មន្ទីរពេទ្យហ្លួងម៉ែថ្ងៃក្រោយនឹងក្លាយជាកន្លែងឯកទេសព្យាបាលជម្ងឺមហារីក
27-March-2024 / សុខភាពនិងកីឡា
ភ្នំពេញ៖សម្តេចតេជោ ហ៊ុន សែននាយករដ្ឋមន្ត្រីកម្ពុជា បានបញ្ជាឱ្យស្ថាប័នពាក់ព័ន្ធរៀបចំមន្ទីរពេទ្យ «ហ្លួងម៉ែ» ឱ្យទៅជាមន្ទីរឯកទេសផ្នែកជំងឺមហារីកដើម្បីធានាឱ្យផ្នែកជំងឺនេះមានទីតាំងព្យាបាលមួយជាក់លាក់នៅកម្ពុជា ដោយថា បច្ចុប្បន្ន អ្នកជំងឺមហារីកមានច្រើនណាស់ក្នុងប្រទេស។
ក្នុងជំនួបសំណេះសំណាលជាមួយកីឡាករ-កីឡាការិនី និងអត្តពលិក ចំនួន៥៦០នាក់ នៅព្រឹកថ្ងៃទី២៨ ខែមេសា មុនពេលពួកគេចេញទៅប្រកួតកីឡាស៊ីហ្គេម (SEA Game) លើកទី៣១ នៅប្រទេសវៀតណាមសម្តេចនាយករដ្ឋមន្ត្រី ថ្លែងថា កូនប្រសាស្រីរបស់លោកដែលជាវេជ្ជបណ្ឌិតផ្នែកសុខភាពសាធារណៈ ដែលជាភរិយារបស់លោក ហ៊ុន ម៉ាណែត បានលើកជាសំណួរមកកាន់លោកថា «មន្ទីរពេទ្យហ្លួងម៉ែ» គួរតែរៀបចំឱ្យក្លាយទៅជាមន្ទីរពេទ្យឯកទេសផ្នែកមហារីក ខណៈមន្ទីរពេទ្យនេះពុំមានអ្នកជំងឺកូវីដ-១៩ សម្រាកព្យាបាលទៀតឡើយ។សម្តេចតេជោគាំទ្រការលើកឡើងរបស់កូនប្រសារ ដោយថា បើមិនដូច្នេះទេ កម្ពុជានឹងមិនមានមន្ទីរពេទ្យឯកទេសផ្នែកមហារីកនេះនៅទីតាំងមួយជាក់លាក់ឡើយ។
លោកថា៖ «មន្ទីរពេទ្យហ្លួងម៉ែ! ថ្ងៃក្រោយ ខ្ញុំគិតថាអាចរៀបចំមន្ទីរពេទ្យនេះឱ្យទៅជាមន្ទីរពេទ្យឯកទេសផ្នែកមហារីកតែម្ដង។ នេះគឺថ្ងៃមុនកូនស្រីរបស់ខ្ញុំ កូនប្រសារបស់ខ្ញុំ គេជាបណ្ឌិតផ្នែកសុខភាពសាធារណៈ គេនាំកូនទៅបាយជាមួយនឹងឪពុកម្ដាយ។ គេសួរថា “ពុក! មន្ទីរពេទ្យហ្នឹងគួរតែរៀបចំឱ្យក្លាយទៅជាឯកទេសអីមួយ? ជាពិសេសគឺផ្នែកមហារីក”។ ខ្ញុំយល់ថាសមស្រប ថ្ងៃក្រោយអាចរៀបចំមន្ទីរពេទ្យហ្នឹងឱ្យទៅជាផ្នែកឯកទេសខាងមហារីកតែម្តង ដើម្បីធានា ព្រោះឥលូវមហារីក គឺមានច្រើនណាស់ៗ»។សម្តេចតេជោ ហ៊ុន សែន បានប្រាប់ឱ្យស្ថាប័នពាក់ព័ន្ធពិភាក្សាយ៉ាងណាផ្ទេរអ្នកជំងឺកូវីដ-១៩ ដែលកំពុងសម្រាកព្យាបាលទៅមន្ទីរពេទ្យចាក់អង្រែវិញ ដោយសារមន្ទីរពេទ្យហ្លួងម៉ែ គឺត្រៀមសម្រាប់រៀបចំទៅជាមន្ទីរពេទ្យឯកទេសផ្នែកមហារីក។ដោយឡែក លោកថា ទៅអនាគត សម្រាប់ជំងឺកូវីដ-១៩ និងសុខភាពសាធារណៈវិញ កម្ពុជានឹងមានមន្ទីរពេទ្យមួយទៀតត្រៀមបម្រុងរួចហើយ ដែលមានជាងមួយម៉ឺនគ្រែសម្រាប់ទទួលអ្នកជំងឺ។
សូមបញ្ជាក់ថាក្នុងពិធីសំណេះសំណាលនោះសម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានប្រកាសឧបត្ថម្ភប្រតិភូ និងកីឡាករ កីឡាការិនី ចូលរួមប្រកួតកីឡាស៊ីហ្គេម (SEA Game) លើកទី៣១ នៅប្រទេសវៀតណាម ចំនួន៥៦០នាក់ ក្នុងម្នាក់ៗ បានថវិកាចំនួន៥០០ដុល្លារអាមេរិក។សម្តេចតេជោ ហ៊ុន សែន ក៏បានណែនាំឲ្យរដ្ឋមន្ត្រីរដ្ឋលេខាធិការដ្ឋានអាកាសចរស៊ីវីលទាក់ទង ជាមួយក្រុមហ៊ុនហោះហើរ ដើម្បីយកយន្តហោះជាលក្ខណៈពិសេស សម្រាប់ដឹកប្រតិភូកីឡាករកម្ពុជា ទៅប្រទេសវៀតណាមតែម្ដង ជៀសវាងការរើសរុះ នាំឲ្យពិបាកដល់កីឡាករ-កីឡាករិនី ដែលត្រូវប្រកួត។
លោកបណ្ឌិត ថោង ខុន រដ្ឋមន្ត្រីក្រសួងទេចរណ៍ ប្រធានគណៈកម្មាធិការជាតិអូឡាំពិកកម្ពុជា និងជាប្រធានប្រតិភូកីឡាកម្ពុជា ចូលរួមប្រកួតកីឡា SEA Games លើកទី៣១ បានឲ្យដឹងថា ការប្រកួត SEA Games លើកទី៣១ នៅទីក្រុងហាណូយ ប្រទេសវៀតណាម បានរៀបចំប្រភេទកីឡាចំនួន៤០ប្រភេទ និង៥២៦វិញ្ញាសាប្រកួត។ប្រទេសដែលបានចុះឈ្មោះ ចូលរួមប្រកួតជាសមាជិកសហព័ន្ធកីឡាអាស៊ីអាគ្នេយ៍មានចំនួន ១១ប្រទេស រួមមាន៖ វៀតណាម, កម្ពុជា, ឡាវ, ប៊ុយណេ, ឥណ្ឌូណេស៊ី, ម៉ាឡេស៊ី, សិង្ហបុរី, ហ្វីលីពីន, ថៃ, មីយ៉ាន់ម៉ា និងទីម័រខាងកើត ដែលមានចំនួនកីឡាករ-កីឡាការិនីសរុប ៧១១៥នាក់ និងអ្នកស្ម័គ្រចិត្តបម្រើការងាររៀបចំប្រកួត ៣,០០០នាក់។ ចំពោះការស្នាក់នៅហូបចុក ម្ចាស់ផ្ទះរៀបចំនៅតាមសណ្ឋាគារ បែងចែកតាមប្រភេទកីឡា។
