បាតុករសម្រុកចូលវិមាននាយករដ្ឋមន្ត្រីអាមេនីដើម្បីតវ៉ាប្រឆាំងកិច្ចព្រមព្រៀងសន្តិភាពដែលចាញ់ប្រៀបអាស៊ែបៃហ្សង់
07-May-2026 / ព័ត៌មានអន្តរជាតិ
អាមេនី៖ក្រុមអ្នកតវ៉ា នៅថ្ងៃអង្គារ៍ទី១០វិច្ឆិកាបានប្រមូលផ្តុំគ្នានៅជិតវិមាននាយករដ្ឋមន្ត្រីអាមេនី ស្ថិតនៅក្នុងរដ្ឋធានីយ៉េរ៉េវ៉ាន់ (Yerevan) គឺប៉ុន្មានម៉ោងបន្ទាប់ពីកិច្ចព្រមព្រៀងសន្តិភាពចាញ់ប្រៀបរវាងអាមេនី និងអាស៊ែបៃហ្សង់ ត្រូវបានប្រកាស។
មនុស្សមួយក្រុមបានធាក់ទ្វារកញ្ចក់ ហើយសម្រុកចូលទៅក្នុងវិមានរដ្ឋាភិបាលនៅក្នុងរដ្ឋធានីយ៉េរ៉េវ៉ាន់ ដោយទាមទារជួបនាយករដ្ឋមន្ត្រីអាមេនី លោក នីកូល ផាស៊ីនយ៉ាន (Nikol Pashinyan)។ ប្រទេសអាមេនី, អាស៊ែបៃហ្សង់ និងរុស្ស៊ី បានប្រកាសថា ពួកគេបានចុះហត្ថលេខាលើកិច្ចព្រមព្រៀងដើម្បីបញ្ចប់ជម្លោះយោធាពាក់ព័ន្ធនឹងតំបន់ណាហ្គ័រណូ ការ៉ាបាក់ (Nagorno-Karabakh) បន្ទាប់ពីមានការបង្ហូរឈាមអស់រយៈពេលជាងមួយខែ។
ទៅតាមកិច្ចព្រមព្រៀង ដែលចុះ ហត្ថលេខាដោយ លោកប្រធានាធិបតី អាស៊ែបៃហ្សង់ នាយករដ្ឋមន្ត្រី អាមេនី និងប្រធានាធិបតី រុស្ស៊ី បទឈប់បាញ់មួយ ត្រូវចូលជាធរមាន ចាប់ពីយប់ថ្ងៃចន្ទ នៅក្នុងតំបន់ការ៉ាបាក់ ជាទីដែលការប្រយុទ្ធគ្នា រវាង កងទ័ពអាស៊ែបៃហ្សង់ និងពួកឧទ្ទាមផ្តាច់ទឹកដី អាមេនី បានសម្លាប់មនុស្សជាច្រើនពាន់នាក់។
នៅក្នុងក្របខ័ណ្ឌនៃកិច្ចព្រមព្រៀង ដែលផ្ចុងផ្តើមដោយរុស្ស៊ី ភាគីជម្លោះអាចរក្សាទឹកដី ដែលខ្លួនកំពុងឈរជើង កាន់កាប់ សព្វថ្ងៃ។ កិច្ចព្រមព្រៀងនេះបានផ្តល់ជ័យជំនះ ដ៏ធំធេងទៅឲ្យភាគី អាស៊ែបៃហ្សង់ ដែលមានប្រៀបលើកម្លាំងទ័ពអាមេនី ដោយ វាយដណ្តើមយកបានទឹកដីមួយផ្នែករបស់ការ៉ាបាក់ នៅក្នុងសង្គ្រាម ជាង៦សប្តាហ៍មកនេះ។ ជារួម អាស៊ែបៃហ្សង់អាច គ្រប់គ្រងទីក្រុងធំទី២របស់តំបន់ការ៉ាបាក់ ចំណែកទឹកដី នៅសល់ដែលអាមេនីនៅកាន់កាប់ នៅតែជារបស់អាមេនី ដោយរួមទាំង ច្រករបៀង មួយដែលតភ្ជាប់រដ្ឋធានី របស់តំបន់ការ៉ាបាក់ទៅកាន់ទឹកដី អាមេនី។កងទ័ពរក្សាសន្តិភាពរបស់រុស្ស៊ី ជិត ២ពាន់នាក់ ត្រូវបញ្ជូនទៅកាន់តំបន់សមរភូមិមុខ នៅតំបន់ការ៉ាបាក់ ដើម្បី តាមដាន ការអនុវត្តកិច្ចព្រមព្រៀង ស្តីពីបទឈប់បាញ់។
នៅក្រោយកិច្ចព្រមព្រៀង នៅថ្ងៃចន្ទ ប្រជាជនដែលផ្លាស់ទី ដោយសារការប្រយុទ្ធគ្នាកន្លងមកអាចធ្វើដំណើរទៅរស់នៅតាមភូមិឃុំរបស់ខ្លួនឡើងវិញ ចំណែកការដោះដូរអ្នកទោសសង្គ្រាមរវាងភាគីជម្លោះទាំងពីរនឹងអាចប្រព្រឹត្តទៅក្នុងពេលឆាប់ៗខាងមុខ។ តំបន់ការ៉ាបាក់ត្រូវបានសហគមន៍អន្តរជាតិទទួលស្គាល់ថា ជាផ្នែកមួយនៃទឹកដី របស់អាស៊ែបៃហ្សង់។ ប៉ុន្តែ ការ៉ាបាក់ ដែលសំបូររស់នៅដោយប្រជាជនអាមេនី កាន់គ្រឹស្តសាសនា ត្រូវបានក្រុមឧទ្ទាម គាំទ្រដោយអាមេនី ប្រកាសផ្តាច់ទឹកដី ពីអាស៊ែបៃហ្សង់ តាំងពីឆ្នាំ ១៩៩០។
នៅក្រោយចុះកិច្ចព្រមព្រៀង ដែលមានការយល់ព្រមពីប្រមុខដឹកនាំឧទ្ទាមនៅការ៉ាបាក់ នាយករដ្ឋមន្ត្រី អាមេនី បានទទួលស្គាល់ថា កិច្ចព្រមព្រៀង កាលពី ថ្ងៃចន្ទ ជាកិច្ចព្រមព្រៀងដ៏ឈឺចាប់ ប៉ុន្តែ វាជាការចាំបាច់ ពីព្រោះថា អ្នកជំនាញយុទ្ធសាស្ត្រ បានផ្តល់យោបល់ថា ប្រឈមនឹងការវាយប្រហារ ឈ្លានពានកាន់តែសាហាវរបស់អាស៊ែបៃហ្សង់ ដែលបានចូលដណ្តើមកាន់កាប់ទឹកដី កាន់តែធំរបស់ការ៉ាបាក់ អាមេនី នឹងអាចបាត់បង់ ទឹកដី ច្រើនជាងនេះ បើសិនមិនចុះកិច្ចព្រមព្រៀងទៅតាមការណែនាំរបស់រុស្ស៊ី។ប្រធានាធិបតី អាស៊ែបៃហ្សង់ ឯណោះវិញ បានប្រកាសតាមកញ្ចក់ទូរទស្សន៍ ពីជ័យជំនះ ដ៏ធំធេងរបស់អាស៊ែបៃហ្សង់ នោះបើទោះបីអាស៊ែបៃហ្សង់មិនអាចវាយដណ្តើមកាន់កាប់យកតំបន់ការ៉ាបាក់បានទាំងស្រុង ក៏ដោយ៕
