វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5860 នាក់
ម្សិលមិញ 5378 នាក់
សរុប 14085153 នាក់
តៃវ៉ាន់៖ ក្រសួងការបរទេសរដ្ឋអាមេរិក បានយល់ព្រមលើការលក់ប្រព័ន្ធអាវុធចំនួន ៣ ប្រភេទទៅឱ្យកោះតៃវ៉ាន់រួមមាន ឧបករណ៍ចាប់សញ្ញាកាំជ្រួចមីស៊ីល និងកាំភ្លើងធំ មានតម្លៃសរុប ១,៨ ពាន់លានដុល្លារអាមេរិក ។នេះបើតាមទីភ្នាក់ងារសារព័ត៌មានរ៉យទ័របានរាយការណ៍កាលពីសប្តាហ៍។
សេតវិមានកំពុងតែឈានទៅមុខ ជាមួយការលក់ឧបករណ៍យោធាទំនើបៗ ចំនួន ៥ ដាច់ដោយឡែកពីគ្នាទៅកាន់កោះតៃវ៉ាន់ ដែលមានតម្លៃសរុបប្រមាណ ៥ពាន់លានដុល្លារអាមេរិក ។សេចក្តីថ្លែងការណ៍ពីក្រសួងការបរទេសបាននិយាយថា មីស៊ីល SLAM-ER នឹងជួយកោះតៃវ៉ាន់ “ឆ្លើយតបនឹងការគំរាមកំហែងនាពេលបច្ចុប្បន្ន និងអនាគតនៅពេលមីស៊ីលអាចមានសមត្ថភាព វាយប្រហារទាំងយប់ទាំងថ្ងៃបាននិងកំណត់ជាក់លាក់ប្រឆាំងទាំងគោលដៅ និងទីតាំង» នៅលើផ្ទៃផែនដីឬមហាសមុទ្រ ។
ក្រសួងការពារជាតិតៃវ៉ាន់បាននិយាយថា “ការលក់អាវុធនេះបង្ហាញថា អាមេរិកយកចិត្តទុកដាក់យ៉ាងខ្លាំងចំពោះទីតាំងយុទ្ធសាស្ត្ររបស់តំបន់ឥណ្ឌូ-ប៉ាស៊ីហ្វិក និងច្រកសមុទ្រតៃវ៉ាន់ហើយកំពុងជួយដល់ប្រទេសរបស់យើងក្នុងការពង្រឹងសមត្ថភាពការពារជាតិ” ។ប្រទេសចិនដែលចាត់ទុកកោះតៃវ៉ាន់ជាខេត្តរបស់ខ្លួន បានបង្កើនសម្ពាធឆ្ពោះទៅកោះនេះក្នុងឆ្នាំកន្លងមក ដោយបានបញ្ជូនយន្តហោះប្រយុទ្ធ និងយន្តហោះឃ្លាំមើលទៅក្នុងដែនអាកាសនិងកប៉ាល់នៅក្បែរដែនទឹករបស់កោះតៃវ៉ាន់ ។ ក្រសួងការពារជាតិ និងក្រសួងការបរទេសតៃវ៉ាន់បានស្វាគមន៍ចំពោះព័ត៌មាននេះដោយនិយាយថា អាវុធនឹងជួយបង្កើនសមត្ថភាពការពារ ។
ស្ថានទូតចិនមិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ ប៉ុន្តែក្រសួងការបរទេសចិន បាននិយាយកាលពីសប្តាហ៍មុនថា ការលក់អាវុធរបស់អាមេរិកទៅកោះតៃវ៉ាន់ បានធ្វើឱ្យខូចខាតដល់អធិបតេយ្យភាព និងផលប្រយោជន៍សន្តិសុខរបស់ចិនយ៉ាងធ្ងន់ធ្ងរ ។កាលពីសប្តាហ៍មុនទីប្រឹក្សាសន្តិសុខជាតិអាមេរិក លោក Robert O’Brien បាននិយាយថា គ្រាដែលចិនប្រហែលជាមិនទាន់ត្រៀមខ្លួនសម្រាប់ការវាយលុក នៅពេលនេះកោះតៃវ៉ាន់ត្រូវការ “ពង្រឹងខ្លួន” ប្រឆាំងនឹងការវាយប្រហារនាពេលអនាគតឬការប៉ុនប៉ង ធ្វើឲ្យឯកោតាមរយៈវិធានការ មិនមែនយោធា ដូចជាការដាក់ទណ្ឌកម្ម ។
ការជូនដំណឹងជាផ្លូវការស្តីពីការលក់អាវុធនេះផ្តល់ឱ្យសភាអាមេរិក រយៈពេល ៣០ ថ្ងៃដើម្បីជំទាស់ចំពោះការលក់ណាមួយ ប៉ុន្តែបញ្ហានេះទំនងជាមិនមានការគាំទ្រពីគណបក្សទាំងពីរក្នុងសភាជាន់ទាប សម្រាប់ការពារកោះតៃវ៉ាន់ឡើយ ។ ការសម្រេចចិត្តយល់ព្រមលក់អាវុធឱ្យកោះតៃវ៉ាន់ ដោយក្រសួងការបរទេសអាមេរិក កើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីមានសេចក្ដីរាយការណ៍ថា ចិនបានផ្លាស់ប្ដូរប្រព័ន្ធមីស៊ីលស៊េរីចាស់ៗរបស់ខ្លួន ដោយដំឡើងមីស៊ីលស៊េរីថ្មីៗ ដែលមានសមត្ថភាពហោះហើរលឿនជាងសំឡេងនៅតាមតំបន់ឆ្នេរភាគអាគ្នេយ៍ ហើយតម្រង់ក្បាលទៅរកកោះតៃវ៉ាន់ជាស្រេច។ ចិនជារឿយៗតែងតែចាត់ទុកថា ការលក់អាវុធ ឬការគាំទ្រផ្នែកយោធាពីទីក្រុងវ៉ាស៊ីនតោន គឺជាការលើកទឹកចិត្តឱ្យកោះតៃវ៉ាន់ប្រកាសឯករាជ្យ និងផ្ដាច់ខ្លូនចេញពីចិនដីគោក ៕