ចែកសញ្ញាបត្រ័សម្តេចតេជោចេញបញ្ជារដោះស្រាយរឿងពីរទាក់ទងថៅកែរត់ចោលនិងដាំឈើនៅតាម៉ៅ
ភ្នំពេញ)៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចេញបញ្ជាឱ្យរដ្ឋមន្ត្រីក្រសួងការងារ និងខុទ្ទកាល័យសម្ដេចតេជោផ្ទាល់ដោះស្រាយរឿងបញ្ហា និងបើកប្រាក់ឈ្នួលជូនកម្មករ៤០០នាក់នៃរោងចក្រឃែន ធើរេន អឹលភែរឹល (ខេមបូឌា) ឱ្យបានគ្រប់គ្នា បន្ទាប់សម្ដេចដឹងថាថៅកែរោងចក្រនេះមិនបើកប្រាក់ឈ្នួលជូនកម្មកររបស់ខ្លួនច្រើនខែមកហើយនិង។
ក្នុងពិធីចែកសញ្ញាបត្រជូននិស្សិតសាកលវិទ្យាល័យពុទ្ធិសាស្ត្រ នាព្រឹកថ្ងៃទី១៧ ខែសីហា ឆ្នាំ២០២២ សម្ដេចតេជោ ហ៊ុន សែន បានលើកឡើងថា នៅយប់មិញ (យប់ថ្ងៃទី១៦ សីហា) សម្ដេចបានមើលព័ត៌មានមុនចូលសម្រាល ក៏ឃើញព័ត៌មានផ្សាយអំពីបញ្ហារបស់កម្មកររោងចក្រមួយកន្លែងដែលថៅកែរត់ចោល ដោយមិនបើកប្រាក់ឈ្នួលជូនពួកគេ ហើយរោងចក្រនោះក៏បានបិទទ្វារទៅទៀត។សម្ដេចតេជោបានបន្តថា កម្មករទាំងនោះបានដាក់ញត្តិស្នើឱ្យជួយដោះស្រាយទៅកាន់ក្រសួងការងារ ប៉ុន្តែជិត២ខែមកហើយកម្មករទាំងនោះនៅតែមិនទាន់ទទួលបានចម្លើយ ឬដំណោះស្រាយណាមួយសោះ ហើយក៏បានដាក់ញត្តិទៅកាន់ខុទ្ទកាល័យសម្ដេចតេជោនាយករដ្ឋមន្ត្រីថែមទៀត។
សម្ដេចតេជោនាយករដ្ឋមន្ត្រីបានបញ្ជាទៅរដ្ឋមន្ត្រីក្រសួងការងារ លោក អ៊ិត សំហេង ឱ្យប្រញាប់ដោះស្រាយបញ្ហាជូនកម្មករជាង៤០០នាក់នោះ និងបើកប្រាក់ឈ្នួលជូនពួកគេ កុំឱ្យពួកគេត្រាំត្រែងនឹងបញ្ហាតទៅទៀត។សម្ដេចតេជោក៏បានលើកជាយោបល់ឱ្យលោករដ្ឋមន្ត្រី អ៊ិត សំហេង ស្នើខ្ចីថវិកាពីរាជរដ្ឋាភិបាលដើម្បីយកទៅបើកប្រាក់ឈ្នួលជូនកម្មករជាមុនសិន សឹមចាត់វិធានការដោះស្រាយជាមួយថៅកែរោងចក្រតាមក្រោយ ដើម្បីរួសរាន់ដោះស្រាយបញ្ហាជូនកម្មករដែលកំពុងជួបការខ្វះខាត និងត្រូវការថវិកាប្រើប្រាស់ចាយវាយប្រចាំថ្ងៃ។សម្ដេចថ្លែងយ៉ាងដូច្នេះថា «កាលលើកមុនខ្ញុំឱ្យខ្ចីលុយរាជរដ្ឋាភិបាលយកទៅដោះស្រាយឱ្យកម្មករ ហេតុអីរឿងនេះបានជាមិនដោះ (សំដៅទៅកាន់លោក អ៉ិត សំហេង)។ ឥឡូវ ទៅខ្ចីលុយរាជរដ្ឋាភិបាលយកទៅដោះស្រាយឱ្យកម្មករទាំងនោះសិនទៅ រួចហើយចាំដោះស្រាយជាមួយក្រុមហ៊ុននោះតាមក្រោយ»។
លោក ហេង សួរ រដ្ឋលេខាធិការនិងជាអ្នកនាំពាក្យក្រសួងការងារនិងបណ្ដុះបណ្ដាលវិជ្ជាជីវៈបានឲ្យដឹងថា រោងចក្រឃែន ធើរេន អឹលភែរឹល (ខេមបូឌា) មានកម្មករចំនួនប្រមាណ៤០០នាក់ ដែលមានទីតាំងស្ថិតនៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ «មូលហេតុគឺថៅកែប្រកាសក្ស័យធន ហើយរត់ចោលកម្មករ រីឯការទៅបើកថ្មីឬយ៉ាងម៉េចគឺស្ថាប័នពាក់ព័ន្ធកំពុងស្រាវជ្រាវបន្ត»។
ក្រៅពីរឿងឲ្យចេញលុយជូនកម្មករសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ថា បន្ទាប់ពីដកហូតពីវិស័យឯកជនត្រឡប់មកវិញ ពេលនេះតំបន់ភ្នំតាម៉ៅ កំពុងត្រូវបានឈូសឆាយ សម្អាតដី ដើម្បីដាំកូនឈើប្រណីតឡើងវិញ ហើយមិនមែនជាការដាំដើម្បីបង្ហោះហ្វេសបុកនោះទេ។ សម្តេចបានបញ្ជាក់ថា ទាំងសួនសត្វ និងព្រៃនៅតំបន់ភ្នំតាម៉ៅទាំងមូល នឹងត្រូវកំណត់ជាតំបន់អភិរក្សសម្តេចបានបញ្ជាក់ថា សម្តេចបានបញ្ជាឱ្យ កងអង្គរក្សរបស់សម្តេចជាង១ពាន់នាក់ ដែលក្នុងនោះមានគ្រឿងចក្រ១១៣គ្រឿងផងដែរ ទៅរៀបចំដីឱ្យបានស្អាតល្អ ដើម្បីដាំកូនឈើឡើងវិញនៅតំបន់នេះ សម្រាប់បង្កើតជាឧទ្យាព្រៃឈើ ជារៀងរហូត។
«យើងមិនមែនដាំ ដើម្បី បង្ហោះហ្វេសប៊ុកឯណា ! សុទ្ធតែបេង ធ្នង់ នាងនួន សុទ្ធតែឈើប្រណីត អញ្ចឹងមិនមែនដាំហើយយកទៅបង្ហោះហ្វេសប៊ុកលេងឯណា ត្រូវដាំឱ្យវាត្រូវខ្នាតរបស់វា រួចហើយត្រូវតាមមើលការថែមទាំទៀត ដែលក្រុមហ៊ុនឈូសឆាយនឹងទទួលខុសត្រូវនៅពេលខាងមុខ សម្រាប់ការផ្តល់ឱ្យរដ្ឋបាលព្រៃឈើធ្វើការថែទាំងនៅពេលខាងមុខ»។សម្តេចបានបន្ថែមទៀតថា ពេលនេះកម្លាំងកងទ័ពដែលឈរជើងនៅទីនោះ កំពុងបំពេញការងារដាំដុះ ហើយទោះបីជាពេលនេះ កំពុងតែសម្អាតដីឱ្យបានស្អាត ប៉ុន្តែការដាំបានធ្វើឡើងជាបណ្តើរៗហើយ ដែលមានប្រមាណជិតមួយរយហិកតាទៅហើយ។ ដើម្បីធានាការលូតលាស់ ជាពិសេសឆ្លងកាត់រដូវប្រាំងនេះ សម្តេចបានបញ្ជាឱ្យក្រសួងកសិកម្ម សិក្សាអំពីប្រភពទឹក ដើម្បីទាញយកទៅស្រោចកូនឈើនៅរដូវប្រាំង ដែលសម្តេចជឿថា កូនឈើអាចមានបញ្ហានៅរដូវប្រាំងខាងមុខនេះ បើមិនមានទឹកគ្រប់គ្រាន់៕
