វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1264 នាក់
ម្សិលមិញ 5378 នាក់
សរុប 14080557 នាក់
ចិន៖នៅថ្ងៃទី១ ខែតុលា ឆ្នាំ២០១៩ ចិនបានធ្វើពិធីព្យុហយាត្រាយោធា អបអរខួប ៧០ឆ្នាំនៃការបង្កើតសាធារណរដ្ឋប្រជាមានិតចិន នៅទីលានធានអានមីន ក្រុងប៉េកាំង។ អ្វីដែលគួរឱ្យ កត់សម្គាល់នោះ ក្នុងពិធីនេះ ចិនក្នុងសម័យលោកប្រធានាធិបតីស៊ីជិងពីងដែលនឹងកាន់អំណាចមួយជីវិតបានបង្ហាញសព្វាវុធមីស៊ីលឆ្លងទ្វីប DF-41, មីស៊ីល DF-17, មីស៊ីលបាញ់ចេញពីនាវាមុជទឹក, យន្តហោះបំបាំងកាយ J-20, ឧទ្ធម្ភាគចក្រ Z-20, យន្តហោះទម្លាក់គ្រាប់បែក H-6N និងរថក្រោះ 99A ជាដើមដើម្បីបញ្ជាក់ពីកម្លាំងការពារជាតិដ៏ខ្លាំងមួយជាមួយការរីកលូតលាស់ខាងសេដ្ឋកិច្ច។
សូមបញ្ជាក់ថា កាលពី ៧០ឆ្នាំមុនក្នុងថ្ងៃទី០១ ខែតុលា លោកម៉ៅ សេទុង បានប្រកាសជាឯកច្ឆន្ទនូវការកកើតឡើងនៃសាធារណរដ្ឋប្រជាមានិតចិន បន្ទាប់ពីដែនដីដ៏ធំនៃអាស៊ីបូព៌ារងភាពញាំញីដោយសង្គ្រាមរយៈពេលជាង ៤ទសវត្ស ក្រោយពីបដិវត្តន៍ផ្ដួលរលំរបបរាជានិយម ដែលមានវត្តមានជាង ៥០០០ឆ្នាំនៅឆ្នាំ១៩១១។
ក្រោយបដិវត្តន៍ឆ្នាំ១៩១១ ចិនបានក្លាយជាសាធារណរដ្ឋ ប៉ុន្តែតាមតំបន់នីមួយៗកាន់កាប់ដោយស្ដេចត្រាញ់ (War Lords)។ ក្នុងនោះដែរ មានបក្សធំៗពីរគឺ បក្សគួកមីនតាំង (KMT ឬ បក្សជាតិនិយម) និងបក្សកុម្មុយនិស្តចិន (CPC)។ បក្សទាំងពីរនេះ បានចងសម្ព័ន្ធភាពនៅពេលដំបូងៗ លុះនៅឆ្នាំ១៩២៧ សម្ព័ន្ធភាពក៏ត្រូវបានផ្ដាច់ ហើយសង្គ្រាមស៊ីវិលក៏ចាប់ផ្ដើម។
សង្គ្រាមរវាងចលនាទាំងពីរបានរីករាលដាលចំនួន ១០ឆ្នាំ ក៏បានផ្អាក ហើយចាប់ដៃគ្នា ដើម្បីប្រឆាំងនឹងជប៉ុន ដែលចូលឈ្លានពានចិននៅឆ្នាំ១៩៣៧។ នៅពេលជប៉ុនចាញ់ សង្គ្រាមស៊ីវិលនៅក្នុងចិនដីគោក ក៏បានបន្តរហូតដល់ឆ្នាំ១៩៤៩។
ចលនាកុម្មុយនិស្តចិនបានកាន់កាប់ចិនដីគោកទាំងមូល លើកលែងតែម៉ាកាវ (ស្ថិតក្រោមអាណានិគមព័រទុយហ្គាល់រហូតដល់ឆ្នាំ១៩៩៩) និងហុងកុង (ស្ថិតក្រោមអាណានិគមអង់គ្លេសរហូតដល់ឆ្នាំ១៩៩៧) ខណៈបក្សគួកមីនតាំង ភៀសទៅកាន់កោះតៃវ៉ាន់។នៅចិនដីគោកហៅថា សាធារណរដ្ឋប្រជាមានិតចិនក៏បានកើតឡើងនៅឆ្នាំ១៩៤៩៕