ណាហ្វតាលី បិនណេត នាយករដ្ឋមន្ត្រីថ្មីរបស់អ៊ីស្រាអែលមកពីណា?
26-March-2024 / ព័ត៌មានអន្តរជាតិ
ប្រទេសអ៊ីស្រាអែល ៖ លោក ណាហ្វតាលី បិនណេតអាយុ ៤៩ ឆ្នាំ បានស្បថចូលកាន់តំណែងនាយករដ្ឋមន្ត្រីថ្មីរបស់អ៊ីស្រាអែលកាលពីថ្ងៃអាទិត្យទី១៣មិថុនា ជំនួសលោកបេនយ៉ាមីន ណេតាន់យ៉ាហ៊ូអាយុ៧៣ឆ្នាំដែលកាន់អំណាចជានាយករដ្ឋមន្ត្រីអស់១២ឆ្នាំ។
សភាអ៊ីស្រាអែលនៅថ្ងៃទី១៣ ខែមិថុនាបានអនុម័តរដ្ឋាភិបាលចម្រុះថ្មីមួយដែលដឹកនាំដោយមេដឹកនាំគណបក្សគឺលោក ណាហ្វតាលី បិនណេត(Yamina Naftali Bennett)បន្ទាប់ពីការបោះឆ្នោតមួយដែលមានសំឡេងគាំទ្រ៦០សំឡេងនិង៥៩សំឡេងប្រឆាំង។ថ្លែងទៅកាន់សភាលោក បិនណេត(Bennett)បានទទូចថារដ្ឋាភិបាលចម្រុះរបស់លោក«តំណាងឲ្យអ៊ីស្រាអែលទាំងអស់»។លោកបាននិយាយថាបន្ទាប់ពីការបោះឆ្នោតចំនួន៤ក្នុងរយៈពេលតិចជាងពីរឆ្នាំអ៊ីស្រាអែលបានធ្លាក់ចូលក្នុង“ភ្លើងនៃការស្អប់និងការប្រយុទ្ធ” ។
នៅរដ្ឋធានីTel Aviv ប្រជាជនរាប់ពាន់នាក់បានធ្វើដំណើរតាមដងផ្លូវដើម្បីអបអរលទ្ធផលនៃការបោះឆ្នោតសភា។ អ្នកស្រុក ErezBiezunerបាននិយាយនៅទីលានRabinSquareថា”ខ្ញុំមកទីនេះដើម្បីបញ្ចប់យុគសម័យមួយនៅអ៊ីស្រាអែល។យើងចង់ឲ្យពួកគេទទួលបានជោគជ័យនិងបង្រួបបង្រួមគ្នា”។
លោកប៊ិនណេតគឺជាជនជាតិជ្វីហ្វកាន់សាសនាអក់ហ្សូដក់ម្នាក់ ដែលរកលុយបានរាប់លាននៅក្នុងវិស័យបច្ចេកវិជ្ជាជាន់ខ្ពស់ ។ជាអ្នកគាំទ្រចលនាការតាំងទីលំនៅជនជាតិជ្វីហ្វ ដែលរស់នៅជាយក្រុងតែលអាល់វីវ និងជាអតីតសម្ពន្ធមិត្តរបស់ ណេតាន់យ៉ាហ៊ូ ដែលចាប់ដៃគូជាមួយគណបក្សកណ្តាលនិងឆ្វេងនិយមដើម្បីបញ្ចប់ការគ្រប់គ្រង ១២ ឆ្នាំរបស់គាត់។
គណបក្សយ៉ាមីណារបស់លោក ណាហ្វតាលី បិនណេតឈ្នះត្រឹមតែប្រាំពីរអាសនៈនៅក្នុងការបោះឆ្នោតសភា ដែលមាន ១២០ អាសនៈនៅក្នុងការបោះឆ្នោតខែមីនា ដែលជាការបោះឆ្នោតលើកទីបួនក្នុងរយៈពេលពីរឆ្នាំ។ ប៉ុន្តែដោយបដិសេធមិនផ្កាប់មុខជាមួយលោកណេតាន់យ៉ាហ៊ូឬគូប្រជែងរបស់លោក លោកបិនណេតបានរក្សាជំហរខ្លួនឯងជាស្តេចទោះមានសមាជិកម្នាក់នៃគណបក្សជាតិនិយមរបស់គាត់បានបោះបង់ចោលគាត់ដើម្បីតវ៉ានឹងកិច្ចព្រមព្រៀងបង្កើតរដ្ឋាភិបាលចម្រុះថ្មី ក៏ដោយ។ ប៉ុន្តែលោកនឹងត្រូវជួបឧបសគ្គយ៉ាងធ្ងន់ធ្ងរក្នុងរដ្ឋាភិបាលចម្រុះ៨គណបក្ស ដែលមានសំឡេងភាគច្រើនលើសបន្តិចបន្តួចប៉ុណ្ណោះនៅក្នុងសភា និង រួមបញ្ចូលទាំងគណបក្សមកពីស្តាំ ឆ្វេង និង កណ្ដាល។
លោកបិនណេតបានបម្រើការជាប្រធានក្រុមប្រឹក្សាអ្នកតាំងទីលំនៅនៅតំបន់វេសប៊ែងឈ្មោះថាក្រុមប្រឹក្សា Yesha មុនពេលចូលទៅសភាក្នុងឆ្នាំ ២០១៣។ក្រោយមកលោកបិនណេតបានបម្រើការជារដ្ឋមន្ត្រីខុទ្ទកាល័យនៃក្រសួងការបរទេសក្រសួងអប់រំនិងក្រសួងការពារជាតិនៅក្នុងរដ្ឋាភិបាលដែលដឹកនាំដោយលោកណេតាន់យ៉ាហ៊ូ។លោក យូហាណាន ប្លេស្ន័រ ជាប្រធានវិទ្យាស្ថានប្រជាធិបតេយ្យអ៊ីស្រាអែល ដែលស្គាល់លោកបិនណេតរាប់ទសវត្សរ៍និងបានបម្រើការជាមួយគាត់នៅក្នុងយោធា បាននិយាយថា “គាត់ជាមេដឹកនាំស្តាំនិយម ជាអ្នកការពារសន្តិសុខក្បាលរឹងម្នាក់ ប៉ុន្តែក៏ជាអ្នកយល់ពីហេតុផលដែរ”។
លោករំពឹងថា លោកបិនណេតនឹងចូលរួមពាក់ព័ន្ធជាមួយនឹងបក្ខពួកផ្សេងៗជាច្រើនដើម្បីស្វែងរក “ភាគបែងតែមួយ” ខណៈលោកស្វះស្វែងរកការគាំទ្រនិងភាពស្របច្បាប់ក្នុងនាមជាមេដឹកនាំជាតិ។លោកបិនណេតបានបម្រើការជានាយសេនាធិការរបស់លោកណេតាន់យ៉ាហ៊ូរយៈពេល ២ ឆ្នាំប៉ុន្តែពួកគេបានចែកផ្លូវគ្នា បន្ទាប់ពីជម្លោះអាថ៍កំបាំងមួយ ដែលប្រព័ន្ធផ្សព្វផ្សាយអ៊ីស្រាអែលបានផ្សារភ្ជាប់ទៅនឹងភរិយារបស់លោកណេតាន់យ៉ាហ៊ូគឺលោកស្រីសារ៉ា ដែលមានឥទ្ធិពលយ៉ាងខ្លាំងលើរង្វង់ផ្ទៃខាងក្នុងរបស់ស្វាមីលោកស្រី។
លោកបិនណេតបានធ្វើយុទ្ធនាការបោះឆ្នោតក្នុងនាមជាអ្នកស្ដាំនិយមនៅមុនការបោះឆ្នោតខែមីនានិងបានចុះហត្ថលេខាលើកិច្ចសន្យានៅលើកញ្ចក់ទូរទស្សន៍ជាតិដោយនិយយថាគាត់នឹងមិនអនុញ្ញាតឱ្យលោកយែរ ឡាភីដ ដែលជាគូប្រជែងកណ្ដាលនិយម និង លោកណេតាន់យ៉ាហ៊ូ ក្លាយជានាយករដ្ឋមន្ត្រីនោះឡើយ។ប៉ុន្តែនៅពេលដឹងច្បាស់ថាលោកណេតាន់យ៉ាហ៊ូមិនអាចបង្កើតរដ្ឋាភិបាលចម្រុះកាន់អំណាចបាន លោកបិនណេតបានយល់ព្រមធ្វើជានាយករដ្ឋមន្ត្រីពីរឆ្នាំ មុនពេលប្រគល់អំណាចឱ្យទៅលោកឡាភីដ ដែលជាស្ថាបនិកនៃរដ្ឋាភិបាលចម្រុះថ្មីដែលមាន៨គណបក្សនេះ។
អ្នកគាំទ្ររបស់លោកណេតាន់យ៉ាហ៊ូបានចាត់ទុកលោកបិនណេតជាជនក្បត់ ដោយនិយាយថា លោកបានបោកប្រាស់អ្នកបោះឆ្នោត។ លោកបិនណេតបានការពារការសម្រេចចិត្តរបស់គាត់ថាជាសកម្មភាពថ្លឹងថ្លែងជាក់ស្តែងក្នុងគោលបំណងបង្រួបបង្រួមប្រទេសនិងបញ្ចៀសការបោះឆ្នោតលើកទីប្រាំ៕
