អនុប្រធានាធិបតីអាមេរិកវាប្រហារចិននិងអះអាងពីការសាមគ្គីជាមួយប្រទេសក្នុងតំបន់
27-March-2024 / ព័ត៌មានអន្តរជាតិ
សិង្ហបុរី៖អនុប្រធានាធិបតីអាមេរិក លោកស្រី ខាម៉ាឡា ហារីស (Kamala Harris) កាលពីថ្ងៃចន្ទទី២៣សីហា បាននិយាយវាយប្រហារប្រទេសចិន នៅក្នុងការថ្លែងសុន្ទរកថាដែលបានធ្វើឡើងនៅឯប្រទេសសិង្ហបុរីក្នុងដំណើរទស្សនកិច្ចលើកដំបូងនៅតំបន់អាស៊ីអាគ្នេយ៍។
លោកស្រីបាននិយាយនៅក្នុងសុន្ទរកថាគោលនយោបាយការបរទេសដ៏ធំមួយនៅថ្ងៃអង្គារទី២៤សីហានេះនៅប្រទេសសិង្ហបុរីដែលក្នុងនោះលោកស្រីដាក់ចេញទស្សនវិស័យរបស់រដ្ឋបាលបៃដិនសម្រាប់តំបន់ឥណ្ឌូ-ប៉ាស៊ីហ្វិក យ៉ាងដូច្នេះថា “យើងដឹងថាប៉េកាំងនៅតែបន្តបង្ខិតបង្ខំ បំភិតបំភ័យ និងធ្វើការទាមទារផ្នែកភាគច្រើននៃសមុទ្រចិនខាងត្បូង។សកម្មភាពរបស់ទីក្រុងប៉េកាំងនៅតែបន្តធ្វើឱ្យប៉ះពាល់ដល់សណ្តាប់ធ្នាប់ផ្អែកលើច្បាប់និងគំរាមកំហែងដល់អធិបតេយ្យភាពរបស់ប្រជាជាតិនានា”។
លោកស្រីហារីសដែលកំពុងធ្វើដំណើរឆ្លងកាត់អាស៊ីអាគ្នេយ៍រយៈពេលមួយសប្តាហ៍ បានប្រកាសថាសហរដ្ឋអាម៉េរិកឈរជាមួយសម្ពន្ធមិត្តនិងដៃគូរបស់ខ្លួនក្នុងការប្រឈមមុខនឹងការគំរាមកំហែងពីប្រទេសចិន។លោកស្រីបាននិយាយថា អាមេរិកនឹងរួមដៃជាមួយសម្ព័ន្ធមិត្តនៅពេលប្រឈមមុខនឹងការគំរាមកំហែងពីចិន។
បន្ទាប់ពីប្រទេសសឹង្ហបុរីលោកស្រីHarrisនឹងធ្វើដំណើរទៅទីក្រុងហាណូយប្រទេសវៀតណាមដែលជាដំណើរទស្សនកិច្ចលើកដំបូងរបស់អនុប្រធានាធិបតីអាមេរិក។នេះគឺជាដំណើរទស្សនកិច្ចក្រៅប្រទេសលើកទី២របស់Harrisបន្ទាប់ពីដំណើរទស្សនកិច្ចទៅកាន់ប្រទេសហ្គាតេម៉ាឡានិងម៉ិកស៊ិកកាលពីខែមុនក្នុងតួនាទីដឹកនាំកិច្ចខិតខំប្រឹងប្រែងផ្នែកការទូតរបស់លោកស្រីដើម្បីដោះស្រាយបញ្ហានៃការធ្វើចំណាកស្រុកទៅកាន់អាមេរិក។
សូមបញ្ជាក់ដែរថាដំណើរទស្សនកិច្ចរបស់រដ្ឋមន្ត្រីការពារជាតិអាម៉េរិក ឡយ អូស្ទីន មកកាន់ប្រទេសវៀតណាមកាលពីថ្ងៃទី២៨ខែកក្កដា២០២១និងដំណើររបស់អនុប្រធានាធិបតី កាម៉ាឡា ហារីស ចង្អុលបង្ហាញពីសារៈសំខាន់ខ្លាំងឡើងយ៉ាងឆាប់រហ័សរបស់រដ្ឋាភិបាលក្រុងហាណូយសម្រាប់វ៉ាស៊ីនតោន។
លោក ឡេ ហុងហៀប សហការីនៃវិទ្យាស្ថាន ISEAS-Yusof Ishakនៅសិង្ហបុរីប្រាប់វេបសាយ VnExpress International ថាការកោតសរសើររបស់អាម៉េរិកចំពោះតួនាទីរបស់វៀតណាមកំពុងកើនឡើង ហើយអាម៉េរិកកំពុងអនុវត្តចំណាត់ការការទូតដើម្បីទទួលបានការគាំទ្រពីវៀតណាមចំពោះតួនាទីរបស់ខ្លួននៅក្នុងតំបន់។
លោកអូស្ទីនបានមកដល់វៀតណាមនៅថ្ងៃទី ២៨ ខែកក្កដាសម្រាប់ដំណើរទស្សនកិច្ចរយៈពេលពីរថ្ងៃសម្រាប់ជាផ្នែកមួយនៃដំណើរទស្សនកិច្ចនៅអាស៊ីអាគ្នេយ៍ដែលជាទស្សនកិច្ចលើកដំបូងដោយសមាជិកកំពូលនៃរដ្ឋបាលបៃដិន។ក្នុងអំឡុងពេលស្នាក់នៅវៀតណាម លោកបានជួបសមភាគីរបស់លោកគឺរដ្ឋមន្ត្រីក្រសួងការពារជាតិ ផាន វ៉ាន់យ៉ាង ប្រធានាធិបតី ង្វៀន សួនហ្វ៊ុក និងនាយករដ្ឋមន្ត្រីលោក ផាម មិញ ជិញ។
សហរដ្ឋអាម៉េរិកបានបរិច្ចាគវ៉ាក់សាំងការពារជំងឺកូវីដ១៩ ចំនួនជាង ៥ លានដូសដល់វៀតណាម បញ្ឈប់ការស៊ើបអង្កេតទៅលើអ្វីដែលគេហៅថាការកំណត់តម្លៃរូបិយវត្ថុរបស់វៀតណាមនិងការផ្តល់នាវាឆ្មាំសមុទ្រទីពីរកាលពីពេលថ្មីៗនេះ។លោកហៀបនិយាយថា ដំណើរទស្សនកិច្ចរបស់លោកស្រីហារីសនៅខែនេះនឹងបង្ហាញពីការចាប់ផ្តើមនៃការចូលរួមកាន់តែស៊ីជម្រៅរវាងរដ្ឋបាលបៃដិននិងវៀតណាមនៅប៉ុន្មានឆ្នាំខាងមុខ។
លោកនិយាយថា សាធារណជនអាចមើលឃើញទំនាក់ទំនងទ្វេភាគីត្រូវបានធ្វើឱ្យប្រសើរឡើងដល់កម្រិតនៃភាពជាដៃគូយុទ្ធសាស្ត្រ។ “នោះអាចបង្កើតក្របខ័ណ្ឌនយោបាយនិងច្បាប់សម្រាប់ការជំរុញទំនាក់ទំនងទ្វេភាគីក្នុងផ្លូវដ៏វែងឆ្ងាយមួយ ជាពិសេសក្នុងវិស័យសន្តិសុខនិងការពារជាតិដើម្បីផ្តល់ផលប្រយោជន៍សម្រាប់ប្រទេសទាំងពីរ”។
លោក ខាឡាយ ថេយើ ជាសាស្ត្រាចារ្យនៅសាកលវិទ្យាល័យ New South Wales Canberra នៅបណ្ឌិត្យសភាកងកម្លាំងការពារអូស្ត្រាលី បាននិយាយថារដ្ឋបាលបៃដិនចាត់ទុកវៀតណាមជាដៃគូអាទិភាពក្នុងការសម្រេចគោលបំណងរបស់អាម៉េរិកដូចជាសេរីភាពលើដែនសមុទ្រនិងតំបន់ឥណ្ឌូប៉ាស៊ីហ្វិកដែលសេរីនិងបើកចំហក៏ដូចជាបញ្ហាសន្តិសុខមិនមែនជាប្រពៃណីផងដែរ។
លោកនិយាយថាក្នុងន័យនេះដំណើរទស្សនកិច្ចរបស់លោកស្រីហារីសនឹងបញ្ជាក់ជាថ្មីពីការបន្តការចូលរួមរបស់អាម៉េរិកជាមួយវៀតណាមលើសពីវិស័យការពារជាតិនិងសន្តិសុខនៅចំពោះមុខបញ្ហារួមជាច្រើនទៀត ដូចជាការប្រយុទ្ធប្រឆាំងនិងការងើបចេញពីជំងឺរាតត្បាតកូវីដ១៩ និងការកាត់បន្ថយបម្រែបម្រួលអាកាសធាតុ។លោក ដេរិក ហ្គ្រោសមែន ជាអ្នកវិភាគជាន់ខ្ពស់ផ្នែកការពារជាតិនៅក្រុមប្រឹក្សាយោបល់ RAND របស់អាម៉េរិកដែលគូសបញ្ជាក់ពីការពិតថាលោកស្រីហារីសនឹងក្លាយជាអនុប្រធានាធិបតីដំបូងគេដែលបានមកបំពេញទស្សនកិច្ចនៅវៀតណាម បាននិយាយថាដំណើររបស់លោកស្រីគឺជាសារបង្ហាញច្បាស់ៗថាតើទំនាក់ទំនងរវាងអាម៉េរិកនិងវៀតណាមសព្វថ្ងៃនេះបានទៅដល់ចំណុចណា និង ថាតើវានឹងដើរទៅដល់ចំណុចណាទៀតនៅប៉ុន្មានឆ្នាំខាងមុខ។
