សម្តេចតេជោ៖យើងទាំងអស់គ្នាត្រូវទទួលស្គាល់ពីតម្លៃដែលមិនអាចកាត់ថ្លៃបាន នៃទន្លេមេគង្គ នៃធនធានទឹក
ភ្នំពេញ៖ ក្នុងឱកាសកិច្ចប្រជុំចង្អៀតរវាងសមាជិករបស់គណៈកម្មការទន្លេមេគង្គនៅទីក្រុងវៀងចន្ទ័ប្រទេសឡាវ សម្ដេចតេជោ ហ៊ុន សែននាយករដ្ឋមន្ត្រីកម្ពុជា បានលើកឡើងថា «យើងទាំងអស់គ្នាត្រូវទទួលស្គាល់ពីតម្លៃដែលមិនអាចកាត់ថ្លៃបាន នៃទន្លេមេគង្គ នៃធនធានទឹក» ដូច្នេះយើងត្រូវរួមគ្នាខិតខំធ្វើគ្រប់វិធានការដើម្បីឲ្យធនធាននេះគង់វង្ស។
លោក សុខ ចិន្ដាសោភា រដ្ឋមន្ដ្រីប្រតិភូអមនាយករដ្ឋមន្ដ្រីបានឲ្យដឹងថា ក្នុងសន្និសីទសារព័ត៌មានស្តីពីលទ្ធផល នៃការអញ្ជើញរបស់សម្តេចតេជោ ហ៊ុន សែន ក្នុងកិច្ចប្រជុំកំពូលគណៈកម្មការទន្លេមេគង្គលើកទី៤ នៅប្រទេសឡាវសម្ដេចតេជោ ក៏បានលើកឡើងពីបញ្ហាគ្រាប់មីន និងគ្រាប់យុទ្ធភណ្ឌមិនទាន់ផ្ទុះនៅតាមដងទន្លេមេគង្គ ដែលសមាជិករបស់គណៈកម្មការទន្លេមេគង្គ ត្រូវរួមគ្នាគិតគូរដោះស្រាយ។លោក សុខ ចិន្ដាសោភា បានថ្លែងថា សម្តេចតេជោ ហ៊ុន សែន បានមានប្រសាសន៍មុនគេ និងបានថ្លែងថា យើងត្រូវធ្វើយ៉ាងណាឲ្យទន្លេមេគង្គរក្សាគង់វង្សជានិរន្តរ៍ ហើយថា ប្រទេសទន្លេមេគង្គមានបញ្ហាប្រឈមច្រើនដែលគេបានដឹង តែមានតែប្រទេសនៅតាមដងទន្លេមេគង្គជួបប្រទះនោះគឺបញ្ហាមីន និងយុទ្ធភណ្ឌមិនទាន់ផ្ទុះនៅតាមទន្លេ ដែលពីមុនមកមិនដែលមានអ្នកណាលើកឡើងឡើយ។
លោក សុខ ចិន្ដាសោភា បានបញ្ជាក់ថា បញ្ហាប្រឈមរបស់ទន្លេមេគង្គនោះ រួមមាន ការប្រែប្រួលអាកាសធាតុ ការអភិវឌ្ឍសង្គមសេដ្ឋកិច្ច ការកសាងហេដ្ឋារចនាសម្ព័ន្ធមួយចំនួនដែលមានការប៉ះពាល់ និងតម្រូវការទឹកយកមកប្រើប្រាស់ពីទន្លេ ។ល។និង។ល។ក្រៅពីបញ្ហាប្រឈមមេដឹកនាំក៏បានទទួលស្គាល់ និងការប្តេជ្ញាចិត្តធ្វើកិច្ចសហប្រតិបត្តិការជាមួយប្រទេសគណៈកម្មការ និងកិច្ចសហប្រតិបត្តិការជាមួយអាស៊ាន កិច្ចសហប្រតិបត្តការជាមួយដៃគូរពាក់ព័ន្ធផ្សេងៗទៀត ដើម្បីដោះបញ្ហាប្រឈមហានិភ័យ និងកាលានុវត្តភាពសំខាន់ៗ ដែលបណ្តាប្រទេសក្នុងអាងទន្លេមេគង្គក្រោមកំពុងជួបប្រទះនាពេលបច្ចុប្បន្ន និងអនាគត ដែលកើតឡើងដោយអន្តរកម្ម នៃការអភិវឌ្ឍ និងការប្រែប្រួលអាកាសធាតុ ការគ្រប់គ្រងទឹកឲ្យប្រសើរ ដើម្បីសម្រេចឲ្យបាន នូវសន្តិសុខទឹកក្នុងអាងទន្លេមេគង្គ។លោក សុខ ចិន្ដាសោភា មានប្រសាសន៍ថា «ក្រៅពីប្រទេសគណៈកម្មការ ៤ប្រទេសនោះ ភាគីចិនដែលជាប្រទេសមានប្រភពទឹកទន្លេមេគង្គដែរនោះបានចូលរួមប្តេជ្ញាចិត្តក្នុងការទទួលខុសត្រូវពីបញ្ហាប្រឈមនានាផងដែរ»។
សូមជម្រាបជូនថា គណៈកម្មការទន្លេមេគង្គ (MRC) គឺជាស្ថាប័នអន្តររដ្ឋាភិបាល ដែលបំពេញ ការងារ ដើម្បីជួយសម្រួលដល់កិច្ចសហប្រតិបត្តិការជុំវិញការអភិវឌ្ឍ និងគ្រប់គ្រង តំបន់ អាងទន្លេមេគង្គប្រកបដោយចីរភាព។ សមាជិករបស់គណៈកម្មការនេះ រួមមាន ប្រទេសកម្ពុជា ឡាវ ថៃ និងវៀតណាម។សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រ កម្ពុជា បានដឹកនាំគណៈប្រតិភូជាន់ខ្ពស់កម្ពុជា អញ្ជើញចូលរួមកិច្ចប្រជុំកំពូលគណៈកម្មការទន្លេមេគង្គ (Mekong River Commission-MRC) លើកទី៤ ក្រោមមូលបទ “នវានុវត្តន៍ និងកិច្ចសហប្រតិបត្តិការ សម្រាប់អាងទន្លេមេគង្គ ដែលមានសន្តិសុខទឹក និងប្រកបដោយចីរភាព” ដែលបានប្រព្រឹត្តទៅនៅថ្ងៃ ទី៥ ខែមេសា ឆ្នាំ២០២៣ នៅទីក្រុងវៀងចន្ទន៍ ប្រទេសឡាវ។ កិច្ចប្រជុំកំពូលនេះ មានការចូលរួម ដោយ លោក ផាម មិញ ជិញ (Pham Minh Chinh) នាយករដ្ឋមន្ត្រីនៃសាធារណរដ្ឋសង្គម និយមវៀតណាមតំណាងជាន់ខ្ពស់នៃរដ្ឋាភិបាលនៃព្រះរាជាណាចក្រថៃ តំណាងជាន់ខ្ពស់ន ប្រទេសដៃគូសន្ទនា (ចិន និងមីយ៉ាន់ម៉ា) ព្រមទាំងដៃគូអភិវឌ្ឍន៍ និងដៃគូផ្សេងទៀតផងដែរ។សម្តេចតេជោនិងប្រតិភូអមដំណើរបានធ្វើមាតុភូមិនីវត្តន៍មកដល់ប្រទេសកម្ពុជាវិញហើយនារសៀលថ្ងៃទី៥មេសាឆ្នាំ២០២៣។
