វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2354 នាក់
ម្សិលមិញ 4292 នាក់
សរុប 14112053 នាក់
ប្រទេសប៉ាគិស្ថាន៖ គណៈកម្មាធិការរៀបចំការបោះឆ្នោតប៉ាគីស្ថាននៅថ្ងៃសុក្រទី២១តុលាបានដកសិទ្ធិធ្វើនយោបាយសំរាប់អតីតនាយករដ្ឋមន្ត្រី អ៊ីមរ៉ាន់ ខាន់ ដោយហាមឃាត់មិនអោយកាន់មុខតំណែងសាធារណៈដោយសារតែបានលក់អំណោយរដ្ឋដែលប្រមុខរដ្ឋផ្សេងៗប្រគល់ជូនលោកនិងបិទបាំងទ្រព្យសម្បត្តិ ។ចំណាត់ការនេះមុខជានឹងបង្កចលាចលនយោបាយបន្ថែមទៀតនៅក្នុងប្រទេសក្រីក្រមួយនេះ។
លោក ហ្វាវ៉ាត ឆោឌ្រី(Fawad Chaudhry)នេះបើតាមអ្នកនាំពាក្យរបស់លោកអ៊ីមរ៉ាន់ ខាន់ បានប្រាប់អ្នកយកព័ត៌មានថា គណៈកម្មាធិការរៀបចំការបោះឆ្នោតប៉ាគីស្ថានបានប្រកាសសាលក្រមដែលគេទន្ទឹងរង់ចាំជាខ្លាំងនៅនៅក្នុងរដ្ឋធានីអ៊ីស្លាម៉ាបាត។លោកឆោឌ្រី បានថ្កោលទោសចំណាត់ការនេះ។ការសំរេចចុងក្រោយនេះកើតឡើងប៉ុន្មានខែក្រោយពីសភាបណ្តេញលោកខាន់ចេញពីតំណែងនាយករដ្ឋមន្ត្រីក្នុងការបោះឆ្នោតសម្តែងការមិនទុកចិត្តមួយ។យោងតាមអ្នកជំនាញការច្បាប់ លោកខាន់នឹងបាត់បង់កៅអីសភាផងដែរដោយសារតែសាលក្រមនេះ។
មិនសប្បាយចិត្តនឹងការដកសិទ្ធិនយោបាយលោកខាន់ និងគណបក្សតេរីក អ៊ី អ៊ីនសាហ្វ(Tehreek-e-Insaf)របស់លោកបានទទូចសុំអោយអ្នកគាំទ្រចេញមកតាមដងផ្លូវដើម្បីថ្កោលទោសការសំរេចចិត្តរបស់គណៈកម្មាធិការរៀបចំការបោះឆ្នោត។ប៉ុន្មានថ្ងៃមុននេះលោកខាន់ប្រកាសការដើរដង្ហែរក្បួនធំមួយនៅក្នុងទីក្រុងអ៊ីស្លាម៉ាបាតដើម្បីបង្ខំអោយរដ្ឋាភិបាលរបស់នាយករដ្ឋមន្ត្រី សាបាស សារីហ្វ រៀបចំធ្វើការបោះឆ្នោតមុនកាលកំណត់មួយផងដែរ។
សូមបញ្ជាក់ថា រដ្ឋាភិបាលចំរុះរបស់លោកសារីហ្វបានប្តឹងទៅគណៈកម្មាធិការរៀបចំការបោះឆ្នោតដោយសុំចំណាត់ការប្រឆាំងលោកខាន់ចំពោះការចោទប្រកាន់ថាអតីតមេដឹកនាំរូបនេះបានលក់ដោយខុសច្បាប់អំណោយ(កាដូ)រដ្ឋដែលលោកបានទទួលមកពីប្រមុខរដ្ឋនានាកាលពីលោកនៅកាន់អំណាច។លោកខាន់ក៏ត្រូវបានចោទប្រកាន់ថាបិទបាំងលុយដែលលោកទទួលបានពីការលក់កាដូទាំងនោះ៕ប្រភពដេល្លីម៉េល