ដកមេចារកម្មនិងរដ្ឋអាជ្ញាអ៊ុយក្រែនម្នាក់រឿងឃុបឃឹតជាមួយរុស្ស៊ី
22-August-2024 / ព័ត៌មានអន្តរជាតិ
អ៊ុយក្រែន៖ កាលពីថ្ងៃអាទិត្យកន្លងទៅនេះ ប្រធានាធិបតីអ៊ុយក្រែនលោក Volodymyr Zelenskiy បានធើ្វការស្តីបន្ទោសហើយបានសម្រេចដកតំណែងប្រធានទីភ្នាក់ងារចារកម្ម ហើយនិងរដ្ឋអាជ្ញាមួយរូបដោយចោទប្រកាន់ថាបានចូលដៃជាមួយនឹងប្រទេសរុស្ស៊ី ។នេះគឺជាលើកទី ១ហើយ សម្រាប់ប្រទេសអ៊ុយក្រែនដែលក្នុងជួរថ្នាក់ដឹកនាំសំខាន់ៗត្រូវបានដកតំណែងចាប់តាំងការផ្ទុះសង្គ្រាមជាមួយនឹងរុស្ស៊ីនោះមក។
គេហទំព័រផ្លូវការរបស់លោកប្រធានាធិបតី Zelenskiy បានបញ្ជាក់ថា អ្នកដែលត្រូវដកតំណែងទាំងនោះរួមមានលោកអ៊ីវ៉ាន់ បាកាណូវ( Ivan Bakanov) ដែលជាប្រធានភ្នាក់ងារសន្ដិសុខជាតិ SBU របស់អ៊ុយក្រែន ហើយនិងលោកស្រីលោកស្រីអ៊ីរីណា វេនេឌីកតូវ៉ា( Iryna Venediktova )ជារដ្ឋមន្ត្រីក្រសួងយុត្តិធម៌ផងដែរ។តាមការបញ្ជាក់របស់លោកប្រធានាធិបតី Zelenskiy បានបកស្រាយឱ្យដឹងថា ក្រុមមន្ត្រីថ្នាក់ក្រោមរបស់ស្ថាប័នទាំងពីរខាងលើនេះបានលួចបង្ហើបប្រាប់រូបលោកឱ្យដឹង អំពីការពាក់ព័ន្ធសហការចូលដៃជាមួយនឹងសត្រូវ ដែលវាគឺជារឿងដ៏គ្រោះថ្នាក់សម្រាប់ប្រទេសជាតិ ហើយនិងបង្កឱ្យប៉ះពាល់យ៉ាងខ្លាំងទៅដល់ស្ថាប័នរដ្ឋដទៃទៀតដែលកំពុងខិតខំព្យាយាមបំពេញការងាររបស់ខ្លួនដើម្បីបុព្វហេតុជាតិនៅក្នុងគ្រាដ៏លំបាកមួយនេះ។
លោក Zelenskiy ក៏បានបន្ដឱ្យដឹងទៀតថា មានករណីបទចោទប្រកាន់ពាក់ព័ន្ធទៅនឹងអំពើក្បត់ជាតិសរុប ៦៥១ករណីត្រូវបានគេរកឃើញ ហើយក្នុងនោះរួមមានទាំងមន្ត្រីថា្នក់ក្រោមដែលជាបណ្ដាញរបស់លោក Ivan Bakanov ហើយនិងលោកស្រី Iryna Venediktova ចំនួន ៦០រូបដែលត្រូវបានគេដឹងថាកំពុងចូលរួមធើ្វការងារជាមួយនឹងសត្រូវនៅក្នុងតំបន់ដែលកាន់កាប់ដោយទាហានរុស្ស៊ី។លោកហ្សេឡេនស្គីបានថ្លែងថា រដ្ឋអំណាចកំពុងស៊ើបអង្កេតលើករណីជាប់សង្ស័យក្បត់ និងធ្វើការឲ្យប្រយោជន៍រុស្ស៊ីជាង ៦៥០ករណីរបស់អ្នកទទួលខុសត្រូវក្នុងស្រុក ក្នុងនោះ មាន ៦០ករណីនៅក្នុងតំបន់ដែលគ្រប់គ្រងដោយកម្លាំងទ័ពរុស្ស៊ី និងតំបន់ដែលគ្រប់គ្រងដោយក្រុមអ្នកគាំទ្ររុស្ស៊ី។
លោកហ្សេឡេនស្គីយល់ថា ចំនួនឧក្រិដ្ឋកម្មដ៏ច្រើនប្រឆាំងនឹងមូលដ្ឋានគ្រឹះនៃសន្តិសុខជាតិ និងចំណងទាក់ទងរវាងក្រុមមន្ត្រីអ៊ុយក្រែនទទួលបន្ទុកការអនុវត្តច្បាប់ជាមួយនឹងទីភ្នាក់ងារពិសេសរុស្ស៊ីកំពុងបង្កឲ្យមានការចោទសួរពីទំនួលខុសត្រូវរបស់ថ្នាក់ដឹកនាំដែលជាប់ពាក់ព័ន្ធ។ក្រឹត្យបញ្ចប់តំណែងលោកអ៊ីវ៉ាន់ បាកាណូវដែលជាមិត្តតាំងពីកុមារភាព លោកហ្សេឡេនស្គីបានស្តីបន្ទោសលោកបាកាណូវពីការខ្វះខាតក្នុងការបំពេញការងារ និងកាតព្វកិច្ចរបស់ខ្លួនដែលបានបណ្តាលឲ្យបាត់បង់ជីវិតមនុស្ស។ គួរបញ្ជាក់ថា លោកស្រីអ៊ីរីណា វេនេឌីកតូវ៉ា និងលោកអ៊ីវ៉ាន់ បាកាណូវជាមនុស្សជំនិតយូរអង្វែង និងបានធ្វើការជាមួយលោកហ្សេឡេនស្គីតាំងពីលោកឡើងកាន់តំណែងប្រធានាធិបតីក្នុងឆ្នាំ ២០១៩៕
សូមបញ្ជាក់ដែរថាការដកមន្ត្រីខាងលើជួនគ្នានិងមានពត៍មានថា រុស្ស៊ីចាប់បានប្រព័ន្ធកាំជ្រួចមីស៊ីល M142 HIMARS របស់ប្រទេសអ៊ុយក្រែន ។ ប្រព័ន្ធផ្សព្វផ្សាយលោកខាងលិចកំពុងតែតាមដានយ៉ាងយកចិត្តទុកដាក់ពីព័ត៌មានខាងលើ ។ពេលថ្មីៗនេះ សារព័ត៌មានជាច្រើនបានផ្សាយថា ប្រព័ន្ធមីស៊ីល M142 HIMARS របស់អ៊ុយក្រែន ត្រូវបានកម្លាំងទាហានរុស្ស៊ី និងអ្នកជំនាញកំពុងតែស្រាវជ្រាវពីអាថ៌កំបាំង(បច្ចេកវិទ្យា)នៅខាងក្នុងអាវុធទាំងនោះ ។ នេះបើជាការណ៍ពិត គឺជាព័ត៌មានដ៏អាក្រក់សម្រាប់ប្រទេសលោកខាងលិច ។
តាមប្រភពព័ត៌មានដំបូងគឺផ្សាយចេញពីសារព័ត៌មាន Ruskaya Vesna ហើយក្រោយមកទៀតប្រព័ន្ធផ្សព្វផ្សាយផ្សេងៗដូចជា Moskva, Gazeta.ru, Vzglyad និងសារព័ត៌មានជាច្រើនបានផ្សព្វផ្សាយដូចៗគ្នា។ ប្រព័ន្ធមីស៊ីល HIMARS ត្រូវបានបញ្ជូនទៅកាន់មន្ទីរស្រាវជ្រាវនៃក្រសួងការពារជាតិដើម្បីវិភាគទៅលើបច្ចេកទេសមីស៊ីលខាងលើ។កន្លងមកក៏មានព័ត៌មានផ្សាយថា កាំភ្លើងធំប្រភេទ CAESAR ផលិតដោយប្រទេសបារាំងក៏ត្រូវបានរុស្ស៊ីចាប់និងរឹបអូសយក។ ប៉ុន្តែក្រោយមកមានព័ត៌មានផ្សាយថា នេះជាព័ត៌មានក្លែងក្លាយទៅវិញ។ប្រទេសលោកខាងលិច បារម្ភខ្លាចបច្ចេកវិទ្យាអាវុធទំនើបៗរបស់ខ្លួនធ្លាក់ចូលក្នុងដៃរុស្ស៊ី។
