លោក Nguyen Phu Trongមនុស្សមានអំណាចកំពូលនៅវៀតណាម ទទួលមរណភាពហើយលោកតូឡឹមជំនួស!
21-September-2026 / ព័ត៌មានអន្តរជាតិ
ប្រទេសវៀតណាម៖អគ្គលេខាធិការបក្សកុំមុយនិស្តវៀតណាមលោកង្វៀនភូត្រុង* Nguyen Phu Trong) បានទទួលមរណភាពហើយ នៅអាយុ៨០ឆ្នាំ ដោយសាររោគាពាធ។ ទីភ្នាក់ងារព័ត៌មាន Reuters នាថ្ងៃសុក្រ ទី១៩ ខែកក្កដា ឆ្នាំ២០២៤បានឲ្យដឹងថាដំណឹងមរណភាពខាងលើធ្វើឡើង បន្ទាប់ពីបក្សកុម្មុយនិស្តវៀតណាម បាននិយាយកាលពីថ្ងៃព្រហស្បតិ៍សប្តាហ៍នេះថា លោក To Lam ដែលជាប្រធានាធិបតីវៀតណាម ត្រូវបានផ្តល់តួនាទីឱ្យឡើងជាមេដឹកនាំស្តីទី ដើម្បីទទួលបន្ទុកដឹកនាំកិច្ចការងាររដ្ឋទាំងឡាយ ជាបណ្តោះអាសន្ន ស្របពេលដែលលោក Trong សម្រាកពីការងារមួយរយៈ ដើម្បីផ្តោតលើការពិនិត្យតាមដាន និងព្យាបាលជំងឺ។
នៅក្នុងប្រទេសវៀតណាម អគ្គលេខាធិការបក្សកុម្មុយនិស្ត គឺជាតំណែងដែលមានអំណាចជាងគេបង្អស់ ខណៈតំណែងប្រធានាធិបតី មិនសូវជាមានឥទ្ធិពលនោះទេ។ រីឯតំណែងពីរផ្សេងទៀត ដែលស្ថិតក្នុងសសរស្តម្ភទាំង៤ នៃរចនាសម្ព័ន្ធថ្នាក់ដឹកនាំរបស់វៀតណាម គឺនាយករដ្ឋមន្ត្រី និងប្រធានរដ្ឋសភា។គួរបញ្ជាក់ថា លោក Trong បានកាន់តំណែងជាអគ្គលេខាធិការបក្សកុម្មុយនិស្តវៀតណាម ចាប់តាំងតែពីឆ្នាំ២០១១មក ហើយលោកក៏ធ្លាប់កាន់តួនាទីជា ប្រធានាធិបតីផងដែរ កាលពីចន្លោះឆ្នាំ២០១៨-២០២១។ លោកត្រុង( Trong )គឺជាមនុស្សដែលដាកចេញគោលនយោបាយបង្ក្រាបអំពើរពុករលួយដែលធ្វើឲ្យប្រធានាធិបតីបធានសភានិងនាយករដ្ឋមន្ត្រីវៀតណាមរបូតតំណែងជាបន្តបន្ទាប់។
ចូលកាន់មុខតំណែងអគ្គលេខាធិការបក្សកុម្មុយនិស្ត នៅឆ្នាំ២០១១ លោក ង្វៀន ភូចុង បានដឹកនាំប្រយុទ្ធប្រឆាំងអំពើពុករលួយយ៉ាងសកម្ម ជាគោលករណ៍ដែលប្រកាសដាក់ចេញកាលពីឆ្នាំ២០១៦។ យុទ្ធនាការកណ្តាប់ដៃដែកកម្ចាត់អំពើពុករលួយ បង្ក្រាបជនពុករលួយដកចេញពីតំណែង បើទោះបីជាមន្ត្រីថ្នាក់ស័ក្តិធំប៉ុនណាក៏ដោយ ក៏ត្រូវតែជ្រុះពីកៅអីដែរ ឲ្យតែប្រឡាក់ប្រឡូសនឹងអំពើពុករលួយសូកប៉ាន់។ ទង្វើថ្នាក់ដឹកនាំបក្សសង្គមនិយមវៀតណាមធ្វើដូច្នេះ ដើម្បីពង្រឹងអំណាចគណបក្ស និងបង្កើនទំនុកចិត្តពីពលរដ្ឋ។ បើគ្រាន់តែគិតត្រឹម ៣ ឆ្នាំចុងក្រោយនេះ អាជ្ញាធរវៀតណាម បានចាប់ឃុំខ្លួនមនុស្ស ៤ ៤០០ នាក់ ដែលពាក់ព័ន្ធប្រឡាក់ប្រលូកក្នុងសំណុំរឿងពុករលួយសូកប៉ាន់ ចំនួន ១ ៧០០ ករណី។ អ្នកជំនាញច្រើន បានប្រៀបយុទ្ធនាការបង្ក្រាបរបស់លោក ង្វៀន ភូចុង ស្រដៀងគ្នានឹងការកម្ចាត់អំពើពុករលួយ របស់លោកប្រធានាធិបតីចិន ស៊ី ជីនពីង ដែរ។
វៀតណាម នៅក្រោមអំណាចដឹកនាំរបស់លោក ង្វៀន ភូចុង ក៏ដូចថ្នាក់ដឹកនាំវៀតណាមមុនតាំងពីសម័យឯករាជ្យមក ជានិច្ចជាកាល រដ្ឋសង្គមនិយម១នេះ តែងតែកាន់គោលជំហរទន់ភ្លន់តែរឹងមាំ ដែលគេប្រសិទ្ធនាមថា Diplomatie du Bambou យុទ្ធសាស្ត្រាការទូតដើមឫស្សី។ នេះជាយុទ្ធសាស្ត្រមានទិសដៅច្រើនក្នុងពេលតែមួយ ដឹកនាំប្រទេសផ្អែកលើតថភាពជាក់ស្តែង និងចៀសវាងមិនផ្អៀងទោរទន់កាន់ជើងភាគីខាងណា១ជ្រុលហួសហេតុ។
មហាយក្សចិននិងសហរដ្ឋអាមេរិក បានចេញសេចក្តីថ្លែងការណ៍រំលែកទុក្ខ ដោយគ្មានបង្អង់។ បើតាមទូរទស្សន៍ជាតិចិនស៊ីស៊ីធីវី, គណមជ្ឈិមបក្សកុម្មុយនិស្តចិន បានប្រញាប់ប្រញាលផ្ញើសារចូលរួមរំលែកមរណទុក្ខដ៏ក្រៀមក្រំ ជាមួយប្រជាជាតិវៀតណាម។ ទន្ទឹមគ្នានេះ សហរដ្ឋអាមេរិកជាសម្ព័ន្ធមិត្តវៀតណាម តាមរយៈ ឯករដ្ឋទូតប្រចាំទីក្រុងហាណូយ លោក Marc E. Knapper បានថ្លែងឲ្យដឹងថា អាមេរិកយំសោកស្តាយចំពោះការបង់បង់រដ្ឋបុរសដ៏មានចក្ខុវិស័យ។ ដែលច្រើនទសវត្សរ៍មកនេះ លោក ង្វៀន ភូចុង បានបម្រើផលប្រយោជន៍វៀតណាមនិងអាមេរិក ព្រមទាំងសហគមន៍អន្តរជាតិ។
គិតតាំងពីឆ្នាំ ១៩៨៦ គ្រាដែលវៀតណាមបើកសេរីកម្មសេដ្ឋកិច្ចមក លោក ង្វៀន ភូចុង ជាថ្នាក់ដឹកនាំបក្សទី១ ដែលអាចកាន់កាប់តំណែង អគ្គលេខាធិការបក្សកុម្មុយនិស្តវៀតណាម បានចំនួន ៣ អាណត្តិ ជាប់ៗគ្នា។
ក្រៅពីអ្នកសសើរប្រមុខដឹកនាំវៀតណាមរូបនេះក៏ត្រូវរងការរិះគន់យ៉ាងចាស់ដៃដែរ ពីសំណាក់ក្រុមសកម្មជននិងអង្គការការពារសិទ្ធិមនុស្ស ទាំងនៅក្នុងស្រុកនិងអន្តរជាតិ។នៅវៀតណាម អគ្គលេខាធិការបក្សកុម្មុយនិស្ត ជាមុខតំណែងមានអំណាចធំជាងគេបង្អស់ ធំជាង នាយករដ្ឋមន្ត្រី ប្រធានាធិបតី និងប្រធានសភា។ នៅគ្រានេះ លោកប្រធានាធិបតីវៀតណាម តូ លិម ជាអតីតរដ្ឋមន្ត្រីសន្តិសុខ ត្រូវបន្តកាន់តំណែង អគ្គលេខាធិការបក្ស ជាបណ្តោះអាសន្ន។ គណបក្សកុម្មុយនិស្តវៀតណាម នឹងសម្រេចថា ត្រូវឲ្យលោកទទួលខុសត្រូវបន្ត រហូតដល់ផុតអាណត្តិ ឆ្នាំ២០២៦ ឬក៏ត្រូវរៀបចំបោះឆ្នោតជ្រើសតាំងជាថ្មី នៅឆាប់ៗ៕
