អ៊ុយក្រែនព្រមានវាយប្រហារបេឡារុសបើមិនដកឧបករណ៍ជំនួយការវាយប្រហាររបស់រុស្ស៊ីក្នុងពេល១សប្តាហ៍

អ៊ុយក្រែន៖ប្រធានាធិបតីអ៊ុយក្រែន លោក វូឡូឌីមៀ ហ្សេលេនស្គី បានទុកពេលឱ្យបេឡារុសមួយសប្តាហ៍ សម្រាប់ឱ្យ លោក អាឡិចសាន់ឌឺរលូកាឈិនកូ(Alexander Lukashenko )ដកចេញឧបករណ៍យោធា ដែលប្រើប្រាស់ដោយរុស្ស៊ីក្នុងការវាយប្រហាររបស់ខ្លួនលើអ៊ុយក្រែន។ ប្រធានាធិបតីអ៊ុយក្រែនថា អ៊ុយក្រែននឹងចាត់វិធានការយោធា ប្រសិនបើដឹកនាំបេឡារុសមិនបានធ្វើតាមការទាមទាររបស់លោកទេនោះ។ 

លោក ហ្សេលេនស្គី បាននិយាយថាស្ថានីយ៍បញ្ជូនសញ្ញាមានទីតាំងនៅក្នុងតំបន់បេឡារុសចំនួនពីរដែលមានព្រំប្រទល់ជាប់នឹងអ៊ុយក្រែន ដែលត្រូវបានប្រើប្រាស់ដោយកងកម្លាំងរុស្ស៊ី ដើម្បីជាជំនួយក្នុងការវាយប្រហារលើជនស៊ីវិលអ៊ុយក្រែន។ លោក ហ្សេលេនស្គី បានប្រាប់សន្និសីទសារព័ត៌មានមួយនៅទីក្រុងគៀវថា៖«ខ្ញុំគិតថាមួយសប្តាហ៍នឹងគ្រប់គ្រាន់សម្រាប់គាត់ដើម្បីធ្វើដូច្នេះ។ ប្រសិនបើគាត់មិនធ្វើវាទេ យើងនឹងធ្វើវា»។ ក្រៅពីជាទីតាំងដាក់ឧបករណ៍ឱ្យសញ្ញា លោកហ្សេលេនស្គី ថាឧស្សាហកម្មចម្រាញ់ប្រេងរបស់ប្រទេសបេឡារុសបានក្លាយជាអ្នកផ្គត់ផ្គង់ដ៏សំខាន់សម្រាប់ទីក្រុងមូស្គូ ហើយមេដឹកនាំបេឡារុស ក៏អាចបញ្ឈប់វាបានដែរ បើគាត់ចង់។

មេដឹកនាំអ៊ុយក្រែនបានឲ្យដឹងថាក្នុងរយៈពេលប៉ុន្មានខែថ្មីៗនេះថា រុស្ស៊ីមានគម្រោងទាញទីក្រុងមីនស្ក៍ (Minsk) របស់បេឡារុស ឱ្យចូលកាន់តែជ្រៅទៅក្នុងសង្គ្រាមរបស់ខ្លួននៅអ៊ុយក្រែន។ ពោលកងកម្លាំងរុស្ស៊ីបានប្រើប្រាស់ទឹកដីបេឡារុសដើម្បីបើកការវាយប្រហារនៅពេលដែលពួកគេបានឈ្លានពានអ៊ុយក្រែនជាលើកដំបូងនៅក្នុងខែកុម្ភៈ ឆ្នាំ ២០២២។ កាលពីខែមុន លោក Lukashenko បានបដិសេធដែលថា ទីក្រុង មីនស្ក៍ នឹងមិនត្រូវអូសទាញបន្ថែមទៀតចូលទៅក្នុងសង្គ្រាម ដោយអះអាងថា ខ្លួនបានរួមគ្នាជាមួយរុស្ស៊ីនឹងការពារខ្លួនក្នុងករណីមានការឈ្លានពាន។

ទីក្រុងមីនស្ក៍ នៅតែជាអ្នកគាំទ្រដ៏រឹងមាំបំផុតរបស់ទីក្រុងមូស្គូក្នុងអំឡុងពេលសង្គ្រាម។ ជាក់ស្តែង យន្តហោះគ្មានមនុស្សបើករបស់រុស្ស៊ីបានឆ្លងកាត់ប្រទេសបេឡារុស ខណៈពេលកំពុងវាយប្រហារអ៊ុយក្រែន ហើយទីក្រុងមីនស្ក៍បាននិយាយថា ខ្លួនបានដាក់ពង្រាយប្រព័ន្ធមីស៊ីលបាលីស្ទិករយៈចម្ងាយមធ្យម Oreshnik របស់រុស្ស៊ី៕