កម្ពុជាអរគុណកូរ៉េនិងប្រកាស ដាច់ខាតមិនគាំទ្រការឈ្លានពានពីប្រទេសមួយទៅប្រទេសមួយទេ
ខេត្តកណ្តាល៖ សម្តេចតេជោ ហ៊ុន សែននាយករដ្ឋមន្ត្រីកម្ពុចា ថ្លែងថា «ជំហរកម្ពុជា ដាច់ខាត គឺមិនគាំទ្រការឈ្លានពានពីប្រទេសមួយទៅប្រទេសមួយទេ។ យើងប្រឆាំងចំពោះការប្រើប្រាស់កម្លាំងយោធាទៅគំរាមកំហែងប្រទេសណាឡើយ»។
ក្នុងឱកាសអញ្ជើញសម្ពោធដាក់ឱ្យប្រើប្រាស់ជាផ្លូវការផ្លូវជាតិលេខ២១ ប្រវែងជិត ៦៤គីឡូម៉ែត្រ តភ្ជាប់ពីរង្វង់មូលក្រុងតាខ្មៅ រហូតដល់ច្រកទ្វារអន្តរជាតិកម្ពុជា-វៀតណាម (ជ្រៃធំ-ឡុងប៊ិញ)មេរិក នាព្រឹកថ្ងៃទី២៣ ខែមីនា ឆ្នាំ២០២២សម្តេចតេជោ ហ៊ុន សែន បញ្ជាក់ថា “ខ្ញ៉ំនិយាយឱ្យហើយ ឱ្យតែមានការបោះឆ្នោតជាអន្តរជាតិដែលកម្ពុជាចូលរួមបោះឆ្នោតដែរនោះ ពាក់ព័ន្ធនឹងបញ្ហាសង្គ្រាម គឺកម្ពុជាប្រកាន់គោលជំហរជាប់ជានិច្ច គឺមិនគាំទ្រការឈ្លានពានពីប្រទេសមួយទៅប្រទេសមួយទេ។ យើងប្រឆាំងចំពោះការប្រើប្រាស់កំលាំងយោធាទៅគំរាមកំហែងប្រទេសណាឡើយ។”សម្តេចតេជោ ហ៊ុន សែន បានបន្តថា សង្គ្រាមរុស្ស៊ី-អ៊ុយក្រែន ត្រូវតែឆាប់បញ្ចប់ បើមិនដូច្នោះទេប៉ះពាល់ដល់សេដ្ឋកិច្ចធ្ងន់ធ្ងរណាស់ ។ ជាក់ស្តែង ពិភពលោកកំពុងប៉ះពាល់បញ្ហាប្រេងឡើងថ្លៃ ។
លោក ស៊ុន ចាន់ថុល រដ្ឋមន្ត្រីក្រសួង សាធារណការ និងដឹកជញ្ជូន បានអោយដឹងថា ផ្លូវជាតិលេខ២១ សាងសង់ដោយក្រុមហ៊ុនហានស្សីន វិស្វកម្ម និងសំណង់ (HANSHIN Engineering & Construction Co., Ltd) និងត្រួតពិនិត្យលក្ខណៈបច្ចេកទេសដោយក្រុមហ៊ុនទីប្រឹក្សាបច្ចេកទេសដាសាន់ (DASAN Consultants Co., Ltd) បានចំណាយថវិកាសាងសង់សរុបជិត ៦១លានដុល្លារអាមេរិក ដែលជាឥណទានសម្បទានពីរដ្ឋាភិបាលសាធារណរដ្ឋកូរ៉េ រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ការបោសសម្អាតគ្រាប់មីន យុទ្ធភ័ណ្ឌមិនទាន់ផ្ទុះ និងពន្ធអាករផ្សេងៗ។
លោក Park Heung-kyeong អគ្គរដ្ឋទូតកូរ៉េប្រចាំនៅកម្ពុជា បានមានប្រសាសន៍អបអសាទរចំពោះ សមិទ្ធផលផ្លូវជាតិលេខ២១នាពេលនេះ ដែលកើតចេញពីចំណងមិត្តភាព កម្ពុជា-កូរ៉េ។ លោកបានលើកឡើងទៀតថាតាមរយៈផ្លូវនេះ បាននិងកំពុងដើរតួនាទីយ៉ាងសំខាន់ ក្នុងការជួយសម្រួលការដឹកជញ្ជូនគ្រប់ប្រភេទ ជាពិសេសការដឹកទំនិញ និងកសិផលសម្រាប់ការដោះដូរពាណិជ្ជកម្មរ ព្រមទាំងបានជំរុញ និងប្រែក្លាយតំបន់នៅតាមព្រំដែន ឱ្យក្លាយជាតំបន់អភិវឌ្ឍន៍ និងរីកចម្រើន។
សម្តេចតេជោបានមានប្រសាសន៍ថា សម្តេចនៅចងចាំពីស្ថានភាពដ៏លំបាកនៃផ្លូវជាតិលេខ២១ កាលពីអតីតកាល ហើយក្រៅតែកង្វល់ពីស្ថានភាពលំបាកនៃផ្លូវជាតិលេខ២១ហើយនោះ សម្តេចតេជោក៏កង្វល់ពីការបាក់ច្រាំងនៅតាមបណ្តោយនេះផងដែរ។ តែឥឡូវនេះ បានដោះស្រាយក្តីកង្វល់នេះអស់ហើយ តាមរយៈការសាងសង់ថ្មី និងធ្វើអោយប្រសើរឡើងនូវផ្លូវជាតិលេខ២១នេះ។ សម្តេចតេជោនាយករដ្ឋមន្ត្រីបាន ថ្លែងអំណរគុណយ៉ាងជ្រាលជ្រៅដល់រដ្ឋាភិបាល និងប្រជាពលរដ្ឋកូរ៉េ សម្រាប់ការផ្តល់ប្រាក់កម្ចី ក្នុងការសាងសង់ផ្លូវជាតិលេខ២១នេះ។ សមិទ្ធផលដែលកម្ពុជាទទួលបាននាពេលនេះ ជាលទ្ធផលនៃកិច្ចសហប្រតិបត្តិការយ៉ាងជិតស្និទ្ធរវាងកម្ពុជា និងកូរ៉េខាងត្បូង។
ជាមួយគ្នានេះដែរ សម្តេចតេជោនាយករដ្ឋមន្ត្រី បានមានប្រសាសន៍ថា កូរ៉េខាងត្បូង បាន សម្រេចផ្តល់ថវិកាសម្រាប់សាងសង់ស្ពានតភ្ជាប់ពីភ្នំពេញ ទៅតំបន់អរិយក្សត្ររួច ហើយ។ សម្តេចតេជោបង្ហាញក្តីរំពឹងថា ប្រធានាធិបតីកូរ៉េខាងត្បូងនាពេលបច្ចុប្បន្ន ដែលទើបជាប់ឆ្នោតថ្មី នឹងបន្តគាំទ្រគម្រោងសាងសង់ស្ពានមិត្តភាពកម្ពុជា-កូរ៉េ តភ្ជាប់ពីភ្នំពេញទៅអរិយក្សត្រ។ សម្តេចតេជោបានមាន ប្រសាសន៍បញ្ជាក់ទៀតថា ស្ពានតភ្ជាប់ពីភ្នំពេញ ទៅកាន់តំបន់អរិយក្សត្រ នេះបានសម្រេចសាងស្ពាន២កន្លែង ដោយទី១យកទីតាំងសាងសង់ចេញពីម្តុំផ្សាររាត្រី ទៅកាន់ជ្រោយចង្វា និងស្ពាន១ទៀតចេញជ្រោយចង្វា ទៅតំបន់អរិយក្សត្រតែម្តង។
សម្រាប់ការរកស៊ីជាមួយគ្នាសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានបង្ហាញនូវមោទកភាព ក្នុងឋានៈជាស្ថាបនិក នៃការបង្កើតទំនាក់ទំនងការទូតឡើងវិញរវាងកម្ពុជា និងសាធារណរដ្ឋកូរ៉េ ដែលបានក្លាយជាទំនាក់ទំនងការទូតជឿនលឿន។សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានជំរុញដល់ភាគីរដ្ឋាភិបាលកូរ៉េ ឱ្យបំពេញនីតិវិធីផ្ទៃក្នុងរបស់ខ្លួនឱ្យបានឆាប់ដើម្បីចាប់ផ្តើមជំរុញពាណិជ្ជកម្មកម្ពុជា កូរ៉េ ស្របគ្នាជាមួយការចូលជាធរមាន នៃកិច្ចព្រមព្រាង អាសិប ខណៈការនាំចេញពាណិជ្ជកម្មរបស់កម្ពុជា ទៅកាន់ប្រទេសកូរ៉េ ក្នុងរយៈពេល២ខែ ដើមឆ្នាំនេះ បានកើនឡើង៣៣ភាគរយ។
នៅក្នុងឆ្នាំ២០២១កន្លងទៅ ពាណិជ្ជកម្មទ្វេភាគីរវាងប្រទេសកម្ពុជា និងប្រទេស កូរ៉េ សម្រេចបានទំហំទឹកប្រាក់ជាង ៣០២ លានដុល្លារ ដែលកើនឡើង ២,៦៦ ភាគរយ បើប្រៀបធៀបនឹងរយៈពេលដូចគ្នា កាលពីឆ្នាំ២០២០៕
