វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 3578 នាក់
ម្សិលមិញ 3528 នាក់
សរុប 14189963 នាក់
អន្តរជាតិ៖ លោកស្រី អ៊ុងសាន ស៊ូជី អតីតមេដឹកនាំមីយ៉ាន់ម៉ា នៅថ្ងៃពុធទី២៧ ខែមេសា ឆ្នាំ២០២២នេះ ត្រូវតុលាការមួយនៅក្នុងប្រទេសមីយ៉ាន់ម៉ា ដែលគ្រប់គ្រងដោយយោធា បានសម្រេចកាត់ទោសឱ្យជាប់ពន្ធនាគាររយៈពេល ៥ឆ្នាំចំពោះការប្រព្រឹត្តអំពើពុករលួយ។
លោកស្រី ស៊ូជី ក្រោយរដ្ឋប្រហារយោធាកាលពីខែកុម្ភៈឆ្នាំមុន ហើយត្រូវបានទម្លាក់ចេញពីតំណែង និងជាប់ឃុំបានបដិសេធការចោទប្រកាន់ដែលថាលោកស្រីបានទទួលសំណូកជាមាសនិងប្រាក់រាប់សែនដុល្លារពីសហការីនយោបាយម្នាក់។ ចំណែកទោសអតិបរមាចំពោះបទល្មើសដូច្នេះត្រូវជាប់គុក១៥ឆ្នាំនិងពិន័យប្រាក់។ទោសជាប់ឃុំ៥ឆ្នាំបន្ថែមទៀតនេះ គឺគេចោទលោកស្រីពីបទប្រព្រឹត្តិអំពើពុករលួយ។ តុលាការរបបសិកភូមា បានចោទថាលោកស្រី បានទទួលប្រាក់សំណូកចំនួន ៦សែនដុល្លារ ព្រមទាំងមាសចំនួន១១គីឡូក្រាម ពីលោក Phyo Min Thein អតីតរដ្ឋមន្ត្រីទទួលបន្ទុកតំបន់រ៉ង់ហ្គូន។ លោក Phyo Min Thein បានឡើងទៅសារភាពនៅចំពោះមុខតុលាការ ថាខ្លួនពិតជាបានសូកលោកស្រីអ៊ុងសាន ស៊ូជីមែន។យោងតាមលោក Zaw Min Tun អ្នកនាំពាក្យរបបសិកភូមា គឺលោកស្រីអ៊ុងសាន ស៊ូជី នឹងត្រូវគេដាក់កំហិត ឲ្យឃុំខ្លួននៅក្នុងគេហដ្ឋាន។
ប្រភពដដែលនេះបញ្ជាក់ថា មិនដឹងថាលោកស្រីអ៊ុងសាន ស៊ូជី នឹងដាក់ពាក្យប្តឹងទាស់ទៅកាន់សាលាឧទ្ធរណ៍ ឬក៏អត់នោះទេ។អ្នកគាំទ្រលោកស្រី ស៊ូជី រួមទាំងអ្នកជំនាញការច្បាប់ឯករាជ្យបានថ្កោលទោសការកាត់ទោសនេះថា៖ មិនត្រឹមត្រូវនិងត្រូវបានរៀបចំឡើងដើម្បីដកស្ត្រីវ័យ៧៦ឆ្នាំរូបនេះចេញពីនយោបាយ។ព័ត៌មានអំពីការកាត់ទោសនេះត្រូវបានទម្លាយចេញមកពីមន្ត្រីច្បាប់ម្នាក់ដែលសុំមិនបញ្ចេញអត្តសញ្ញាណដោយសារលោកមិនបានការអនុញ្ញាតឱ្យបញ្ចេញព័ត៌មានដូច្នេះ។សវនាការលើលោកស្រីស៊ូជីត្រូវបានធ្វើឡើងនៅទីក្រុងណៃពីដោរដោយមិនអនុញ្ញាតឱ្យសាធារណជនឬអ្នកកាសែតចូលស្តាប់ទេ។
អតីតមេដឹកនាំមីយ៉ាន់ម៉ាវ័យ៧៦ឆ្នាំរូបនេះ ត្រូវបានកាត់ទោសឱ្យជាប់គុក៦ឆ្នាំរួចជាស្រេចហើយចំពោះការចោទប្រកាន់ផ្សេងៗ រួមមានការញុះញង់ រំលោភច្បាប់កូវីដ-១៩ និងនាំចូលវិទ្យុទាក់ទងខុសច្បាប់ ជាការចោទប្រកាន់ដែលពួកអ្នកសង្កេតការណ៍និយាយថាត្រូវបានរៀបចំឡើងដើម្បីឱ្យអ្នកនយោបាយជើងចាស់រូបនេះចេញពីឆាកនយោបាយ។គួររំលឹកថា រដ្ឋប្រហារយោធានៅថ្ងៃទី១កុម្ភៈឆ្នាំ២០២១ បានរុញច្រានភូមាឲ្យធ្លាក់ចូលក្នុងភាពវឹកវរនយោបាយ រួមជាមួយវិបត្តិសេដ្ឋកិច្ចដ៏ធ្ងន់ធ្ងរ។ ប្រជាជនស៊ីវីលប្រមាណ១៨០០នាក់ ត្រូវបានសម្លាប់នៅក្នុងហេតុការណ៍បង្ក្រាបបាតុកម្ម។ បន្ថែមពីនេះ យោងតាមអង្គការសិទ្ធិមនុស្ស មានមនុស្សប្រមាណ១៣០០០នាក់ កំពុុងជាប់ឃុំ។
ក្រៅពីក្រៅពីលោកខាងលិចពិសេសប្រទេសអាមេរិកប្លុកប្រទេសអាស៊ានក៏មិនគាំទ្រសកម្មភាពរបបយោធាភូមាទេតែសម្រាប់ចិននៅក្នុងសេចក្តីថ្លែងការណ៍មួយរបស់រដ្ឋាភិបាលចិនកាលពីពេលកន្លងមកថ្មីៗនេះបានបង្ហាញពីការគាំទ្រយ៉ាងខ្លាំងចំពោះរដ្ឋាភិបាលយោធាមីយ៉ាន់ម៉ា បើទោះជាស្ថិតក្នុងស្ថានការណ៍ប្រែប្រួលយ៉ាងណាក៏ដោយ ។យោងតាមទីភ្នាក់ងារសារព័ត៌មានរដ្ឋចិន Xinhua បានរាយការណ៍ថា រដ្ឋមន្ត្រីការបរទេសចិន លោក វាង យី បានប្រាប់រដ្ឋមន្ត្រីការបរទេសមីយ៉ាន់ម៉ា លោក វណ្ណា មឿងល្វីន ថា ចិននៅតែផ្តល់ឲ្យមីយ៉ាន់ម៉ាក្នុងតួនាទីសំខាន់ក្នុងការទូតប្រទេសជិតខាងជានិច្ច និងចង់ពង្រឹងការផ្លាស់ប្តូរ និងកិច្ចសហប្រតិបត្តិការឲ្យកាន់តែស៊ីជម្រៅថែមទៀត ។លោក វាង យី បានថ្លែងថា ភាគីទាំងពីរគួរតែបង្កើនល្បឿនពាក់ព័ន្ធនឹងច្រករបៀងសេដ្ឋកិច្ចចិន-មីយ៉ាន់ម៉ា ពន្លឿនការសាងសង់គម្រោងសំខាន់ៗ និងពង្រឹងកិច្ចសហប្រតិបត្តិការ ដើម្បីប្រយុទ្ធប្រឆាំងនឹងការឆ្លងរាលដាលនៃជំងឺកូវីដ ១៩ ។
លោក វាង យី បន្តថា៖ “មិនថាស្ថានការណ៍ប្រែប្រួលយ៉ាងណានោះទេ ចិននឹងនៅតែបន្តគាំទ្រមីយ៉ាន់ម៉ាក្នុងការការពារអធិបតេយ្យភាព ឯករាជ្យ និងបូរណភាពទឹកដីរបស់ខ្លួន និងស្វែងរកផ្លូវអភិវឌ្ឍន៍ដែលសមស្របនឹងលក្ខខណ្ឌរបស់ប្រទេស។ ប្រទេសចិនបានត្រៀមខ្លួនរួចជាស្រេចក្នុងការធ្វើការជាមួយមីយ៉ាន់ម៉ា ដើម្បីពង្រឹងការផ្លាស់ប្តូរ និងកិច្ចសហប្រតិបត្តិការលើគ្រប់វិស័យ ដើម្បីសម្រេចបាននូវគោលដៅនៃការកសាងសហគមន៍ចិន-មីយ៉ាន់ម៉ាដែលមានអនាគតរួមគ្នា” ។
ចំណែកមីយ៉ាន់ម៉ា លោក វណ្ណា មឿងល្វីន បាននិយាយថា “មីយ៉ាន់ម៉ាគាំទ្រយ៉ាងពេញទំហឹងចំពោះគោលជំហររបស់ចិន លើបញ្ហាដែលទាក់ទងនឹងផលប្រយោជន៍ស្នូលរបស់ខ្លួន និងថ្លែងអំណរគុណដល់ប្រទេសចិនសម្រាប់ការគាំទ្រដ៏ធំធេងមហាសាលចំពោះការអភិវឌ្ឍរបស់មីយ៉ាន់ម៉ា និងការប្រយុទ្ធប្រឆាំងនឹងជំងឺរាតត្បាតកូវីដ-១៩ ។មីយ៉ាន់ម៉ារីករាយនឹងពង្រីកកិច្ចសហប្រតិបត្តិការសេដ្ឋកិច្ច និងពាណិជ្ជកម្មជាមួយចិន ពន្លឿនការសាងសង់ច្រករបៀងសេដ្ឋកិច្ច និងជំរុញឲ្យមានលទ្ធផលជាក់ស្តែងបន្ថែមទៀតនៅក្នុងក្របខ័ណ្ឌនៃគម្រោងខ្សែក្រវ៉ាត់ និងផ្លូវ” ៕