វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1816 នាក់
ម្សិលមិញ 6501 នាក់
សរុប 13950371 នាក់
ចិនហុងកុង៖លោកស្រី ខារី ឡាំនាយកប្រតិបត្តិក្រុងហុងកុងបាន បញ្ឈប់ការថ្លែងសុន្ទរកថានៅក្នុងសភាដើម្បីបង្ហាញពីកម្មវិធីគោលនយោបាយរបស់លោកស្រីកាលពីថ្ងៃពុធទី១៦តុលា ដោយសារក្រុមសមាជិកសភាដែលគាំទ្រលទ្ធិប្រជាធិបតេយ្យបានស្រែកបង្ខំដល់ទៅពីរដងហៅលោកស្រីថា “ម៉ែប៉ូលិសម៉ាហ្វីយ៉ា”ហើយបន្ទាប់មកបានអំពាវនាវឱ្យលោកស្រីលាលែងពីតំណែងនៅក្នុងភាពវឹកវរ ដែលបណ្តាលឱ្យលោកស្រីដើរចេញសភានីតិប្បញ្ញត្តិ។
លោកស្រីត្រូវបានក្រុមសមាជិកសភាដែលគាំទ្រលទ្ធិប្រជាធិបតេយ្យ ស្រែកឌឺដងដោយដោយដៃកាន់ផ្ទាំងបដាបង្ហាញរូបបាតដៃលោកស្រីឡាំប្រឡាក់ឈាម។ ពួកគេក៏បានប្រើម៉ាស៊ីនបញ្ចាំងស្លាយដើម្បីបំភ្លឺមុខរបស់លោកស្រីឡាំនិងបញ្ចាំងលើជញ្ជាំងនៅពីក្រោយលោកស្រីជាមួយនឹងការទាមទារសំខាន់ៗរបស់ក្រុមបាតុករផងដែរ។
ទោះមិនបានថ្លែងក្នុងសភាលោកស្រីឡាំបានមកថ្លែងសុន្ទរកថាប្រចាំឆ្នាំជាងមួយម៉ោងតាមរយៈវីដេអូវិញ។ ប៉ុន្តែការស្វាគមន៍ដ៏អរិភាពនៅក្នុងសភាប្រៀបដូចជាការទះកំផ្លៀងចំពោះនាយកប្រតិបត្តិក្រុងហុងកុងរូបនេះ ដែលកំពុងដោះស្រាយមិនចេញនូវការតវ៉ាប្រឆាំងនឹងរដ្ឋាភិបាលពីប្រជាបលរដ្ឋ ដែលឥឡូវនេះឈានចូលដល់ខែទី ៥ ។
តែនៅ៧៥ នាទីបន្ទាប់ពីការចាប់ផ្តើមថ្លែងសុន្ទរកថាដែលបានគ្រោងទុកពីមុន លោកស្រីឡាំបានថ្លែងវាម្តងទៀតតាមរយៈវីដេអូលីង ជាមួយទង់ជាតិចិននៅខាងស្តាំដៃគាត់ និង ទង់ជាតិហុងកុងនៅខាងឆ្វេងដៃគាត់។ទីភ្នាក់ងារ សារព័ត៌មាន ក្យូដូជប៉ុន បានឲ្យដឹងថា៖រដ្ឋាភិបាលហុងកុង គ្រោងនឹងដកជាផ្លូវការ នូវច្បាប់ធ្វើបត្យាប័នចិន ដែលបង្កឱ្យមានការតវ៉ាប្រឆាំង នឹងរដ្ឋាភិបាលរយៈពេល ១៩ សប្តាហ៍កន្លងមក ។
ការផ្លាស់ប្តូរនេះ នឹងធ្វើតាមការអត្ថាធិប្បាយ គោលនយោបាយប្រចាំឆ្នាំ របស់មេដឹកនាំហុងកុងលោកស្រី Carrie Lam នៅក្រុមប្រឹក្សានីតិបញ្ញតិ្ត ដែលក្នុងនោះលោកស្រី ក៏នឹងដោះស្រាយបញ្ហាជីវភាព ដូចជាលំនៅដ្ឋាន និងការផ្គត់ផ្គង់ដីធ្លី។សុន្ទរកថាគោលនយោបាយទី ៣ របស់លោក ស្រី គឺជាការចាប់ផ្តើមនៃសម័យប្រជុំក្រុមប្រឹក្សា នីតិប្បញ្ញត្តិថ្មីចាប់តាំង ពីវាត្រូវបានបង្ខំឱ្យផ្អាក នៅដើមខែកក្កដា នៅពេលដែលក្រុមអ្នកតវ៉ាខ្លះបានលួចចូល និងបំផ្លាញអគារ។
ដោយពណ៌នាទឹកដីចិនពាក់កណ្តាលស្វយ័តនេះកំពុងឆ្លងកាត់ “វិបត្តិធំៗ” លោកស្រីឡាំបាននិយាយថា “ប្រជាជនកំពុងសួរថាតើហុងកុងនឹងវិលមករកភាពប្រក្រតីវិញទេ?”។ លោកស្រីឡាំអំពាវនាវឱ្យប្រជាជន៧,៦លាននាក់ “ចេះស្រឡាញ់ទីក្រុង” ដោយដាស់តឿនថា ការបន្តអំពើហិង្សានិងបាចសាចសេចក្តីស្អប់ខ្ពើមនឹងធ្វើឱ្យបាត់បង់តម្លៃស្នូលរបស់ហុងកុង៕