ឥណ្ឌា១ថ្ងៃឆ្លង១៦ម៉ឺននាក់ជំនាញការអាមេរិកថាវិរុសកូវីតថ្មីឆ្លងលឿនសាហាវ

ឥណ្ឌា៖ទិន្នន័យរបស់ក្រសួងសុខាភិបាលឥណ្ឌាចេញផ្សាយនៅថ្ងៃចន្ទទី១២មេសាឲ្យដឹងថានេះ ប្រទេសឥណ្ឌាមានករណីឆ្លងជំងឺកូវីដ១៩ចំនួន១៦៨,៩១២នាក់គឺក្នុងរយៈពេល២៤ម៉ោងប៉ុនណោះក្លាយជាប្រទេសរងគ្រោះខ្លាំងជាងគេបំផុតទី២នៅលើពិភពលោក។ 

ចំនួនអ្នកឆ្លងសរុបនៅក្នុងប្រទេសឥណ្ឌាឡើងដល់១៣.៥៣លាននាក់កើនលើសចំនួនអ្នកឆ្លងនៅប្រេស៊ីលដែលមានចំនួន១៣.៤៥លាននាក់ ខណៈដែលអាមេរិកនៅតែបន្តនាំមុខដោយមានចំនួនអ្នកឆ្លងសរុប៣១.២លាននាក់។ទិន្នន័យរបស់ក្រសួងសុខាភិបាលឥណ្ឌាបានបង្ហាញផងដែរថា ចំនួនអ្នកស្លាប់ដោយសារជំងឺកូវីដ១៩មាន៩០៤នាក់ថែមទៀតដោយធ្វើឲ្យចំនួនសរុបកើនដល់ជាង១៧ម៉ឺននាក់។មកទល់ពេលនេះ ប្រទេសឥណ្ឌាចាក់វ៉ាក់សាំងការពារជំងឺកូវីដ១៩ដល់ពលរដ្ឋបានចំនួន១០៤.៥លានដូសហើយ។

ប្រឈមនឹងសន្ទុះចម្លងឡើងខ្លាំងដូច្នេះ ឥណ្ឌាបានចេញសេចក្តីសម្រេចនៅថ្ងៃ អាទិត្យទី ១១មេសាម្សិលមិញ ហាមឃាត់ការនាំចេញ សម្រាប់ព្យាបាលជំងឺកូវីដ១៩ remdesivir ទៅបរទេសទៀតទេ។ថ្នាំប្រឆាំងវីរុស Remdesivir ជាថ្នាំដំបូងគេមួយ ដែលត្រូវបានគេយកមកប្រើប្រាស់សម្រាប់ព្យាបាលជំងឺកូវីដ១៩ ដោយមានសមត្ថភាពអាចជួយអ្នកជំងឺកូវីដ១៩ឱ្យឆាប់បានធូរស្បើយពីជំងឺ។ តែបើតាមការសិក្សារបស់អង្គការសុខភាពពិភពលោកថ្នាំ Remdesivir មានប្រសិទ្ធភាពតិច ឬមិនអាចទប់ស្កាត់បានសោះតែម្តងគ្រោះមរណៈដោយជំងឺកូវីដ១៩។Remdesivir ជាផលិតផលរបស់មន្ទីរពិសោធន៍ឱសថអាមេរិក Gilead ដែលកាលពីឆ្នាំទៅ បានចុះហត្ថលេខាផ្តល់សិទ្ធិឱ្យឥណ្ឌា ប៉ាគីស្ថាន និងអេហ្ស៊ីប ជួយផលិតសម្រាប់យកទៅលក់និងចែកចាយព្យាបាលជំងឺកូវីដ១៩ ក្នុងប្រទេសក្រីក្រ មានចំណូលទាប ចំនួន ១២៧ប្រទេស។ មានក្រុមហ៊ុនឱសថឥណ្ឌាចំនួន៧ បានទទួលសិទ្ធិនេះ និងផលិតថ្នាំនេះបានចំនួនដល់ទៅ ជាង៣,៨៨លានដូសក្នុងមួយខែៗ។

សូមបញ្ជាក់ថាអ្នកជំនាញផ្នែកជំងឺឆ្លងរបស់អាមេរិកបាននិយាយថា វ៉ារីយ៉ង់វីរុសកូវីដ១៩ «បំប្លែងខ្លួនទ្វេដង» ដែលត្រូវបានគេរកឃើញដំបូងនៅប្រទេសឥណ្ឌាគឺមានសមត្ថភាពឆ្លងលឿននិងគ្រោះថ្នាក់ជាង ហើយនឹងនាំមកនូវភាពមិនច្បាស់លាស់ថែមទៀតចំពោះកិច្ចខិតខំប្រឹងប្រែងប្រឆាំងជំងឺរាតត្បាតនៅក្នុងសហរដ្ឋអាមេរិក។

កាលពីពេលថ្មីៗនេះ គេបានរកឃើញករណីឆ្លងវីរុសកូវីដ១៩បំប្លែងខ្លួនទ្វេដងនេះចំនួន៥នាក់នៅក្នុងទីក្រុង សាន់ហ្វ្រាន់ស៊ីស្កូ (San Francisco) ហើយសេចក្តីរាយការណ៍ជាច្រើនបាននិយាយថា វាមានសមត្ថភាពឆ្លងលឿនជាងវីរុសកូវីដ១៩ធម្មតា ហើយវ៉ាក់សាំងមានប្រសិទ្ធភាពតិចតួចក្នុងការប្រឆាំងនឹងវ៉ារ្យង់នេះ។

អ្នកជំនាញបាននិយាយថា «ចំនួនអ្នកចាក់វ៉ាក់សាំងនៅអាមេរិកមិនទាន់មានភាគរយខ្ពស់គ្រប់គ្រាន់នៅឡើយទេ ដូច្នេះវានៅតែមានលទ្ធភាពនៃការបន្តឆ្លងរាលដាល ហើយថែមទាំងធ្វើឲ្យកម្រិតនៃការឆ្លងកើនឡើងផងដែរ»។ សហរដ្ឋអាមេរិកកំពុងនៅឆ្ងាយពីការឈានទៅដល់ការបង្កើតប្រព័ន្ធភាពស៊ាំជាសហគមន៍ដោយសារតែកម្មវិធីចាក់វ៉ាក់សាំងនៅក្នុងប្រទេសនេះមានបញ្ហាជាច្រើន៕