ប្រយុទ្ធគ្នា ២ថ្ងៃជាមួយអតីតទព័អាសា ក្នុងប្រទេសស៊ីរី សម្លាប់មនុស្សយ៉ាងហោច ១០០០នាក់!
22-January-2026 / ព័ត៌មានអន្តរជាតិ
ប្រទេសស៊ីរី៖ អង្គការឃ្លាំមើលសិទិ្ធមនុស្សស៊ីរី បានឱ្យដឹងកាលពីថ្ងៃសៅរ៍ ទី៨ ខែមីនាថាមានមនុស្សយ៉ាងហោច ១០០០នាក់ ត្រូវបានសម្លាប់នៅក្នុងការវាយប្រយុទ្ធគ្នា ដោយសាការសងសឹកគ្នារវាងកងកម្លាំងសន្តិសុខនៃរបបដឹកនាំស៊ីរីថ្មី ជាមួយក្រុមអ្នកប្រយុទ្ធស្ម័គ្រស្មោះនឹងអតីតប្រធានាធិបតីស៊ីរី ដែលត្រូវបណ្តេញចេញលោកបាសាអាឡាសាដ Bashar al-Assadក្នុងរយៈពេល ២ថ្ងៃមកនេះ ។
ទីភ្នាក់ងារសារព័ត៌មាន Reutersបានឲ្យដឹងថាតាមអង្គការឃ្លាំមើលសិទ្ធិមនុស្សស៊ីរី (Syrian Observatory for Human Rights) ក្នុងចំណោមអ្នកស្លាប់ រួមមានជនស៊ីវិល ៧៤៥នាក់ សមាជិកកងកម្លាំងសន្តិសុខស៊ីរី ១២៥នាក់ និងអ្នកប្រយុទ្ធស្មោះស្ម័គ្រនឹងលោក Assad ១៤៨នាក់។ ប៉ុន្តែ Reuters មិនទាន់ឯកផ្ទៀងផ្ទាត់តួលេខអ្នកស្លាប់ដោយឯករាជ្យបាននៅឡើយទេ។ប្រធានអង្គការឃ្លាំមើលសិទ្ធិមនុស្សស៊ីរី លោក Rami Abdulrahman បាននិយាយថាការវាយប្រយុទ្ធគ្នាបានកើតឡើងក្នុងតំបន់ Jableh Baniyas និងទីតាំងស្ថិតនៅជុំវិញតំបន់ Alawite ហើយជនរងគ្រោះរួមមានទាំងស្ត្រី និងកុមារមកពីសហគមន៍ជនជាតិភាគតិច Alawite ផងដែរ។
ពួកក្រុមប្រដាប់អាវុធនៅប្រទេសស៊ីរី បានប្រយុទ្ធគ្នាជាថ្មី និងបណ្តាលឲ្យស្លាប់ពលរដ្ឋស៊ីវិល ជាង ៧០០នាក់ ហើយអ្នកស្លាប់ ៣០០នាក់ទៀត ជាយោធា និងកងរក្សាសន្តិសុខ។ អំពើហិង្សាសម្លាប់គ្នានេះវាបាន ផ្ទុះឡើងជាច្រើនថ្ងៃជាប់គ្នា ជាលើកទី១ចាប់ពីថ្ងៃព្រហស្បតិ៍ ទី៦មីនាមក ដែលបង្កឡើងដោយពួកជាតិពន្ធុមួយក្រុម និងក្រុមយោធាគាំទ្ររបបដឹកនាំស៊ីរីចាស់ របស់អតីតប្រធានាធិបតី បាស្ហា អាល់អាសាដ។ ករណីយ៍នេះនៅថ្ងៃអាទិត្យ ទី៩មីនា ប្រមុខដឹកនាំស៊ីរីថ្មី បានចេញមុខអំពាវនាវឲ្យរក្សាសន្តិភាព។គួរបញ្ជាក់ថា លោក បាស្ហា អាល់អាសាដ ក៏ជាខ្សែស្រឡាយសហគមន៍ក្រុមជាតិពន្ធុ Alaouite នេះដែរ។ មុននឹងរត់ភៀសខ្លួនទៅជ្រកកោននៅក្រុងម៉ូស្គូ ប្រទេសរុស្ស៊ី មេដឹកនាំផ្តាច់ការលោក អាសាដ បានត្រូវផ្តួលរំលំពីសំណាក់ក្រុមប្រដាប់អាវុធចលនាអ៊ីស្លាម HTS ប្រកាន់និកាយស៊ុននីត។
ប្រមុខដឹកនាំស៊ីរីថ្មី លោក Ahmed al Charaa បានចេញមុខថ្លែងតាមវីដេអូ ប្រកាសឲ្យគ្រប់ភាគីបង្រួបបង្រួមសាមគ្គីគ្នា ដើម្បីរក្សាសន្តិភាពសម្រាប់ប្រជាជាតិស៊ីរី។ ក្រៅពីថ្កោលទោសពួកបាត់ដៃប្រឡាក់ឈាមដែលសម្លាប់ពលរដ្ឋស៊ីវិលស្លូតត្រង់ លោកប្រធានាធិបតីបណ្តោះអាសន្នរូបនេះ ក៏បានសន្យាតាមអូសកជនបង្កអំពើហិង្សា មកកាត់ទោសតាមផ្លូវច្បាប់។ បើតាមប្រភពពីទីភ្នាក់ងារព័ត៌មាន Sana ប្រមុខដឹកនាំស៊ីរីថ្មីបានព្រមានដាស់តឿនឲ្យពួកប្រដាប់អាវុធប្រឆាំង ពិសេសពួកបះបោល Alaouite ឲ្យទម្លាក់អាវុធចុះចាញ់ មុននឹងយឺតពេលជ្រុលហួស។
ក្រសួងការពារជាតិស៊ីរីបានប្រកាសបិទផ្លូវក្នុងបណ្តាខេត្តដែលផ្ទុះភាពចលាចល ដើម្បីរៀបចំសណ្តាប់ធ្នាប់ឡើងវិញ ហើយ អាជ្ញាធរស៊ីរីថ្មី បញ្ជាក់ថាបានចាប់ខ្លួនជនសង្ស័យជាក្រុមប្រដាប់អាវុធ ចំនួនច្រើននាក់។ ចំណែកឯ រដ្ឋមន្ត្រីក្រសួងអប់រំស៊ីរី Nazir al-Qadri បានប្រកាសបិទសាលា នៅថ្ងៃអាទិត្យនិងថ្ងៃចន្ទ ក្នុងខេត្តដែលផ្ទុះជម្លោះ នៅទិសឧត្តរនិងបស្ចិមនៃផ្ទៃប្រទេស។នៅឆាកអន្តរជាតិ ថ្មីៗនេះ ប្រទេសសម្ព័ន្ធអារ៉ាប់ និងអង្គការសហប្រតិបត្តិការអ៊ីស្លាម ទើបតែសម្រេចអនុញ្ញាតឲ្យថ្នាក់ដឹកនាំស៊ីរីថ្មី ចូលរួមប្រជុំកំពូលនៅអេហ្ស៊ីប និងប្រជុំថ្នាក់រដ្ឋមន្ត្រីនៅអារ៉ាប៊ីសាអូឌីត ក្រោយបានព្យួរសមាជិកភាពរបស់ស៊ីរី តាំងពីឆ្នាំ២០១១មក។គួរបញ្ជាក់ថា អាជ្ញាធរនៃរបបដឹកនាំស៊ីរីថ្មី បានបើកប្រតិបត្តិការបង្ក្រាបនូវអ្វីដែលពួកគេហៅថាជាសកម្មភាពបះបោរ បន្ទាប់ពីកងកម្លាំងរបស់ខ្លួនរងការវាយប្រហារពីសំណាក់ ក្រុមអ្នកប្រយុទ្ធដែលមានភក្ដីភាពជាមួយអតីតប្រធានាធិបតីស៊ីរី លោក Assad កាលពីពេលថ្មីៗនេះ។
