វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 439 នាក់
ម្សិលមិញ 9706 នាក់
សរុប 14078682 នាក់
ភ្នំពេញ៖ លោក សុន ឆ័យអនុប្រធានគណបក្សភ្លើងទៀន ដែលបានចូលសួរសុក្ខទុក្ខសកម្មជនគណបក្សចំនួន២៣នាក់ នៅពន្ធនាគារព្រៃស នាព្រឹកថ្ងៃពុធនេះបាន ថ្លែងថា សកម្មជនជាង២០នាក់ដែលគាំទ្រគណបក្សសង្គ្រោះជាតិដែលតុលាការរំលាយ (CNRP) បានស្នើទៅរដ្ឋាភិបាលជួយអន្តរាគមន៍ឱ្យមានការដោះលែងពួកគេបាននៅក្រៅឃុំបណ្ដោះអាសន្ន ដោយអះអាងថា ពួកគេជាប់ពន្ធនាគារដោយសាររឿងនយោបាយ។
សកម្មជនទាំងនោះត្រូវបានរងនូវការចោទ ពាក់ព័ន្ធនឹងផែនការវិលត្រលប់ចូលកម្ពុជារបស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩។ លោក សុន ឆ័យ បញ្ជាក់ថា ពួកគេបានផ្ដាដល់រូបលោកឱ្យជួយនាំសារប្រាប់ទៅរដ្ឋាភិបាលជួយអន្តរាគមន៍ឱ្យមានការដោះលែងពួកគាត់ទាំង២៣នាក់បាននៅក្រៅឃុំបណ្ដោះអាសន្ន ខណៈពួកគាត់ជាប់ឃុំដោយសាររឿងនយោបាយ៖ «ខ្ញុំឃើញម្នាក់ៗដែលខ្ញុំបានជួប សុខភាពគាត់អត់ស្រួលទេ យើងមិនចង់ឱ្យគាត់ស្លាប់នៅក្នុងមន្ទីរឃុំឃាំង ហើយទី១ គាត់សុខភាពមិនល្អ ទី២ គាត់អត់មានអ្វីគ្រោះថ្នាក់ដល់សង្គម ទី៣ គាត់បានបំពេញទោសដែលគាត់ខុសឆ្គងមួយចំនួនដែលវាសមហេតុសមផលហើយ ដែលមិនគួរឱ្យគាត់នៅ[ក្នុងឃុំ]។ ដូច្នេះ សរុបមក បំណង២ គឺបំណងមកសួរសុខទុក្ខផង និងបំណងរកវិធីយ៉ាងម៉េចដើម្បីឱ្យគាត់បានចេញពីការឃុំឃាំងនេះ»។
អនុប្រធានគណបក្សភ្លើងទៀនរូបនេះដែលកំពុងរងបណ្តឹងរបស់គជបនិងគណបក្សប្រជាជនកម្ពុជាហើយត្រូវអ្យការតុលាការចោទថារិហាកេរ្តិ៍បន្ថែមទៀតថា បើក្នុងករណីរដ្ឋាភិបាលមិនអនុញ្ញាតឱ្យពួកគាត់បាននៅក្រៅឃុំទេ សកម្មជនដែលជាប់ឃុំទាំងនោះ ក៏បានស្នើឱ្យផ្លាស់ប្ដូរពួកគាត់ទៅបន្ទប់អ្នកជាប់ឃុំរឿងនយោបាយវិញ ដោយកុំឱ្យដាក់ពួកគាត់នៅចម្រុះជាមួយអ្នកទោសគ្រឿងញៀន លួច ឆក់ និងប្លន់ជាដើម ដោយសារនៅក្នុងពន្ធនាគារនោះមានទាំងអ្នកជក់បារី និងមិនសូវមានអនាម័យនាំឱ្យប៉ះពាល់សុខភាពពួកគេ ជាដើម។អគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា មានប្រសាសន៍ថា ការស្នើសុំឱ្យដោះលែងនៅក្រៅឃុំបណ្តោះអាសន្ននោះ ខាងពន្ធនាគារមិនអាចសម្រេចអនុញ្ញាតឱ្យបានទេ ខណៈករណីនេះស្ថិតក្នុងដៃតុលាការដែលជាអ្នកមានសិទ្ធិសម្រេច។
ចំពោះការស្នើសុំប្ដូរបន្ទប់ឃុំឃាំងរបស់សកម្មជនដែលគាំទ្របក្សប្រឆាំងនោះវិញ លោកថា ពួកគាត់ត្រូវដាក់លិខិតទៅក្រសួងមហាផ្ទៃ ដើម្បីក្រសួងចាត់មន្ត្រីជំនាញសិក្សានិងសម្រេចតាមទិដ្ឋភាពជាក់ស្តែង។
លោកមានប្រសាសន៍ថា៖ «យើងធ្លាប់ដាក់គាត់នៅជុំគ្នា ប៉ុន្តែមានបញ្ហានៅពេលដែលពួកគាត់នៅជុំគ្នា ពួកគាត់បង្កបញ្ហាពេក ដល់អ៊ីចឹងពួកយើងបំបែកពួកគាត់ ប៉ុន្តែបើជនជាប់ឃុំ គាត់ចង់ស្នើសុំអ្វីមួយ គាត់អាចដាក់លិខិតមកក្រសួងមហាផ្ទៃមក ក្រសួងគេនឹងឱ្យអ្នកជំនាញសិក្សាលើបញ្ហាហ្នឹង»។
កាលពីថ្ងៃទី១៧ ខែមីនា ឆ្នាំ២០២២ ប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ លោក រស់ ពិសិដ្ឋ បានប្រកាសសាលក្រមផ្ដន្ទាទោសថ្នាក់ដឹកនាំគណបក្សសង្គ្រោះជាតិ ចំនួន៧នាក់ រួមមាន លោក សម រង្សី, លោកស្រី ជូឡុង សូមូរ៉ា, លោកស្រី មូរ សុខហួរ, លោក តុប វណ្ណចាន់, លោក នុត រំដួល, លោក ហូរ វ៉ាន់, លោក អេង ឆៃអ៊ាង ក្នុងម្នាក់ៗ១០ឆ្នាំ ក្រោមបទចោទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍ ញុះញង់ឱ្យយោធិនមិនស្ដាប់បញ្ជា និងរួមគំនិតក្បត់»។ចំណែកសកម្មជនគណបក្សនេះជាច្រើននាក់ទៀតត្រូវបានតុលាការសម្រេចផ្តន្ទាទោសដាក់ពន្ធនាគារម្នាក់ៗ ៥ឆ្នាំ ក្រោមបទចោទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍ និងរួមគំនិតក្បត់»។ ប៉ុន្តែទោស៥ឆ្នាំនេះត្រូវអនុវត្តទោសក្នុងពន្ធនាគារចំនួន៣ឆ្នាំ៨ខែ ហើយទោសនៅសល់ត្រូវបានព្យួរ៕