វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5761 នាក់
ម្សិលមិញ 5020 នាក់
សរុប 14121208 នាក់
ប្រទេសថៃ៖នាយករដ្ឋមន្ត្រីថៃលោកប្រាយុទ្ធចាន់អូចាបានស្នើលុបចោលរាល់ការត្រួតពិនិត្យសុខាភិបាល ដល់អ្នកទេសចរ បានចាក់វ៉ាក់សាំងគ្រប់គ្រាន់ចូលក្នុងទឹកដីថៃតាមដែនអាកាស។ប្រទេសថៃនឹងលើកលែងការធ្វើចត្តាឡីស័ក ចំពោះអ្នកដំណើរដែលបានចាក់វ៉ាក់សាំងបង្ការ COVID-19 ពេញលេញ មកពីប្រទេសដែលមានហានិភ័យទាប ចាប់ពីថ្ងៃទី០១ ខែវិច្ឆិកា ឆ្នាំ២០២១ ខាងមុខនេះតទៅ។
ព័ត៌មានខាងលើនេះត្រូវបានប្រកាសចេញ ដោយនាយករដ្ឋមន្ត្រីថៃលោក ប្រាយុទ្ធ ចាន់អូចា ក្នុងឱកាសថ្លែងសារទៅកាន់ប្រជាជាតិ កាលពីថ្ងៃចន្ទទី១១តុលា។ លោក ប្រាយុទ្ធ «ថ្ងៃនេះ, ខ្ញុំបានចេញបទបញ្ជាឲ្យ មជ្ឈមណ្ឌលគ្រប់គ្រងជំងឺ COVID-19 (CCSA) និងក្រសួងសុខាភិបាលសាធារណៈ រួមសហការគ្នាដើម្បីពិគ្រោះយោបល់ នៅក្នុងសប្តាហ៍នេះតែម្តង។ ចាប់ពីថ្ងៃទី០១ ខែវិច្ឆិកា ខាងមុខនេះតទៅ, ប្រទេសថៃនឹងចាប់ផ្តើមបើកទ្វារ ដោយគ្មានតម្រូវការឲ្យធ្វើចត្តាឡីស័ក សម្រាប់អ្នកដែលបានចាក់វ៉ាក់សាំងពេញលេញ និងធ្វើដំណើរមកកាន់ប្រទេសថៃតាមផ្លូវអាកាស ពីបណ្តាប្រទេសដែលត្រូវចាត់ទុកថា មានហានិភ័យទាប»។
បើតាមលោកនាយករដ្ឋមន្ត្រីថៃ យ៉ាងហោចណាស់ប្រទេសចំនួន ១០ ហើយ ត្រូវបានកត់ឈ្មោះចូលក្នុងបញ្ជី នៃក្រុមប្រទេសមានហានិភ័យទាបសម្រាប់ថៃ ក្នុងនោះមានដូចជា ចិន, អាល្លឺម៉ង់, សិង្ហបុរី, ចក្រភពអង់គ្លេស និងសហរដ្ឋអាមេរិកជាដើម។ សម្រាប់ប្រទេសមួយចំនួនទៀត នឹងត្រូវកត់ឈ្មោះចូលក្នុងបញ្ជីខាងលើនេះ រហូតដល់ថ្ងៃទី០១ ខែធ្នូ ឆ្នាំ២០២១ខាងមុខ។ ដោយឡែកសម្រាប់អ្នកដំណើរ មកពីបណ្តាប្រទេសដែលគ្មានក្នុងបញ្ជី គឺនឹងត្រូវអនុវត្តវិធានការចត្តាឡីស័កដដែល ពេលមកដល់ទឹកដីថៃ។
លោក ប្រាយុទ្ធ ចាន់អូចា ក៏បានទទួលស្គាល់ផងដែរថា ការសម្រេចចិត្តរបស់លោកបែបនេះ គឺស្ថិតនៅចំពោះមុខហានិភ័យជាច្រើន ប៉ុន្តែនេះក៏ជាពេលវេលាមួយ ដែលគ្រប់គ្នាត្រូវចាប់ផ្តើមបន្ធូរអារម្មណ៍ពីបញ្ហាផ្សេងៗ។ លោក ប្រាយុទ្ធ ថា នឹងតាមដានស្ថានការណ៍ខាងមុខនេះយ៉ាងដិតដល់ ហើយនឹងចាត់វិធានការភ្លាមៗ នៅពេលមានរឿងអ្វីកើតឡើង។
សូមជម្រាបថា ប្រទេសថៃបានកត់ត្រាការឆ្លងកូវីដ១៩ប្រចាំថ្ងៃច្រើនជាង ១ម៉ឺនករណី ចាប់តាំងពីខែកក្កដា។ គិតមកដល់ពេលនេះ ថៃមានអ្នកឆ្លងកូវីដ១៩ សរុប ១,៧៣០,៣៦៤នាក់ ស្លាប់ ១៧,៨៣៥នាក់ និងជាសះស្បើយ ១,៦០៤,៣៥៥នាក់៕