ប្រទេសឥណ្ឌានិងប៉ាគីស្ថានបានរងនូវកម្ដៅរហូតរីងទន្លេរ
08-July-2026 / ព័ត៌មានអន្តរជាតិ
ប្រទេសឥណ្ឌា៖សីតុណ្ហភាពនៅក្នុងផ្នែកជាច្រើននៃប្រទេសឥណ្ឌានិងប៉ាគីស្ថាននាពេលថ្មីៗនេះបានឡើងលើសពី៥០អង្សារសេដែលបំផ្លាញដំណាំនិងអាយុជីវិតរបស់ប្រជាជនយ៉ាងធ្ងន់ធ្ងរ។ប៉ុន្មានសប្តាហ៍កន្លងមកនេះ Nazeer Ahmedបានរស់នៅក្នុងកន្លែងក្តៅបំផុតមួយនៅលើផែនដី។ដោយសាររលកកំដៅដ៏សាហាវបានបោកបក់កាត់ប្រទេសឥណ្ឌានិងប៉ាគីស្ថានផ្ទះរបស់គាត់នៅ Turbat ក្នុងតំបន់ Balochistan នៃប្រទេសប៉ាគីស្ថាន បានរងនូវសីតុណ្ហភាពជាបន្តបន្ទាប់រហូតដល់ជិត៥០អង្សាសេដែលមិនធ្លាប់មានពីមុនមក ។
អ្នកស្រុកមិនអាចចេញទៅធ្វើការនៅពេលថ្ងៃបានទេហើយប្រឈមមុខនឹងការខ្វះខាតទឹកនិងអគ្គិសនីធ្ងន់ធ្ងរ។Ahmed ភ័យខ្លាចថាអ្វីៗទើបតែចាប់ផ្តើមហើយនឹងកាន់តែអាក្រក់ទៅៗ។ នៅទីនេះក្នុងឆ្នាំ២០២១សីតុណ្ហភាពខ្ពស់បំផុតដែលបានកត់ត្រាក្នុងខែឧសភាគឺ៥៤ អង្សាសេ។ ទីក្រុង Turbat ដែលជាទីក្រុងមានអ្នកស្រុកប្រហែល២០០,០០០នាក់ថ្មីៗនេះបានទទួលរងការដាច់ចរន្តអគ្គិសនីជាបន្តបន្ទាប់ដែលរារាំងមនុស្សមិនឱ្យបើកទូទឹកកកឬម៉ាស៊ីនត្រជាក់របស់ពួកគេ។ Ahmedពិពណ៌នាថា “យើងកំពុងរស់នៅក្នុងឋាននរក”។នេះគឺជាស្ថានភាពទូទៅនៅទូទាំងអនុទ្វីបដែលឥទ្ធិពលនៃការប្រែប្រួលអាកាសធាតុកំពុងត្រូវបានយល់ឃើញយ៉ាងច្បាស់បំផុតដោយមនុស្សជាង១.៥ពាន់លាននាក់ខណៈដែលកំដៅរដូវក្តៅមកដល់ពីរខែមុននិងខ្យល់មូសុងនៅប៉ុន្មានខែទៀតចុងបញ្ចប់។តំបន់ភាគពាយ័ព្យ និងកណ្តាលនៃប្រទេសឥណ្ឌាបានជួបប្រទះខែមេសាក្តៅបំផុតរបស់ពួកគេក្នុងរយៈពេល១២២ឆ្នាំ។
សីតុណ្ហភាពក្នុងទីក្រុងJacobabadជាទីក្រុងក្នុងខេត្តSindhរបស់ប្រទេសប៉ាគីស្ថានបានឡើងដល់៤៩អង្សាសេ កាលពីថ្ងៃទី៣០ខែមេសាដែលជាសីតុណ្ហភាពខ្ពស់បំផុតមួយក្នុងខែមេសាមិនធ្លាប់មានក្នុងពិភពលោក។កំដៅបានបំផ្លាញដំណាំជាច្រើនរួមទាំងស្រូវសាលីបន្លែនិងផ្លែឈើ។នៅក្នុងប្រទេសឥណ្ឌា ផលិតកម្មស្រូវសាលីបានធ្លាក់ចុះដល់ទៅ៥០%នៅក្នុងតំបន់មួយចំនួនដែលរងផលប៉ះពាល់ខ្លាំងបំផុតដោយសីតុណ្ហភាពខ្លាំងដែលបង្កើនហានិភ័យនៃការខ្វះខាតជាសកលខណៈដែលជម្លោះនៅក្នុងប្រទេសអ៊ុយក្រែនបានជះឥទ្ធិពលយ៉ាងធ្ងន់ធ្ងរដល់ការផ្គត់ផ្គង់។នៅក្នុងស្រុក Mastung នៃខេត្ត Balochistan ប្រទេសប៉ាគីស្ថានដែលល្បីល្បាញខាងចម្ការផ្លែប៉ោមនិងផ្លែប៉ែសដំណាំមិនអាចលូតលាស់បានទេ។ កសិករបានសម្តែងការព្រួយបារម្ភអំពីផលប៉ះពាល់អាកាសធាតុយ៉ាងខ្លាំងមកលើស្រូវសាលីខណៈពេលថ្មីៗនេះតំបន់នេះក៏ត្រូវបានកាត់ផ្តាច់ភ្លើងចំនួន១៨ម៉ោងក្នុងមួយថ្ងៃ។
លោក Sherry Rehman រដ្ឋមន្ត្រីបម្រែបម្រួលអាកាសធាតុរបស់ប៉ាគីស្ថានបាននិយាយថាប្រទេសនេះកំពុងប្រឈមនឹង “វិបត្តិ” ដោយសារភាពអាសន្នអាកាសធាតុ។លោកស្រីបានព្រមានថាកំដៅកំពុងធ្វើឱ្យផ្ទាំងទឹកកកនៅភាគខាងជើងនៃប្រទេសនេះរលាយក្នុងអត្រាដែលមិនធ្លាប់មានពីមុនមកហើយធ្វើឱ្យមនុស្សរាប់ពាន់នាក់ប្រឈមនឹងគ្រោះទឹកជំនន់។លោកស្រីក៏និយាយដែរថា សីតុណ្ហភាពក្តៅមិនត្រឹមតែប៉ះពាល់ដល់រុក្ខជាតិប៉ុណ្ណោះទេថែមទាំងផ្គត់ផ្គង់ទឹកផងដែរ ។ លោកស្រីបានបន្តថា៖ «អាងស្តុកទឹកកំពុងរីងស្ងួតបន្តិចម្ដងៗ។ ទំនប់ធំរបស់យើងឥឡូវនេះបានងាប់ហើយទឹកខ្វះខាតខ្លាំងណាស់»។Abhiyant Tiwari អ្នកជំនាញជាន់ខ្ពស់នៅវិទ្យាស្ថានឆ្លើយតបគ្រោះមហន្តរាយ Gujaratប្រទេសឥណ្ឌាបានសង្កត់ធ្ងន់ថា”រលកកំដៅខ្លាំងញឹកញាប់និងអូសបន្លាយលែងជាហានិភ័យនាពេលអនាគត” ។ លោកបានមានប្រសាសន៍ថា៖ «ពួកគេបានមកដល់ហើយហើយវាជៀសមិនរួច។អង្គការឧតុនិយមពិភពលោកបាននិយាយថារលកកំដៅនៅក្នុងប្រទេសឥណ្ឌានិងប៉ាគីស្ថានគឺ “ស្របតាមអ្វីដែលយើងបានព្យាករណ៍នៅក្រោមលក្ខខណ្ឌអាកាសធាតុ។រលកកំដៅកាន់តែញឹកញាប់ កាន់តែខ្លាំងនិងចាប់ផ្តើមលេចឡើងមុនជាងពេលមុន”។
យោងតាមនាយកដ្ឋានឧតុនិយមឥណ្ឌា Bikaner គឺជាកន្លែងក្តៅបំផុតនៅក្នុងប្រទេសកាលពីចុងសប្តាហ៍ជាមួយនឹងសីតុណ្ហភាពឡើងដល់៤៧.១អង្សាសេ។ ទោះបីជាយ៉ាងណាក៏ដោយនៅតំបន់ខ្លះនៃភាគពាយព្យនៃប្រទេសឥណ្ឌារូបភាពពីផ្កាយរណបបានបង្ហាញពីសីតុណ្ហភាពលើផ្ទៃមានលើសពី៦០អង្សារសេដែលមិនធ្លាប់មានពីមុនមកសម្រាប់ពេលវេលានៃឆ្នាំនេះ។ទីភ្នាក់ងារអវកាសអឺរ៉ុបបាននិយាយនៅលើគេហទំព័ររបស់ខ្លួនថា”សីតុណ្ហភាពក្តៅបំផុតក្នុងកំណត់ត្រាគឺនៅភាគអាគ្នេយ៍និងភាគនិរតីនៃទីក្រុងAhmedabadជាមួយនឹងសីតុណ្ហភាពផ្ទៃអតិបរមាប្រហែល៦៥អង្សាសេ” ។
សីតុណ្ហភាពខ្ពស់បានដាក់សម្ពាធយ៉ាងខ្លាំងលើតម្រូវការអគ្គិសនីទាំងក្នុងប្រទេសឥណ្ឌានិងប៉ាគីស្ថាន កាលពីថ្ងៃទី ២៩ ខែមេសាតម្រូវការអគ្គិសនីខ្ពស់បំផុតក្នុងប្រទេសឥណ្ឌាបានឡើងដល់កម្រិតខ្ពស់គ្រប់ពេលវេលាគឺ២០៧១១១ មេហ្គាវ៉ាត់។ប្រទេសឥណ្ឌាកំពុងប្រឈមមុខនឹងការខ្វះខាតថាមពលដ៏អាក្រក់បំផុតរបស់ខ្លួនក្នុងរយៈពេល៦ទសវត្សរ៍។ ការកាត់ផ្តាច់ចរន្តអគ្គិសនីដែលមានរយៈពេលរហូតដល់ទៅ៨ម៉ោងត្រូវបានដាក់ក្នុងរដ្ឋដូចជា Jharkhand, Haryana, Bihar, Punjab និង Maharashtra ខណៈការផ្គត់ផ្គង់ធ្យូងថ្មក្នុងស្រុកបានធ្លាក់ចុះដល់កម្រិតធ្ងន់ធ្ងរហើយតម្លៃធ្យូងថ្មនាំចូលបានហក់ឡើងយ៉ាងខ្លាំង។ក្នុងកិច្ចខិតខំប្រឹងប្រែងដើម្បីបង្កើនល្បឿនការដឹកជញ្ជូនធ្យូងថ្មនៅទូទាំងប្រទេស ផ្លូវដែកឥណ្ឌាបានលុបចោលរថភ្លើងដឹកអ្នកដំណើរនិងប្រៃសណីយ៍ជាង៦០០ដើម្បីដឹកជញ្ជូនធ្យូងថ្មទៅកាន់រោងចក្រថាមពល៕យោងតាម Guardian
