ពិភពលោកមានប្រតិកម្មចំពោះការស្លាប់ លោក George Floydជនជាតិអាមេរិកស្បែកខ្មៅ
15-March-2026 / ព័ត៌មានអន្តរជាតិ
អាមេរិក៖ នៅតាមទីក្រុងមួយចំនួននៅលើពិភពលោកពិសេសប្រទេសអ៊ឺរ៉ុបកាលពីថ្ងៃសៅរ៍ និងថ្ងៃអាទិត្យបានផ្ទុះការតវ៉ា ដើម្បីបង្ហាញសាមគ្គីភាព ជាមួយនឹងក្រុមអ្នកតវ៉ានៅក្នុងសហរដ្ឋអាមេរិក ទាក់ទិននឹងការស្លាប់របស់លោក George Floyd ពលរដ្ឋអាមេរិកដើមកំណើតអាហ្វ្រិក ដែលបានស្លាប់ដោយសារប៉ូលិសស្បែកសម្នាក់ក្នុងចំណោម៣នាក់នៅក្នុងទីក្រុង Minneapolis រដ្ឋ Minnesota សង្កត់ជង្គង់ពីលើករបស់លោកអស់ជាង ៨នាទីបណ្តាលឲ្យថបដង្ហើមស្លាប់ ។
វីដេអូដែលគេថាបានឭលោក Floyd និយាយពីរបីដងថា៖ «ខ្ញុំមិនអាចដកដង្ហើមបានទេ»តែប៉ូលិសរូបនោះនៅតែមិនព្រមឈប់ ។ ការតវ៉ាទាំងនេះបានធ្វើឡើងនៅក្រៅស្ថានទូតសហរដ្ឋអាមេរិកនៅតាមប្រទេសមួយចំនួន ។ នៅក្នុងទីក្រុងប៊ែរឡាំង ប្រទេសអាល្លឺម៉ង់ កាលពីថ្ងៃអាទិត្យ ពលរដ្ឋអាល្លឺម៉ង់រាប់ពាន់នាក់បានប្រមូលផ្ដុំគ្នា នៅខាងក្រៅស្ថានទូតសហរដ្ឋអាមេរិក ដោយស្រែកបន្ទរថា «ជីវិតពលរដ្ឋស្បែកខ្មៅមានសារៈសំខាន់» ។
កាលពីថ្ងៃអាទិត្យ ក្រុមអ្នកតវ៉ាបានលុតជង្គង់នៅទីលាន Trafalgar កណ្តាលទីក្រុងឡុងដ៍ ដោយស្រែកថា “គ្មានយុត្តិធម៌ គ្មានសន្តិភាព” ហើយបន្ទាប់មកបានដើរឆ្លងកាត់វិមានរដ្ឋសភា និងបញ្ចប់នៅខាងក្រៅស្ថានទូតអាមេរិក ។ ការតវ៉ាអំពីការប្រកាន់ពូជសាសន៍ជាទូទៅដែលមានមនុស្សចូលរួមរាប់ពាន់នាក់ បានធ្វើឡើងនៅក្នុងទីក្រុងតូរ៉ង់តូ ប្រទេសកាណាដា កាលពីថ្ងៃសៅរ៍ ។
នាយករដ្ឋមន្ត្រីកាណាដាលោក Justin Trudeau និយាយកាលពីថ្ងៃសុក្រយោងលើការស្លាប់របស់លោក Floyd នៅក្នុងអត្ថបទមួយក្នុងកាសែត The Washington Post ថា៖ «ការប្រកាន់ពូជសាសន៍ គឺមានយ៉ាងច្បាស់ក្រឡែត ។ វាមាននៅក្នុងសហរដ្ឋអាមេរិក ប៉ុន្តែក៏មានផងដែរនៅក្នុងប្រទេសកាណាដា ។ យើងដឹងថា មនុស្សប្រឈមនឹងការរើសអើងជាប្រព័ន្ធ ភាពលំអៀងដោយមិនដឹងខ្លួន និងការប្រកាន់ពូជសាសន៍ប្រឆាំងនឹងពលរដ្ឋស្បែកខ្មៅជារៀងរាល់ថ្ងៃ» ។ នៅទីក្រុងម៉ិចស៊ិក ប្រទេសម៉ិចស៊ិក កាលពីថ្ងៃសៅរ៍ មនុស្សបានគូសរូប និងដាក់ផ្កាគាំទ្រដល់លោក Floyd នៅរបងមួយកន្លែងជិតស្ថានទូតសហរដ្ឋអាមេរិក ។
ឧត្តមស្នងការអង្គការសហប្រជាជាតិទទួលបន្ទុកផ្នែកសិទ្ធិមនុស្ស អ្នកស្រី Michelle Bachelet បានថ្កោលទោសស្ថានការណ៍ពាក់ព័ន្ធនឹងការស្លាប់របស់លោក Floyd ដោយអ្នកស្រីបាននិយាយថា នេះគឺជាហេតុការណ៍ថ្មីចុងក្រោយបង្អស់ «ទាក់ទិននឹងការសម្លាប់ពលរដ្ឋអាមេរិកដើមកំណើតអាហ្វ្រិក ដែលគ្មានអាវុធជាច្រើនលើកច្រើនសារកន្លងមក ដោយប៉ូលិសអាមេរិក និងអ្នកដទៃទៀត» ។
ឯគណៈកម្មការសហភាពអាហ្វ្រិកវិញ កាលពីថ្ងៃសុក្រ បានចេញនូវសេចក្ដីប្រកាសដ៏កម្រមួយដោយប្រើពាក្យខ្លាំងៗ អំពីស្ថានការណ៍តវ៉ានានា ទាក់ទិននឹងការស្លាប់របស់លោក Floyd នេះនៅក្នុងសហរដ្ឋអាមេរិក ។នៅក្នុងសេចក្ដីប្រកាសនោះ ប្រធានគណៈកម្មការសហភាពអាហ្វ្រិក លោក Moussa Faki Mahamat «ថ្កោលទោសយ៉ាងខ្លាំង» ចំពោះទង្វើរបស់ប៉ូលិសទាក់ទិននឹងការស្លាប់របស់លោក Floyd នេះ និងបានចូលរួម «រំលែកទុក្ខចំពោះក្រុមគ្រួសាររបស់លោក»ផងដែរ ៕
