វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 3701 នាក់
ម្សិលមិញ 5544 នាក់
សរុប 13944798 នាក់
ភ្នំពេញ៖ លោក ឃួង ស្រេង អភិបាលរាជធានីភ្នំពេញ បាន បញ្ជាឲ្យមន្ដ្រីជំនាញ ស្ដារប្រឡាយនៅមុខ ស្ថានីយបូមទឹក ទួលគោកទី២ ដើម្បីពន្លឿនការរំដោះទឹកលិចលង់នៅតំបន់បឹងកក់ទី១, បឹងកក់ទី២ និងទី៣ នូវរដូវវស្សាឆ្នាំនេះ ខណៈសំណង់ស្ថានីយ៏ទួលគោកទី២ ត្រូវបានសាងសង់រួចរាល់ហើយនោះ ។
លោក ឃួង ស្រេង បញ្ជាបែបនេះ ខណៈលោកដឹកនាំមន្ដ្រីជំនាញក្រោមឱវាទចុះពិនិត្យប្រឡាយលូ និងស្ថានីយ៏បូបទឹកទួលគោកទី២ កាលពីថ្ងៃទី២៥ កញ្ញា ឆ្នាំ២០២០ នៅក្នុងសង្កាត់បឹងកក់ទី១ ខណ្ឌទួលគោក ។ លោកអភិបាល បញ្ជាក់ដែរថា៖ បច្ចុប្បន្ននេះ រដ្ឋបាលរាជធានីភ្នំពេញកំពុងដោះស្រាយបញ្ហាលិចលង់ដោយទឹកជំនន់ទឹកភ្លៀងនៅក្នុងរាជធានីភ្នំពេញ ដោយបានកសាងបណ្តាញលូជាច្រើនខ្សែនៅក្នុងរាជធានីភ្នំពេញ ពិសេសថែមទៀតនោះ គឺការកសាងស្ថានីយបូមទឹកធំៗជាច្រើនកន្លែងដែលមានសមត្ថភាពបូមទឹក ៥ម៉ែត្រគូបក្នុង១វិនាទី គឺកើន ៣ដងធៀបនឹងស្ថានីយបូមទឹកចាស់ៗ ។
សម្រាប់ថ្ងៃនេះ ដើម្បីជម្រុញការងារខាងលើឲ្យបានល្អនិងទាន់ពេលវេលា រដ្ឋបាលរាជធានីភ្នំពេញ បានចុះពិនិត្យស្ថានភាពប្រឡាយ ស្ថានីយទួលគោកទី២ ដើម្បីឲ្យមន្ដ្រីជំនាញចុះកាយ ស្ដារប្រឡាយ ក្នុងបំណងរំដោះការលិចលង់ នៅតំបន់មួយចំនួននៅទួលគោកនិងនៅសង្កាត់ស្រះចក ខណ្ឌដូនពេញជាដើម ។
លោកឃួង ស្រេង ក្នុងឱកាសនោះក៏ បានណែនាំឲ្យមន្ទីរពាក់ព័ន្ធ ពិសេសមន្ទីរសាធារណការនិងដឹកជញ្ជូនរាជធានីភ្នំពេញ ជំរុញលើកគម្រោងការ ស្ថាបនាបុកស៊ីផាយ និងសាងសង់ផ្លូវជាប់ប្រឡាយស្ថានីយទួលគោកទី២ ដើម្បីរំដោះការលិចលង់ ដោយត្រូវចាប់ផ្តើមដំណើរការឲ្យបានឆាប់ ពោលគឺអាចចាប់ផ្តើមឲ្យលឿនកាន់តែល្អ ។
លោកឃួង ស្រេង ក៏បានជំរុញឲ្យអាជ្ញាធរ និងមន្ទីរជំនាញពាក់ព័ន្ធទាំងអស់ត្រូវចុះមើលផ្លូវ លូ កន្លែង ណាដែល លិចតិចឬ ច្រើន ដើម្បីរកដំណោះស្រាយពីការលិចលង់នេះ ពេលមានភ្លៀងធ្លាក់ខ្លាំង ។ មានន័យថា កន្លែងណាដែល មានលូស្ទះមិនដំណើរការ យើងចាប់ផ្តើមស្តារភ្លាមតែម្តង។ ការស្ថាបនាបុកស៊ីផាយនិងសាងសង់ផ្លូវជាប់ប្រឡាយស្ថានីយទួលគោកទី២នេះ តាមគម្រោងមានតួប្រឡាយទំហំ១៣ម៉ែត្រនិងផ្លូវនៅជាប់មាត់ ប្រឡាយទំហំ៥ម៉ែត្រ។ ចំណែកកំណាត់ផ្លូវរថភ្លើងចាប់ពីផ្លូវ៧០(ទំនប់ទួលគោក) ដល់ ផ្លូវR 10ក៏និងត្រូវស្ថាបនាជំនួសផ្លូវរថភ្លើងទំហំទទឹង១០ម៉ែត្រផងដែរ ។
មន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា៖ ក្រោយពីស្ថាបនាប្រឡាយស្ថានីយទួលគោកទី២នេះរួចតំបន់មួយចំនួនដែលធ្លាប់លិចលង់នៅតំបន់ សង្កាត់ បឹងកក់ទី១ទី២ទី៣ខណ្ឌទួលគោក និងនៅសង្កាត់ស្រះចកខណ្ឌដូនពេញ នឹងលែងទទួលរងការលិច លង់ហើយ។
សូមបញ្ជាក់ថា៖ ស្ថានីយបូមទឹកទួលគោកទី២នេះ ត្រូវបានបំពាក់ម៉ូទ័របូមទឹកចំនួន៥គ្រឿង ដែលមាន សមត្ថភាពបូម៥ម៉ែត្រគូបក្នុង១វិនាទី បន្តទៅប្រឡាយ អូរបាក់ទូកដោយចាប់ពីផ្លូវទំនប់៧០រហូតដល់ផ្លូវបុរី ទួលសង្កែ ប្រវែង ៣៧០០ម៉ែត្រ ទទឹងចាប់ពី១០ម៉ែត្រទៅ៥០ម៉ែត្រ បច្ចុប្បន្ននេះត្រូវបានស្ថាបនារួចអាចរំដោះទឹកចេញពីតំបន់ទួលគោក តំបន់ស្រះចក ខណ្ឌដូនពេញ និងតំបន់ទួលសង្កែ ឬអាចនិយាយបានថា អាចរំដោះទឹកពីភាគខាងជើងរាជធានីភ្នំពេញតែម្តង៕