១០ឆ្នាំទៀតទើបបញ្ចេញសៀវភៅប្រវត្តិសាស្ដ្រនៃការតស៊ូដឹកនាំកម្ពុជាដែលសម្ដេចតេជោចងក្រង
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានលើកឡើងថាការលះបង់របស់សម្ដេចគឺមិនមែនសម្រាប់តែសម្ដេចប៉ុណ្ណោះទេតែជាការលះបង់ដើម្បីជួយដល់ពលរដ្ឋកម្ពុជាគ្រប់រូប។ក្នុងការផ្ដល់ បាឋកថាមួយនៅក្រសួងការពារជាតិព្រឹកថ្ងៃទី២០ ខែមិថុនា ឆ្នាំ២០២៣ ក្នុងខួប៤៦ឆ្នាំនៃការចងចាំដំណើរឆ្ពោះទៅរកការផ្ដួលរំលំ របបប្រល័យពូជសាសន៍ ប៉ុល ពតសម្ដេចតេជោ ហ៊ុន សែន បានលើកឡើងថាសម្ដេចធ្លាប់ឆ្លងកាត់ការបែកបាក់គ្រួសារ និងជួបផលវិបាកនៃសង្គ្រាម ហើយការលំបាកនេះហើយទើបសម្ដេចប្ដេជ្ញាថានឹងមិនឱ្យពលរដ្ឋកម្ពុជាជួបការលំបាកបែបនេះដូចសម្ដេចនោះទេ។
សម្ដេចតេជោថា៖«ហើយអ្វីជាបទពិសោធន៍នៃការឈឺចាប់ក្រលំបាករបស់យើងមកដល់ពេលនេះយើងត្រូវដោះស្រាយសម្រាប់ជីវិតរបស់អ្នកក្ររបៀបម៉េច។ ខ្ញុំគិតថាអ្នកដែលទទួលផលក្រោយគឺមានសំណាងប៉ុន្ដែសំណាងនោះយើងក៏ត្រូវមានភារកិច្ចឱ្យពួកគេទទួលបានផលសំណាងពីពលិកម្មរបស់យើង»។ថ្ងៃទី២០ ខែមិថុនា ឆ្នាំ១៩៧៧ ជាពេលដែលសមមិត្ត ហ៊ុន សែន ក្នុងវ័យ២៥ឆ្នាំ រួមនឹងយុទ្ធមិត្តដ៏ស្ម័គ្រស្មោះ៤រូបផ្សេងទៀត បានសម្រេចចិត្តលាចាកទឹកដី លាចាកភរិយា និងកូនក្នុងផ្ទៃធ្វើដំណើរទាំងយប់កាត់ព្រំដែនទាំងគ្រោះថ្នាក់បំផុត ឆ្ពោះទៅកាន់ប្រទេសវៀតណាម ដើម្បីស្វែងរកគាំទ្រក្នុងការរំដោះជាតិ និងប្រជាជនកម្ពុជា ចេញការដឹកនាំរបស់ខ្មែរក្រហម។
សម្តេចតេជោ ហ៊ុន សែន បានចោទជាសំនួរថា កាលពី៤៦ឆ្នាំមុន បើសមមិត្ត ហ៊ុន សែន មិនសម្រេចចិត្តយកជីវិតធ្វើជាដើមទុនក្នុងការរំដោះជាតិ ក្នុងការធ្វើដំណើរឆ្ពោះទៅកាន់ការផ្តួលរំលំរបបប្រល័យពូជសាសន៍ ប៉ុល ពត ទេ តើអាចនឹងមានអ្វីកើតឡើងសម្រាប់ប្រទេសកម្ពុជាបន្តទៀត? ខណៈដែលជីវិតប្រជាពលរដ្ឋខ្មែរទាំងអស់ស្ថិតនៅក្រោមកណ្តាប់ដៃរបស់ពួកខ្មែរក្រហម។សម្ដេចតេជោលើកឡើងថាការលះបង់របស់សម្ដេចមិនមែនសម្រាប់តែផលប្រយោជន៍ផ្ទាល់ខ្លួនរបស់សម្ដេចនោះទេ ។
សម្ដេចតេជោថា៖ «ខ្ញុំមិនគិតថាការលះបង់របស់ខ្ញុំវាគ្រាន់តែជាផលប្រយោជន៍របស់ខ្ញុំទេ! តែវាជាផលប្រយោជន៍សម្រាប់មនុស្សទាំងអស់ហើយខ្ញុំអត់មានច្រណែនជាមួយអ្នកណាទេ អ្វីដែលខ្ញុំគួរសុំមិនសុំអ្វីក្រៅតែពីការទទួលយកនូវការពិតមួយប៉ុណ្ណោះ»។សម្រាប់អត្តចារិកដឹកនាំសម្ដេចតេជោ ហ៊ុន សែន បានមានប្រសាសន៍យ៉ាងដូច្នេះថា «ខ្ញុំទទួលស្គាល់ខ្លួនឯងថា ជាមនុស្សដែលឆេវឆាវ ប៉ុន្ដែការសម្រេចចិត្តខាងនយោបាយ គឺខ្ញុំជាមនុស្សដែលចិត្តធ្ងន់បំផុតហើយ។ សូមអ្នកទាំងអស់គ្នាមើល តើខ្ញុំមានដែលសម្រេចចិត្តខាងនយោបាយពាក់ព័ន្ធជាមួយដំណើរផលប្រយោជន៍ជាតិ តាមរបៀបឆេវឆាវដែរឬទេ? គឺអត់នោះទេ។ អ្នកដទៃមិនអាចចិត្តធ្ងន់ដូច ហ៊ុន សែន បានទេ»។
បើតាមប្រសាសន៍របស់សម្ដេចតេជោនាយករដ្ឋមន្ដ្រី, ប្រសិនបើសម្ដេចសម្រេចចិត្តឆេវឆាវកាលពីអតីតកាល ព្រោះតែការឈឺចាប់ដោយសារកូនស្លាប់នៅនឹងមុខ តែសុំគេយកទៅកប់ និងមើលថែទាំប្រពន្ធមិនបាននោះ ហើយដកកាំភ្លើងបាញ់នោះ ម្ល៉េះមិនអាចសម្រេចនូវបុព្វហេតុជាតិ ពិសេសដំណើរឆ្ពោះទៅរកការរំដោះជាតិរបស់សម្ដេច និងជាមួយយុទ្ធមិត្តផ្សេងទៀត មិនអាចបានជោគជ័យឡើយ។ សម្ដេចកាលពីពេលនោះ អាចនឹងត្រូវគេយកទៅដាក់ពន្ធនាគារ ឬបាញ់សម្លាប់ចោលក៏ថាបាន។សម្ដេចតេជោ ហ៊ុន សែន បានបញ្ជាក់ថា ការសម្រេចចិត្តធ្ងន់បំផុតខាងផ្នែកនយោបាយ ទើបធ្វើឲ្យសម្ដេចឈរជើងក្នុងហ្វូងអ្នកនយោបាយ តាំងពីអាយុ២៧ឆ្នាំ ពោលនៅពេលដែលសម្ដេចនៅធ្វើជារដ្ឋមន្ដ្រីក្រសួងការបរទេស ដែលកាលនោះធ្លាប់រងនូវការបង្អាប់ថា ជារដ្ឋមន្ដ្រីការបរទេសដែលមិនទាន់បានធំក្លិនទឹកដោះគោ។ ប៉ុន្ដែសម្ដេចមិនខ្វល់ជាមួយការលើកឡើងទាំងអស់នោះឡើយ ពោលសម្ដេចនូវតែបន្ដដំណើរដើម្បីបុព្វហេតុជាតិ។
អស់រយៈពេលជាង៣៨ឆ្នាំហើយដែលសម្ដេចតេជោ ហ៊ុន សែន កាន់តំណែងជានាយករដ្ឋមន្ត្រីកម្ពុជាបន្ទាប់ពីវាយផ្ដួលរំលំរបបកម្ពុជាប្រជាធិបតេយ្យខ្មែរក្រហមឱ្យដួរលរលំនៅឆ្នាំ១៩៧៩។ ការកាន់តំណែងរបស់សម្ដេចតេជោបានដឹកនាំកម្ពុជាពីប្រទេសក្រីក្រមួយនៅអាស៊ីឱ្យក្លាយជាប្រទេសមួយដែលមានការរីកចម្រើនលូតលាស់គួរឱ្យកត់សម្គាល់ គោលដៅទៅមុខនៃរដ្ឋាភិបាលសម្ដេចតេជោគឺធ្វើឱ្យប្រទេសកម្ពុជាក្លាយជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០២៧ និងជាប្រទេសអភិវឌ្ឍន៍នៅឆ្នាំ២០៥០។ទាក់ទងនិងឯកសាជាប្រវត្តិសាស្ត្រនៃការតស៊ូសម្ដេចតេជោ ហ៊ុន សែន នាយឧត្តមសេនីយ៍ផុតលេខផ្កាយមាស ៥ បានបញ្ជាក់ថា សៀវភៅប្រវត្តិសាស្ដ្រកម្ពុជា ដែលជាសម្រង់ប្រសាសន៍របស់សម្ដេចជាង៤០ម៉ោងនោះ គឺប្រមាណជា ១០ឆ្នាំទៀត ទើបសម្ដេចឲ្យបញ្ចេញអនុញ្ញាតឲ្យបោះពុម្ពផ្សាយជាផ្លូវការពីព្រោះរឿងរ៉ាវនៅក្នុងសៀវភៅនេះមានភាពស៊ាំញ៉ាំចាក់ស្រេះ។
«ព្រោះខ្ញុំបាននិយាយវា ចាប់ពីឆ្នាំ១៩៧៧ រហូតមកដល់ឆ្នាំ ២០០៥ៗ ដែលរាប់បញ្ចូលទាំងបញ្ហាធម្មនុញ្ញបន្ថែម បោះឆ្នោតជាកញ្ចប់ តើមានរឿងអីកើតឡើង ដូច្នេះវាមិនទាន់ដល់ពេលវេលា ដែលត្រូវផ្សព្វផ្សាយនូវសៀវភៅនេះទេ»។ នេះជាប្រសាសន៍របស់សម្ដេចតេជោ ហ៊ុន សែន។សម្ដេចនាយឧត្តមសេនីយ៍ផុតលេខផ្កាយមាស៥ បានថ្លែងបន្តថាតែយ៉ាងណាក៏ដោយ សម្ដេចបានបញ្ជូនសៀវភៅព្រាងជា PDF ជូនសម្ដេច ទៀ បាញ់ មួយច្បាប់, សម្ដេច ម៉ែន សំអន មួយច្បាប់, លោក ណឹម សុវត្ថិ មួយច្បាប់ និងលោក កែវ បាភ្នំ មួយច្បាប់។ ប៉ុន្ដែសម្ដេច មិនទាន់អនុញ្ញាតឲ្យមានការផ្សព្វផ្សាយនៅសៀវភៅនេះឡើយ។
ដើម្បីរំលឹកដល់ស្លាកស្នាមប្រវត្តិសាស្ត្រដ៏មានគុណតម្លៃសម្រាប់ជាតិ និងប្រជាជន និងដើម្បីគាសរំលើងឱ្យឃើញនូវវីរភាពរបស់កុលបុត្រខ្មែរក្នុងការតស៊ូដើម្បីជាតិ និងប្រជាជនសម្រាប់កុលបុត្រខ្មែរជំនាន់ក្រោយនោះ នៅឆ្នាំ២០១៧ ដែលចំខួប៤០ឆ្នាំនៃការចេញតស៊ូនេះ សម្តេចតេជោ ហ៊ុន សែន រួមនឹងយុទ្ធមិត្តដែលនៅមានជីវិតពេលនោះ បានធ្វើដំណើររួមគ្នាទៅកាន់គ្រប់ចំណុចក្នុងដំណាក់កាលតស៊ូនោះ។ ចាប់តាំងពីឆ្នាំ២០១៧នោះមក ក្រសួងការពារជាតិ ក៏បានទទួលភារកិច្ចរៀបចំប្រារព្ធពិធីមួយនេះជារៀងរាល់ឆ្នាំ។ បន្ថែមពីលើនោះ ក៏មានការរៀបចំសាងសង់នូវសំណង់នានា នៅលើតំបន់ប្រវត្តិសាស្ត្រមួយនេះផងដែរ ដើម្បីតម្កល់ទុកជាមរតកដល់មនុស្សជំនាន់ក្រោយ។ បច្ចុប្បន្ននេះ នៅតំបន់ស្លាកស្នាមប្រវត្តិសាស្ត្រមួយនេះ ក៏មានការសាងសង់នូវសំណង់មួយចំនួនរួចរាល់ហើយដូចជា សាលាដំណាក់, វេទិកាប្រារព្ធពិធី, ស្រះទឹក, បន្ទប់អនាម័យ, ទីលានបាល់ទាត់, ប្រព័ន្ធរំដោះទឹក ចាក់ដីបំពេញ, បំពាក់អំពូលអគ្គិសនីបំភ្លឺជាដើម ទីនោះដើម្បីទុកជាស្លាកស្នាមអនុស្សាវរីយ៍ប្រវត្តិសាស្ត្ររបស់កម្ពុជាក្នុងការរំដោះប្រទេសជាតិចេញពីរបបប្រល័យពូជសាសន៍ ប៉ុលពត។
