ក្រុមអាជីវករលក់ដូរនៅក្នុងតំបន់រមណីយដ្ឋានអង្គរនាំគ្នាស្នើសុំឱ្យមានកិច្ចអន្តរាគមន៍សុំបន្តសកម្មភាពលក់ដូរ
26-December-2024 / សេដ្ឋកិច្ច
សៀមរាប៖បន្ទាប់ពីក្រុមមន្ត្រីបានបញ្ជាឱ្យម្ចាស់តូបលក់វត្ថុអនុស្សាវរីយ៍ និងភោជនីយដ្ឋាន ប្រមាណជា៥៧ទីតាំងក្នុងបរិវេណរមណីយដ្ឋានអង្គរ រុះរើទីតាំងរបស់ពួកគេ និងចាកចេញពីតំបន់ ត្រឹមថ្ងៃសុក្រសប្ដាហ៍នេះក្រុមអាជីវករលក់ដូរនៅក្នុងតំបន់រមណីយដ្ឋានអង្គរនាំគ្នាស្នើសុំឱ្យមានកិច្ចអន្តរាគមន៍សុំបន្តសកម្មភាពលក់ដូរ។
អាជីវករលក់វត្ថុអនុស្សាវរីយ៍អាយុ៥៥ឆ្នាំមួយរូប អ្នកស្រី អី រាម បានប្រាប់កាសែតថា អាជ្ញាធរបានបញ្ជាឱ្យពួកគេចាកចេញដោយមិនផ្តល់ដំណោះស្រាយ [ទីតាំងលក់ដូរថ្មី] អ្វីឡើយ។ដោយបារម្ភពីការបាត់បង់អាជិពពួកអាជីវករចំនួន១៧១នាក់ដែលពាក់ព័ន្ធ កាលពីថ្ងៃចន្ទទី១២កញ្ញាកន្លងទៅ បានប្រមូលគ្នាផ្ដល់ស្នាមមេដៃ និងបានផ្ញើលិខិតទៅកាន់សម្តេចនាយករដ្ឋមន្ត្រី ហ៊ុន សែន សុំឱ្យមានកិច្ចអន្តរាគមន៍មួយ បន្ទាប់ពីអាជ្ញាធរបានជូនដំណឹងដល់ពួកគេឱ្យបញ្ឈប់យកទំនិញថ្មីមកលក់ឱ្យភ្ញៀវទេសចរតទៅទៀត។ប្រភពីមន្ត្រីអាជ្ញាធរអប្សារាបានឲ្យដឹងថា ការស្នើឱ្យមានការរុះរើតូបរបស់អាជីវកទាំងនេះ គឺធ្វើឡើងដោយសារតែតំបន់នេះស្ថិតនៅក្នុងរមណីយដ្ឋានអង្គរ ខណៈសកម្មភាពនេះ [លក់ដូរ] អាចប៉ះពាល់ដល់តំបន់បេតិកភណ្ឌពិភពលោកដែលទទួលស្គាល់ដោយអង្គការយូណេស្កូមួយនេះ។
នៅក្នុងលិខិតរបស់ពលរដ្ឋជាអាជីវករដែលផ្ញើជូនលោក ហ៊ុន សែន បានលើកឡើងថា អាជ្ញាធរជាតិអប្សរា កាលពីថ្ងៃទី០៥ ខែមីនា ឆ្នាំ២០២០ បានអនុញ្ញាតឱ្យពួកគេផ្លាស់ប្ដូរទីតាំងលក់ក្នុងបរិវេណរមណីយដ្ឋានអង្គរ ទៅកាន់តំបន់ដែលត្រូវបានរៀបចំជាផ្លូវការនៅខាងមុខប្រាសាទវិញ។អ្នកស្រី អី រាមប្រាប់កាសែត ថា៖ «កាលពីពេលកន្លងទៅ យើងធ្លាប់បានយល់ព្រមក្នុងការផ្លាស់ទៅកាន់ទីតាំងថ្មីនេះហើយ ដោយសារតែវាជាសំណើរបស់រដ្ឋាភិបាលក្នុងការកែលម្អបរិស្ថានក្នុងតំបន់ប្រាសាទអង្គរវត្ត»។តែ អ្នកស្រីបន្ថែមថា ការផ្ដល់ជូននេះ [ផ្លាស់ប្ដូរទៅកាន់ទីតាំងថ្មី] បច្ចុប្បន្នហាក់មិនមានទៀតឡើយ។៖ «[កាលពីពេលកន្លងទៅ] ពួកគេធ្លាប់បានស្នើសុំយើងឱ្យផ្តិតមេដៃទទួលយកទីតាំងលក់ថ្មីនៅមុខប្រាសាទ។ ប៉ុន្តែបច្ចុប្បន្ននេះ នៅទីតាំងថ្មីនោះ គឺមានអាជីវករលក់ពេញអស់ទៅហើយ ខណៈពួកយើងដែលនៅសេសសល់ គឺគ្មានកន្លែងសម្រាប់លក់ដូរឡើយ»។អ្នកស្រីថា៖ «ជាដំណោះស្រាយ ពួកគេ(អាជ្ញាធរអប្សារា)បានស្នើឱ្យយើងទៅកាន់តំបន់រុនតាឯកវិញ។ តើយើងអាចរកប្រាក់ចំណូលនៅទីនោះបានដោយរបៀបណា?»
គួរបញ្ជាក់ថា តំបន់រុនតាឯក មានចម្ងាយប្រមាណជា២០គីឡូម៉ែត្រពីភាគខាងកើតប្រាសាទអង្គរវត្ត និងក្បែរអាកាសយានដ្ឋានអន្តរជាតិថ្មីក្នុងខេត្តសៀមរាបនេះ គឺជាទីតាំងដែលត្រូវបានរៀបចំដោយមន្ត្រីសម្រាប់ផ្ដល់ជូនដល់ពលរដ្ឋដែលរុះរើចេញពីឧទ្យានអង្គរ។ អាជីវករដែលប្រមូលផ្ដុំគ្នាដាក់ញត្តិទៅកាន់លោក ហ៊ុន សែន លើកឡើងថា ពួកគេមិនទាន់មានការសម្រេចចិត្តផ្លាស់ទៅកាន់តំបន់រុនតាឯកខាងលើនេះនៅឡើយទេ ខណៈពួកគេមិនដឹងថាត្រូវប្រកបមុខរបរអ្វីដើម្បីចិញ្ចឹមជីវិតនៅទីតាំងថ្មីនោះឡើយ។
ទាក់ទិននឹងករណីនេះ អ្នកស្រី អី រាម បន្ថែមថា ពួកគេនឹងបន្តស្នាក់នៅទីតាំងចាស់ដដែល រហូតដល់អាជ្ញាធរអាចរកទីតាំងលក់ដូរសមស្របថ្មីឱ្យពួកគេបាន៖ «យើងមិនមែនប្រឆាំងនឹងពួកគេឡើយ ដោយយើងនឹងរុះរើចេញដោយខ្លួនឯង ប្រសិនបើពួកគេមានដំណោះស្រាយត្រឹមត្រូវសម្រាប់យើង។ វាគឺជាបញ្ហាដ៏ធំមួយសម្រាប់យើង»។
ទោះបីយ៉ាងណាលោក ហ៊ី សាយ ប្រធានមន្ទីររៀបចំដែនដី នគរូបនីយកម្ម និងសំណង់ និងសុរិយោដីខេត្តសៀមរាប បានឱ្យដឹងថា ការរុះរើទៅកាន់តំបន់រុនតាឯក គឺធ្វើឡើងសម្រាប់ប្រជាពលរដ្ឋដែលមានផ្ទះក្នុងឧទ្យានអង្គរតែប៉ុណ្ណោះ។
សម្រាប់ករណីអាជីវករលក់ដូរនៅរមណីយដ្ឋានអង្គរវិញ លោកថា៖ «អាជ្ញាធរមូលដ្ឋានបានជូនដំណឹងពួកគេឱ្យរុះរើតូបចេញ ដោយការងារនេះបានចាប់ផ្តើមធ្វើហើយ ប៉ុន្តែមិនមានការកំណត់ថ្ងៃសម្រាប់ពួកគេនោះទេ»។ទាក់ទងការរុះរើនេះ លោកហ៊ីសាយបន្តថា អង្គការយូណេស្កូក៏ធ្លាប់បានព្រមានរដ្ឋាភិបាលកម្ពុជាពីរដងរួចមកហើយកាលពីពេលកន្លងទៅ ទាក់ទងនឹងផលប៉ះពាល់របស់អ្នករស់នៅក្នុងឧទ្យានអង្គរមកលើប្រាសាទផងដែរ។លោកបានបន្ថែមថា ការរុះរើនេះគឺអាជ្ញាធរបានជូនដំណឹងឱ្យពួកគេធ្វើឡើងដោយស្ម័គ្រចិត្ត ហើយក្នុងនោះក៏ពុំមានការប្រើប្រាស់កងកម្លាំងលើពលរដ្ឋ ឬអាជីវករនោះដែរ។
