សម្តេចហ៊ុនសែនពន្យល់ពីកម្ពុជាគាំទ្រសេចក្តីសំរេចអង្គការសហប្រជាជាតិរឿងរុស្ស៊ីនិងអ៊ុយក្រែន!
ភ្នំពេញ៖ «យើងជារដ្ឋអធិបតេយ្យ យើងមានសិទ្ធិនឹងធ្វើសកម្មភាព ដើម្បីការពារសច្ចៈធម៌ ហើយយើង ក៏ត្រូវមានការទទួលខុសត្រូវក្នុងឋានៈជាសមាជិកអង្គការសហប្រជាជាតិផងដែរ»។ នេះបើយោងតាមសារសម្តេចតេជោនាយករដ្ឋមន្ត្រី កាលពីយប់ថ្ងៃទី ២ ខែមីនា ឆ្នាំ២០២២ ផ្ញើជូនថ្នាក់ដឹកនាំក្នុង គណបក្ស រដ្ឋាភិបាលដែលកាសែតទទួលបាន ។
សម្តេចតេជោ ហ៊ុន សែនតាមរយៈសារផ្សាយដោយហ្វេសប៊ុកអង្គភាពអ្នកនាំពាក្យរាជរដ្ឋាភិបាល ថា «ដោយសារតែសភាពការណ៍នៅអ៊ុយក្រែនកាន់តែធ្ងន់ធ្ងរ ការស្លាប់ជនស៊ីវិលកាន់តែច្រើន ហើយមហាសន្និបាតអង្គការសហប្រជាជាតិកំពុងតែដំណើរការ។ ខ្ញុំគិតថា យើងមានការចាំបាច់ដើម្បីបញ្ចេញនូវសកម្មភាពក្នុងក្របខណ្ឌអាស៊ានផង ក្នុងក្របខណ្ឌជាកម្ពុជាខ្លួនឯង ។
ក្នុងក្របខណ្ឌអាស៊ាន គឺយើងកំពុងតែពិភាក្សាជាមួយសមាជិកអាស៊ានដទៃទៀតដើម្បីនឹងចេញសេចក្តីថ្លែងការណ៍អំពាវនាវឱ្យមានការឈប់បាញ់ ព្រោះបើមិនមានការឈប់បាញ់ទេ ជីវិតមនុស្ស ទ្រព្យសម្បត្តិ នឹងត្រូវបន្តស្លាប់ និងបំផ្លិចបំផ្លាញ ហើយធ្វើឱ្យការចរចានោះមិនអាចឈានទៅមុខបាន ដូច្នេះយើងត្រូវតែសំរេចដើម្បីនឹងធ្វើការអំពាវនាវឱ្យមានបទឈប់បាញ់មួយ ដែលនេះជាការចង់បាន សម្រាប់ការចរចាមួយ ក្នុងការរកដំណោះស្រាយ ក្នុងនាមអាស៊ាន។
សូមបញ្ជាក់ថាកាលពីយប់ថ្ងៃទី២ ខែមីនា ឆ្នាំ២០២២ កម្ពុជាបានចូលរួមជាមួយប្រទេស១៤០ផ្សេងទៀតបោះឆ្នោតគាំទ្រដំណោះស្រាយមហាសន្និបាតរបស់អង្គការសហប្រជាជាតិទាមទារឱ្យរុស្ស៊ី «ដកទ័ពចេញជាបន្ទាន់ទាំងស្រុង និងដោយគ្មានលក្ខខណ្ឌចេញពីទឹកដីអ៊ុយក្រែន ក្នុងព្រំដែនដែលទទួលស្គាល់ជាអន្តរជាតិ»។ជាការកត់សម្គាល់មានប្រទេសតែ ៥ប៉ុណ្ណោះ ដែលបោះឆ្នោតប្រឆាំងនឹងសេចក្តីសម្រេចចិត្តនេះ គឺ រុស្ស៊ី បេឡារុស ស៊ីរី កូរ៉េខាងជើង និងអេរីត្រេ។ ចំណែកឯ ៣៥ប្រទេសទៀត បានបោះឆ្នោតអនុប្បវាទ ក្នុងនោះ ក៏មានដូចជា ចិន វៀតណាម ឡាវ គុយបា ឥណ្ឌា ប៉ាគីស្ថាន បង់ក្លាដេស និងប្រទេសនៅទ្វីពអាហ្វ្រិកមួយចំនួនទៀតជាដើម។ ដោយឡែក សិង្ហបុរី ជាប្រទេស Co-Sponsors មួយក្នុងចំណោម ៩៤ប្រទេស ដែលរួមមានកម្ពុជាផងដែរ បានផ្តើមគំនិតឲ្យមានការចេញសេចក្តីថ្លែងការណ៍ថ្កោលទោសលើការឈ្លានពានអ៊ុយក្រែន ពីសំណាក់រុស្ស៊ី។
ទាក់ទងបញ្ហានេះ សម្តេចតេជោសង្ឃឹមថា មិត្តរុស្ស៊ីរបស់យើងនឹងយល់ ព្រោះអ្វីដែលបានធ្វើក្នុងរយៈពេលកន្លងទៅ គឺកម្ពុជាយើងផ្ទុយនឹងគោលការណ៍របស់កម្ពុជាយើងលើនយោបាយការបរទេស ក្នុងនោះ គឺយើងមិនគាំទ្រឱ្យមានការបំបែករដ្ឋ នេះជាចំណុចទី ១។ ឯចំណុចទី ២ គឺយើងមិនគាំទ្រទៅលើការប្រើប្រាស់កំលាំង និងការត្រៀមដើម្បីប្រើប្រាស់កំលាំង ឬគំរាមកំហែងនូវការប្រើប្រាស់កំលាំង ដូច្នេះពិតណាស់ថា រុស្ស៊ីនឹងមានការខឹងសម្បារចំពោះយើង ក៏ប៉ុន្តែយើងជារដ្ឋអធិបតេយ្យ យើងមានសិទ្ធិនឹងធ្វើសកម្មភាព ដើម្បីការពារសច្ចៈធម៌ ហើយយើង ក៏ត្រូវមានការទទួលខុសត្រូវក្នុងឋានៈជាសមាជិកអង្គការសហប្រជាជាតិផងដែរ។ក្នុងឱកាសនេះ សម្តេចតេជោ ហ៊ុន សែន ក៏បានលើកឡើងថា «សូមថ្នាក់ដឹកនាំរបស់យើងយោគយល់ចំពោះសភាពការណ៍ដែលកំពុងតែវិវត្តន៍ដ៏ស្មុគស្មាញនេះ»។
រដ្ឋមន្ត្រីការបរទេសអាស៊ាន នៅថ្ងៃទី៣ ខែមីនា ឆ្នាំ២០២២នេះ ក៏បានចេញសេចក្តីថ្លែងការណ៍ ដោយអំពាវនាវឱ្យមានបទឈប់បាញ់នៅអ៊ុយក្រែន និងមានការព្រួយបារម្មណ៍យ៉ាងខ្លាំងចំពោះស្ថានការណ៍ដែលកាន់តែធ្ងន់ធ្ងរ និងស្ថានភាពមនុស្សធម៌ដែលធ្លាក់ចុះកាន់តែដុនដាបនៅពេលនេះ។ រដ្ឋមន្ត្រីការបរទេសអាស៊ាន មានការព្រួយបារម្មណ៍យ៉ាងខ្លាំងចំពោះស្ថានការណ៍ដែលកាន់តែធ្ងន់ធ្ងរ និងស្ថានភាពមនុស្សធម៌ដែលធ្លាក់ចុះកាន់តែដុនដាប ដែលបណ្តាលមកពីអរិភាពយោធាដែលកំពុងបន្តនៅក្នុងប្រទេសអ៊ុយក្រែន។
ដូច្នេះហើយ ក៏បានអំពាវនាវឱ្យមានបទឈប់បាញ់ជាបន្ទាន់ ឬកិច្ចព្រមព្រៀងឈប់បាញ់ និងការបន្តការសន្ទនានយោបាយដែលនឹងនាំទៅរកសន្តិភាពប្រកបដោយចីរភាពនៅអ៊ុយក្រែន។នាសៀសថ្ងៃទីទី៣ ខែមីនា ស្ថានទូតបារាំងបានបង្ហោះលើហ្វេសបុករបស់ខ្លួនកោតសរសើរការសម្រេចចិត្តរបស់ប្រទេសកម្ពុជាក្នុងការចូលរួមជាមួយសមាជិកអង្គការសហប្រជាជាតិចំនួន១៤០ប្រទេសផ្សេងទៀត ដើម្បីសម្តែងសាមគ្គីភាពជាមួយប្រទេសអ៊ុយក្រែន ដែលរងគ្រោះពីការវាយប្រហារពីយោធារុស្ស៊ី។
