អត្តពលិកអូឡាំពិកប្រទេសបេឡារូសទទួលបានសិទ្ធជ្រកកោនតែសកម្មជនម្នាក់ផ្សេងត្រូវបានគេចងកនៅអ៊ុយក្រែន
26-March-2024 / ព័ត៌មានអន្តរជាតិ
ជប៉ុន៖អត្តពលិកអូឡាំពិកប្រទេសបេឡារូស នាង គ្រីស្ទីណា ធីម៉ាណូវស្កាយ៉ា បានចាកចេញពីជប៉ុនតាមជើងហោះហើរឆ្ពោះទៅទីក្រុងវីយែននៅថ្ងៃពុធទី៤សីហានេះ ហើយរំពឹងធ្វើដំណើរទៅកាន់ប្រទេសប៉ូឡូញ កន្លែងដែលនាងត្រូវបានផ្តល់ទិដ្ឋាការមនុស្សធម៌។
មន្ត្រីអាកាសយានដ្ឋានម្នាក់បានប្រាប់អ្នកយកព័ត៌មានថា កីឡាការិនីវ័យ ២៤ ឆ្នាំរូបនេះរំពឹងឡើងយន្តហោះទៅកាន់ទីក្រុងវ៉ាសូវីតែម្តង ប៉ុន្តែបានប្តូរជើងហោះហើរវិញនៅនាទីចុងក្រោយ។ នាងបានចេញពីស្ថានទូតប៉ូឡូញ ទីដែលនាងបានចំណាយពេលស្នាក់នៅពីរយប់កន្លងមកបន្ទាប់ពីមានការអះអាងថាក្រុមជម្រើសជាតិរបស់នាងបានព្យាយាមបង្ខំនាងឱ្យត្រឡប់ទៅស្រុកវិញ បន្ទាប់ពីនាងបានរិះគន់គ្រូបង្វឹករបស់នាង។នាងបានចេញដំណើរភ្លាមៗបន្ទាប់ពីម៉ោង ១១ ព្រឹកម៉ោងក្នុងស្រុក។
អ្នករត់ប្រណាំងរូបនេះគឺស្ថិតក្នុងចំណោមអត្តពលិកបេឡារូសជាង ២.០០០ នាក់ដែលបានចុះហត្ថលេខាលើលិខិតចំហមួយអំពាវនាវឱ្យមានការបោះឆ្នោតសាថ្មីនិងដោះលែងអ្នកទោសនយោបាយ។ស្វាមីរបស់នាងបានភៀសខ្លួនទៅអ៊ុយក្រែនហើយអ្នកទាំងពីររំពឹងជួបគ្នានៅប៉ូឡូញ ជាប្រទេសមួយដែលរិះគន់យ៉ាងចាស់ដៃចំពោះរបបរបស់លោកលូកាសិនកូ ហើយបានក្លាយជាលំនៅថ្មីរបស់ជនប្រឆាំងច្រើនឡើងៗ។
សូមបញ្ជាក់ថាអាជ្ញាធរជប៉ុន និងគណៈកម្មាធិការអូឡាំពិកអន្តរជាតិត្រូវដោះស្រាយសំណុំរឿងដ៏ឈឺក្បាល មួយនៅថ្ងៃចន្ទទី ២ សីហា ២០២១។ នៅថ្ងៃអាទិត្យទី១សីហា កីឡាការិនីបេឡារុស នាង Kristsina Tsimanouskaya បានស្វែងរកជំនួយពីប៉ូលិសជប៉ុន ព្រោះនាងមិនចង់ឡើងយន្តហោះ ដែលត្រូវចេញដំណើរទៅទីក្រុងមីនស្ក៍ ប្រទេសបេឡារុស។ នៅក្នុងសារវីដេអូ ផ្សាយតាមគណនី instragram របស់ខ្លួន កាលពីថ្ងៃអាទិត្យដែរ អត្តពលិករបេឡារុសរូបនេះ បាននិយាយថា នាងបានរងការដាក់សម្ពាធខ្លាំង។ ប្រតិភូអូឡាំពិក បេឡារុសបានបង្ខំ ចាប់បញ្ជូននាងឲ្យត្រលប់ទៅប្រទេសបេឡារុសវិញ ដោយគ្មានការយល់ព្រមព្រៀងពីនាងទាល់តែសោះ។ កីឡាការិនីរូបនេះ បានអំពាវនាវសុំឲ្យគណៈកម្មាធិការអូឡាំពិកអន្តរជាតិអន្តរាគមន៍ក្នុងរឿងនេះ។
នៅក្នុងសេចក្តីថ្លែងការណ៍ នៅថ្ងៃចន្ទនេះ ប្រធានគណៈកម្មាធិការអូឡាំពិកអន្តរជាតិ លោក Mark Adams បាននិយាយថា គណៈកម្មាធិការ និងគណៈកម្មាធិការជាតិជប៉ុន បាននិយាយផ្ទាល់ជាមួយ កីឡាការិនីបេឡារុស កាលពីយប់ថ្ងៃអាទិត្យ និងថា គេកំពុងស្វែងរកការបំភ្លឺពី ខាងគណៈប្រតិភូអូឡាំពិកបេឡារុសជុំវិញរឿងនេះ។កាលពីថ្ងៃអាទិត្យ គណៈកម្មាធិការអូឡាំពិកបេឡារុស ដែលដឹកនាំដោយកូនប្រុសរបស់លោកប្រធានាធិបតី អាឡិចសង់ លូកាឆិនកូ បានបញ្ជាក់ថា គណៈកម្មាធិការបេឡារុសបានសម្រេចផ្អាកការចូលរួមរបស់កីឡាការិនី Kristsina Tsimanouskaya បន្ទាប់ពីមានវេជ្ជបញ្ជារបស់គ្រូពេទ្យ ដែលយោងទៅលើបញ្ហា អារម្មណ៍ និងស្មារតី ចិត្តសាស្ត្ររបស់កីឡាការិនី ខាងលើ។ ការសម្រេចរបស់គណៈប្រតិភូអូឡាំពិកបេឡារុសបានបំផ្លាញក្តីស្រមៃរបស់អត្តពលិករ Kristsina ដែលសង្ឃឹមលើការរត់ចម្ងាយ ២០០ម៉ែត្រ នៅថ្ងៃចន្ទទី ២សីហា បន្ទាប់ពីបរាជ័យ ក្នុងការរត់ចម្ងាយ ១០០ម៉ែត្រ កាលពីសប្តាហ៍មុន។
នៅព្រលានយន្តហោះក្រុងតូក្យូ នាង Kristsina Tsimanouskayaបានចាត់ទុកការលើកឡើងខាងលើថា ជារឿងភូតកុហកទាំងស្រុង។ តាមនាង Kristsina គ្រូបង្វឹកបានសម្រេចព្យួរ មិនឲ្យនាងចូលរួម ក្នុងការប្រកួត នៅតទៅទៀត បន្ទាប់ពីនាងបានរិះគន់ជាសាធារណៈ គ្រូបង្វឹក និងសហព័ន្ធកីឡាជាតិអូឡាំពិកបេឡារុស។បើតាមកាឡាការិនីបេឡារុស នៅក្នុងការប្រកួតកីឡាអូឡាំពិកតូក្យូ នាងត្រូវរត់ចម្ងាយ ១០០ម៉ែត្រ ២០០ម៉ែត្រ ប៉ុន្តែ គ្រូបង្វឹកបេឡារុសបានសម្រេចដោយអត្តនោម័ត ដោយគ្មានសួរយោបល់អ្វីទាំងអស់ ឲ្យនាងរត់ត ចម្ងាយ ៤០០ម៉ែត្រ។ តាមនាង Kristsina ដដែល គ្រូបង្វឹកបានសម្រេចចិត្តបែបនេះ ក៏ដោយសារ កីឡាករបេឡារុសពីរនាក់ផ្សេងទៀត ខកខាន មិនបានធ្វើតេស្តគ្រប់គ្រាន់ផ្នែកសុខភាព។
នាង Kristsina បាននិយាយខ្លាំងៗថា ហេតុអ្វីបានជាគេត្រូវចាំទទួលថ្មបាក់របស់អ្នកដែលធ្វើការមិនត្រឹមត្រូវធ្វើអ្វី? គេមិនបានសម្រេចចិត្ត នៅក្រោយខ្នងនាង ដោយមិនបានសួរយោបល់ថា តើនាងអាចរត់បានចម្ងាយ៤ម៉ែត្រ ដែរឬទេ។កីឡាករ បេឡារុស និយាយថា នាងមិនចង់ត្រលប់ទៅ បេឡារុសវិញទេ ព្រោះនាង ខ្លាចត្រូវគេចាប់ដាក់ពន្ធនាគារ ដោយសារតែហ៊ានរិះគន់សហព័ន្ធកីឡាបេឡារុស។ នាង Kristsina Tsimanouskayaបានបង្ហើបថា នាងចង់ដាក់ពាក្យសុំសិទ្ធិជ្រកកោននយោបាយ នៅប្រទេសអាល្លឺម៉ង់ ឬប្រទេសអូទ្រីស។
ប្រទេសអឺរ៉ុបខាងកើតមួយចំនួន ដែលមានព្រំដែនជាប់ជាមួយបេឡារុស ដូចជា ប៉ូឡូញ ជាដើម បានស្នើផ្តល់ទិដ្ឋាការពិសេស សម្រាប់ឲ្យនាង Kristsina នៅថ្ងៃចន្ទ ប៉ូឡូញបានសម្រេចផ្តល់ទិដ្ឋាការមនុស្សធម៌ដល់កីឡាការិនីបេឡារុស។មេដឹកនាំបក្សប្រឆាំងបេឡារុស ដែលកំពុងនិរទេសខ្លួនទៅនៅប្រទេសលីទុយអានី និយាយចោទប្រកាន់ប្រធានាធិបតី លូកាឆិនកូ ថា បង្ក្រាបសំឡេងប្រឆាំងនឹងខ្លួន មិនថា ពួកគេ ជាអ្នកនយោបាយប្រឆាំង សកម្មជនសិទ្ធិមនុស្ស អ្នកកាសែត ឬកីឡាករ។ នៅមុន នាង Kristsina Tsimanouskaya កីឡាការិនី បាល់បោះម្នាក់ ត្រូវបានអាជ្ញាធរចាប់ដាក់ពន្ធនាគារ ១៥ថ្ងៃ ដោយសារតែចូលរួមក្នុងបាតុកម្មប្រឆាំងប្រធានាធិបតីលូកាឆិនកូ កាលពីឆ្នាំ ២០២០។
ក្រៅពីរឿងកីឡាការិនីរត់ប្រណាំងនេះសកម្មជនប្រឆាំងបេឡារុសម្នាក់គឺ លោក វីតាលី ស្ហ៊ីស្ហូវ (Vitaly Shishov) ត្រូវបានគេប្រទះឃើញស្លាប់ដោយការចងព្យួរកនៅក្នុងឧទ្យានមួយកន្លែងក្បែរផ្ទះរបស់លោកក្នុងប្រទេសអ៊ុយក្រែន នាថ្ងៃអង្គារ ៣ សីហា។ ក្រុមអ្នកគាំទ្រលោកស្ហ៊ីស្ហូវវិញ បានចោទរបបលោកប្រធានាធិបតី អាឡិចសង់ លូកាស្ហេនកូ (Alexander Lukashenko) ថាជាអ្នកសម្លាប់សកម្មជនប្រឆាំងរូបនេះ។មានវ័យ ២៦ ឆ្នាំ លោក វីតាលី ស្ហ៊ីស្ហូវ ដែលជាសកម្មជនប្រឆាំងបេឡារុស និងជាប្រធានដឹកនាំអង្គការក្រៅរដ្ឋាភិបាលមួយដែលមានឈ្មោះថា “ផ្ទះបេឡារុស” បានបាត់ខ្លួនកាលពីថ្ងៃចន្ទ ទី២ សីហាកន្លងទៅ។ ។
សាកសពរបស់លោកវីតាលី ស្ហ៊ីស្ហូវ ត្រូវបានគេរកឃើញចងព្យួរកនៅក្នុងឧទ្យានមួយកន្លែងក្នុងទីក្រុងកៀវនៃប្រទេសអ៊ុយក្រែន នៅមួយថ្ងៃបន្ទាប់ពីបាត់ខ្លួន។ ប៉ូលិសក្រុងកៀវ មានការសង្ស័យច្រើនថាករណីស្លាប់នេះគឺជាអំពើឃាតកម្ម។លោក Igor Klymenko ប្រធានប៉ូលិសជាតិអ៊ុយក្រែន បានប្រាប់អ្នកយកព័ត៌មានថា បើតាមប្រធានប៉ូលិសជាតិអ៊ុយក្រែនដដែល នៅលើសាកសពជនរងគ្រោះ គេឃើញមានស្នាមកោសនៅលើច្រមុះ និងដងខ្លួន ដែលនាំឲ្យគេសង្ស័យដែរថា លោកអាចដួលមុននឹងស្លាប់។
នៅក្នុងសេចក្តីថ្លែងការណ៍មួយ អង្គការផ្ទះបេឡារុស បានឲ្យដឹថាអង្គការបានទទួលការព្រមានម្តងហើយម្តងទៀត រួមទាំងការចាប់ពង្រត់ និងការសម្លាប់។ អង្គការផ្ទះបេឡារុសបាននិយាយថា គ្មានអ្វីគួរឲ្យសង្ស័យឡើយ គឺភ្នាក់ងារសន្តិសុខសម្ងាត់របស់ប្រធានាធិបតីបេឡារុសលោក លូកាស្ហេនកូ គឺជាអ្នករៀបចំគម្រោងផែនការសម្លាប់ប្រធានអង្គការរបស់ខ្លួន។ លោក វីតាលី ស្ហ៊ីស្ហូវ គឺជាប្រធានដឹកនាំអង្គការផ្ទះបេឡារុសដែលមានទីតាំងនៅក្នុងប្រទេសនៅអ៊ុយក្រែន។ អង្គការនេះ សកម្មខ្លាំងណាស់ក្នុងការជួយប្រជាជនដែលបានភៀសខ្លួនចេញពីប្រទេសបេឡារុស ដែលក្រុមអ្នកប្រឆាំងតែងរងនូវការបង្ក្រាប។
លោក អាឡិចសង់ លូកាស្ហេនកូ បានឡើងគ្រប់គ្រងប្រទេសរយៈបេឡសារុសពេលប្រមាណ ២៧ ឆ្នាំមកហើយនោះ បានបង្ក្រាបរាល់គ្រប់ទម្រង់នៃការប្រឆាំងទាំងអស់ ចាប់តាំងពីផ្ទុះការតវ៉ាទ្រង់ទ្រាយធំប្រឆាំងនឹងលទ្ធផលនៃការបោះឆ្នោត កាលពីឆ្នាំទៅមិញដែលប្រជាជនបេឡារុសជាច្រើន ហើយនិងក្រុមប្រទេសលោកខាងលិចចាត់ទុកថាអយុត្តិធម៌៕
