជាតិ និងទី២ គឺការងារអប់រំ និងផ្សព្វផ្សាយស្តីពីសមិទ្ធផលនៃសាលាក្តីខ្មែរក្រហម។
សូមបញ្ជាក់ដែរថា ក្នុងចំណោមសំណុំរឿងសំខាន់ៗចំនួន២នៃសាលាក្តីខ្មែរក្រហមគឺ ០០១ និង០០២ មានតែជនជាប់ចោទ លោក ខៀវ សំផន ម្នាក់ទេ ដែលនៅមានជីវិតក្នុងវ័យ ៩១ឆ្នាំ។ ក្រៅពីនេះ មេដឹកនាំជាន់ខ្ពស់ផ្សេងទៀតបានបាត់បង់ជីវិតអស់ហើយអំឡុងពេលនៃសវនាការរយៈពេល១៦ឆ្នាំមកនេះ នោះរួមមាន នួន ជា អៀងសារី អៀង ធីរិទ្ធ និងកាំង ហ្គេចអ៊ាវ ហៅ ឌុច ជាដើម៕
