នយោបាយថៃអាប់អួជាថ្មីក្រុមអ្នកតវ៉ាចាប់ផ្តើមប្រមូលផ្តុំដាក់ញត្តិប្រឆាំងក្នុងពេលដែលនាយករដ្ឋមន្ត្រីបន្តគោលនយោបាយឧបត្ថម្ភលុយ!
16-September-2024 / ព័ត៌មានអន្តរជាតិ
ប្រទេសថៃ៖នាយករដ្ឋមន្ត្រីថៃ ដែលទើបបង្កើតគណរដ្ឋមន្ត្រិថ្មីអ្នកស្រី ភែថងថាន ស៊ីណាវ៉ាត់ បានប្តេជ្ញាជំរុញទៅមុខជាមួយនឹងវិធានការឧបត្ថម្ភសាច់ប្រាក់ ដ៏ចម្រូងចម្រាស់ ១៤ពាន់លានដុល្លារ ខណៈដែលគណៈរដ្ឋមន្ត្រីរបស់អ្នកស្រី បានបញ្ចប់ផែនការមេ ដើម្បីរំដោះសេដ្ឋកិច្ចធំទីពីរ របស់អាស៊ីអាគ្នេយ៍មួយនេះ ពីកំណើនទាប និងបំណុលគ្រួសាររ៉ាំរ៉ៃ។
តាមទីភ្នាក់ងារព័ត៌មាន Bloomberg អ្នកស្រី ភែថងថាន ដែលបានស្បថចូលកាន់តំណែងរួមជាមួយគណៈរដ្ឋមន្ត្រីរបស់អ្នកស្រី ដែលមានសមាជិក ៣៥រូបកាលពីថ្ងៃសុក្រ នឹងបង្ហាញគោលនយោបាយរបស់រដ្ឋាភិបាលរបស់អ្នកស្រី ទៅកាន់សភាថៃក្នុងពេលឆាប់ៗនេះដែលគេរំពឹងថានឹងមានការបង្ហាញព័ត៌មានលម្អិត នៃវិធានការឧបត្ថម្ភសាច់ប្រាក់ ដែលបានពន្យារពេលជាយូរមកហើយនេះ និងរបៀបវារៈនៃរដ្ឋាភិបាលរបស់អ្នកស្រី ក្នុងការលើកកម្ពស់វិស័យទេសចរណ៍ និងការវិនិយោគបរទេស។
អ្នកស្រី ភែថងថាន បានប្រាប់អ្នកយកព័ត៌មានបន្ទាប់ពីកិច្ចប្រជុំគណៈរដ្ឋមន្ត្រីថា រដ្ឋាភិបាលនឹងធានាថា កម្មវិធីកាបូបឌីជីថលដែលសន្យាថានឹងផ្តល់ប្រាក់ឧបត្ថម្ភ ១ម៉ឺនបាត (២៩៦ដុល្លារ) ដល់ប្រជាជនថៃពេញវ័យប្រហែល ៥០លាននាក់ នឹងគោរពតាមច្បាប់។ យោងតាមមន្ត្រីបានឱ្យដឹងថា ប្រជាពលរដ្ឋថៃប្រហែល ១៤,៥លាននាក់ រួមទាំងជនពិការចំនួន ១លាននាក់ផងដែរនោះ អាចនឹងទទួលបានប្រាក់ឧបត្ថម្ភនេះនៅក្នុងដំណាក់កាលដំបូងនៃកម្មវិធីឧបត្ថម្ភសាច់ប្រាក់នៅក្នុងខែកញ្ញា បន្ទាប់ពីមេដឹកនាំថ្មីរូបនេះបានបញ្ជាឱ្យពិនិត្យមើលឡើងវិញនូវផែនការនេះដែលដាក់ចេញដោយរដ្ឋាភិបាលលោកសេដ្ឋាវីស៊ីន។
អ្នកស្រី ភែថងថាន កាលពីថ្ងៃសៅរ៍បានជំរុញឱ្យខុទ្ទកាល័យរបស់អ្នកស្រី បន្តអនុវត្តគោលនយោបាយមួយចំនួន ដែលបានអនុវត្តដោយរដ្ឋាភិបាល របស់អតីតនាយករដ្ឋមន្ត្រីលោក សេដ្ឋា ថាវីស៊ីន ដើម្បីជំរុញសេដ្ឋកិច្ច ជំរុញវិស័យទេសចរណ៍ លើកកម្ពស់តម្លៃទំនិញកសិកម្ម និងទប់ទល់នឹងគ្រោះទឹកជំនន់តាមរដូវ។បើតាមទីភ្នាក់ងារព័ត៌មាន Bloomberg បានឱ្យដឹងថា សេដ្ឋកិច្ចធំទីពីររបស់អាស៊ីអាគ្នេយ៍មួយនេះត្រូវបានព្យាករថានឹងកើនឡើង ២,៥% នៅឆ្នាំនេះ ដែលទាបជាងកំណើនពី ៥% ទៅ ៦% ដែលសម្រេចបានដោយប្រទេសជិតខាងឥណ្ឌូណេស៊ី ម៉ាឡេស៊ី និងហ្វីលីពីន។ សេដ្ឋកិច្ចថៃបានកើនឡើងជាមធ្យម ១,៩% ក្នុងរយៈពេលទសវត្សរ៍កន្លងមកនេះ។
ទោះបីយ៉ាងណាគេសង្កេតឃើញថាបរិយាកាសនយោបាយថៃចាប់ផ្តើមអាប់អួ ក្រោយរដ្ឋាភិបាលថ្មីបានចាប់ផ្តើមដំណើរការត្រឹមតែ១ថ្ងៃ ដោយមានក្រុមអ្នកតវ៉ាបានចាប់ផ្តើមដំណើរការតវ៉ាប្រឆាំងក្រុមគ្រួសាររបស់លោកថាក់ស៊ីនផ្ទាល់តែម្តង។ លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីដែលត្រូវទម្លាក់ដោយរដ្ឋាប្រហារយោធាកាលឆ្នាំ២០០៦ ហាក់លេចមុខមាត់ភ្លាមៗក្រោយកូនស្រីពៅរបស់លោកបានទទួលការគាំទ្រពីការបោះឆ្នោតផ្តល់សេចក្តីទុកចិត្តក្នុងរដ្ឋសភាកាលថ្ងៃទី១៦ខែសីហា។
យោងការផ្សាយរបស់សារព័ត៌មាន Khaosod កាលពីថ្ងៃសៅរ៍ក្រុមអ្នកតវ៉ាបានរៀបចំការតវ៉ានៅវិមាន១៤តុលាដោយមានការអំពាវនាវឲ្យប្រជាជនបញ្ឈប់គ្រួសារស៊ីណាវ៉ាត្រាពីការគ្រប់គ្រងប្រទេសថៃ។ផ្ទាំងបដាធំនៅលើឆាកដែលគេរៀបចំដូចជាឆាកប្រគុំតន្ត្រី ត្រូវបានគេសរសេរថា៖«បញ្ឈប់របបស៊ីណាវ៉ាត្រានិងគណរដ្ឋមន្ត្រីគ្រួសារ (Stop the Shinawatra Regime and Family Cabinet)»។ មានបណ្តឹងមួយចំនួនរួមទាំងបណ្តឹងឲ្យរំលាយគណបក្សភឿថៃចេញពីសមាជិកសភារបស់គណបក្ស Pralang Pracharath របស់លោកប្រាវីតវង់ស៊ូវ៉ានដែលត្រូវបានរុញច្រានចេញពីរដ្ឋាភិបាលចម្រុះរបស់លោកស្រីផែថងថាន។
គណបក្ស Pralang Pracharath ដឹកនាំដោយ លោក Prawit Wongsuwon អតីតឧបនាយករដ្ឋមន្ត្រីក្រសួងមហាផ្ទៃ និងជាអ្នកគាំទ្រឲ្យធ្វើរដ្ឋប្រហារទម្លាក់រដ្ឋាភិបាលយីងឡាក់ ស៊ីណាវ៉ាត្រាកាលពីឆ្នាំ២០១៤។ អ្នកស្រីយីងឡាក់ត្រូវជាមីងរបស់នាយករដ្ឋមន្ត្រីបច្ចុប្បន្ន។ញត្តិទាមទារឱ្យរំលោយគណបក្ស៦ក្នុងរដ្ឋាភិបាលចម្រុះថៃបច្ចុប្បន្ន ត្រូវបានដាក់ទៅកាន់គណៈកម្មការរៀបចំការបោះឆ្នោត (EC) របស់ថៃនៅថ្ងៃចន្ទទី៩កញ្ញានេះ ដោយអតីតអ្នកប្រឆាំងរបបយោធា ដែលបានទម្លាក់រដ្ឋាភិបាលលោកថាក់ស៊ីស៊ីណាវ៉ាត្រាកាលពីឆ្នាំ២០០៦ ។
តាមការចេញផ្សាយព័ត៌មានទាន់ហេតុការណ៍ (Breaking News) នៃសារព័ត៌មាន ខាវសុត(Khaosod) ពាក្យបណ្តឹងដែលប្តឹងដោយលោកណុបផារ៉ុតវ៉ូរ៉ាជិតវុធិគុល( Noparut Worachitwuthikul) បានទាមទារឱ្យរំលាយគណបក្ស៦ដែលតំណាងរបស់គណបក្សទាំងនោះបានជួបប្រជុំជាមួយអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា នៅលំនៅឋានរបស់លោក មុនរដ្ឋាភិបាលបានបង្កើតឡើង។
ញត្តិទាមទារឱ្យរំលាយគណបក្សទាំងនោះ ដោយការចោទប្រកាន់អំពីការស្ថិតក្រោមឥទ្ធិពលរបស់លោកថាក់ស៊ីនរបស់គណបក្សទាំងនោះ ដោយសារតែតំណាងគណបក្សទាំងនោះបានចូលរួមកិច្ចប្រជុំមួយរៀបចំឡើងនៅល្ងាចថ្ងៃទី១៤ខែសីហា គឺថ្ងៃដែលតុលាការធម្មនុញ្ញាសម្រេចដកតំណាងនាយករដ្ឋមន្ត្រី សេដ្ឋា ថាវីស៊ីន ខណៈពេលដែលលោកស្រី ផែថងថាន ស៊ីណាវ៉ាត្រា ដែលមានអំណាចក្នុងគណបក្សភឿថៃសម្រាប់ការដឹកនាំប្រជុំតាមអំណាចប្រធានគណបក្សចម្រុះស្ថិតនៅក្រៅប្រទេសនៅឡើយ។
ញត្តិដែលទាមទាររំលាយគណបក្សទាំងនោះរួមមាន គណបក្សភឿថៃ គណបក្សរួបរួមជាតិថៃ គណបក្ស Palang Pracharath គណបក្ស Bhumjai Thail។ ញត្តិនោះត្រូវបានផ្តួចផ្តើមដោយ លោក Noparut Worachitwuthikul ជាសមាជិកនៃ ក្រុមព្រាមសនៅឆ្នាំ២០០៦។យោងគេហទំព័រ teakdoor.com ដែលបានប្រមូលចងក្រងអត្ថបទរបស់សារព័ត៌មាន BangkokPost.com ដែលបានចេញផ្សាយកាលថ្ងៃទី ១៨ខែឧសភា២០០៧ គឺប្រហែល៨ខែក្រោយរដ្ឋាភិបាលលោកថាក់ស៊ីនត្រូវបានផ្តួចរំលំក្រោយរដ្ឋប្រហារយោធាកាលខែកញ្ញាឆ្នាំ២០០៦ លោក Noparut Worachitwuthikul ជាប្រធានអង្គការព្រាបស ( White Dove) ជាអង្គការប្រឆាំងរដ្ឋាភិបាលរដ្ឋប្រហារ។តាមការចុះផ្សាយកាលនោះ លោក Noparut Worachitwuthikul ក៏ត្រូវបានប៉ូលិសចាប់ខ្លួនកាលពីពេលនោះ ដោយសារលោកបានទៅកាន់សាលាក្រុងឈៀងម៉ៃ ដើម្បីសុំការអនុញ្ញាតប្រើប្រាស់តំបន់ជុំវិញនោះដើម្បីជួបជុំតវ៉ា៕
