ប្រធានាធិបតីប៉ាឡេស្ទីនចង់បិទបញ្ចប់ ការត្រួតត្រារបស់អ៉ីស្រាអែល តាមរយៈជំហាននយោបាយថ្មី
11-February-2026 / ព័ត៌មានអន្តរជាតិ
ប៉ាឡេស្ទីន៖ ប្រធានាធិបតីប៉ាឡេស្ទីន លោក ម៉ាហ៍មួដ អាប់បាស់ (Mahmoud Abbas) បាននិយាយនៅថ្ងៃចន្ទសប្ដាហ៍នេះថា ជំហាននយោបាយថ្មីមួយ គួរតែត្រូវបានបើកចំហ ដើម្បីបិទបញ្ចប់ការត្រួតត្រារបស់អ៉ីស្រាអែល។
សារព័ត៌មានចិន CGTN នៅល្ងាចថ្ងៃអង្គារ ទី០៤ ខែមករា ឆ្នាំ២០២២បានឲ្យដឹងថា៖លោក លោក ម៉ាហ៍មួដ អាប់បាស់ (Mahmoud Abbas) បានធ្វើការកត់សម្គាល់ខាងលើនេះ នាឱកាសចូលរួមក្នុង កិច្ចប្រជុំក្រុមប្រឹក្សាបដិវត្តន៍នៃគណបក្ស ហ្វាតាហ៍ (Fatah) របស់លោក និងត្រូវបានដកស្រង់សម្ដី ដោយទីភ្នាក់ងារសារព័ត៌មានប៉ាឡេស្ទីន WAFA។ លោក Abbas ថា «ប៉ាឡេស្ទីននឹងមិនយល់ព្រមស្ថិតនៅក្រោម ការត្រួតត្រារបស់អ៉ីស្រាអែលជារៀងរហូតនោះទេ ហើយការត្រួតត្រាត្រូវតែបញ្ចប់ អនុលោមតាមច្បាប់អន្តរជាតិ និងយន្ដការ ក្វត (Quarte)»។
គួរបញ្ជាក់ថា Quarte គឺសំដៅទៅលើយន្ដការមួយ ដែលត្រូវបានបង្កើតឡើងកាលពីឆ្នាំ២០០២ ក្នុងទីក្រុងម៉ាឌ្រីដ ប្រទេសអេស្ប៉ាញ ដោយអង្គការសហប្រជាជាតិ, សហរដ្ឋអាមេរិក, សហភាពអឺរ៉ុប និងរុស្ស៊ី។ យន្ដការនេះមានគោលដៅសម្របសម្រួល ក្នុងការស្វែងរកសន្តិភាពរវាងអ៉ីស្រាអែល និងប៉ាឡេស្ទីន។
សូមបញ្ជាក់ដែរថាកាលពីថ្ងៃទី២៨ ធ្នូ ឆ្នាំ ២០២១ កន្លងទៅថ្មីៗនេះ ប្រមុខរដ្ឋអំណាចប៉ាឡេស្ទីនលោកម៉ាមូដ អាបាស់បានជួបសន្ទនាជាមួយរដ្ឋមន្ត្រីការពារជាតិអ៊ីស្រាអែលលោកបេននី ហ្កង់នៅក្នុងគេហដ្ឋានក្នុងទឹកដីអ៊ីស្រាអែល។ សេចក្តីប្រកាសព័ត៌មានផ្លូវការរបស់អ៊ីស្រាអែល កម្មវត្ថុនៃជំនួបរវាងលោកអាបាស់ និងលោកហ្កង់ផ្តោតសំខាន់លើការសម្របសម្រួលសន្តិសុខ និងសំណុំរឿងមនុស្សធម៌មួយចំនួន។
ជំនួបរវាងប្រមុខរដ្ឋអំណាចប៉ាឡេស្ទីនលោកម៉ាមូដ អាបាស់ និងរដ្ឋមន្ត្រីការពារជាតិអ៊ីស្រាអែលលោកបេននី ហ្កង់ជាជំនួបពិសេស។ ទី១ ជំនួបនេះមិនត្រូវបានគេប្រកាសឲ្យដឹងជាមុន ហើយទី២ ជំនួបនេះមិនដឹងផ្តួចផ្តើមឡើងដោយអ្នកណាមុនទេ។ កំណត់សម្គាល់មួយទៀត នេះជាលើកទី១ ក្នុងរយៈពេល ១១ឆ្នាំដែលលោកអាបាស់បានធ្វើដំណើរទៅកាន់ទឹកដីអ៊ីស្រាអែល។ ក្រៅពីបានទៅចូលរួមបុណ្យសពនាយករដ្ឋមន្ត្រីអ៊ីស្រាអែលលោកស្ហ៊ីម៉ុន ប៉េរ៉េក្នុងឆ្នាំ ២០១៦ ។ លោកអាបាស់ និងរដ្ឋមន្ត្រីការពារជាំតិអ៊ីស្រាអែលធ្លាប់បានជួបគ្នាចុងក្រោយកាលពីខែសីហាឆ្នាំ ២០២១ នៅទីស្នាក់ការរបស់រដ្ឋអំណាចប៉ាឡេស្ទីនក្នុងទីក្រុងរ៉ាម៉ាឡាដែនដីប៉ាឡេស្ទីន។
ក្នុងជំនួប២ម៉ោងតាមព័ត៌មានផ្លូវការពីអ៊ីស្រាអែល លោកអាបាស់ និងលោកហ្កង់បានជជែកគ្នាលើប្រធានបទស្តីពីការសម្របសម្រួលផ្នែកសន្តិសុខ និងប្រធានរឿងមនុស្សធម៌ផ្សេងទៀត។ នៅក្នុងជំនួបរវាងប្រមុខរដ្ឋអំណាចប៉ាឡេស្ទីន និងរដ្ឋមន្ត្រីការពារជាតិអ៊ីស្រាអែល គឺមានការដោះដូរកាដូរវាងគ្នាដោយលោកអាបាស់ឲ្យលោកហ្កង់នូវប្រេងអូលីវមួយដបជាថ្នូរនឹងកាដូពីលោកហ្កង់ ក្នុងនោះ មានប្រាក់ជាង ៣០លានដុល្លារ លិខិតអនុញ្ញាតឲ្យចូលទឹកដីអ៊ីស្រាអែលសម្រាប់អ្នកជំនួញប៉ាឡេស្ទីនប្រមាណ ១០០នាក់ រួមទាំងប័ណ្ណ VIP ប្រមាណជា ១០សន្លឹកសម្រាប់សមាជិករបស់រដ្ឋអំណាចប៉ាឡេស្ទីន។ ទោះបីយ៉ាងណា លុយជាង ៣០លានដុល្លារនេះជាលុយចំណូលពន្ធរបស់ប៉ាឡេស្ទីនដែលអ៊ីស្រាអែលជាអ្នកប្រមូល និងបានផ្អិបទុក ។
សព្វថ្ងៃនេះ រដ្ឋអំណាចប៉ាឡេស្ទីនកំពុងជួបវិបត្តិខ្វះថវិកាដោយសារតែមានការកាត់បន្ថយការចូលរួមជួយពីបរទេស និងវិធានការតឹងរឹងរបស់អ៊ីស្រាអែលលើតំបន់ស៊ីហ្សកដានី។ របាយការណ៍របស់សន្និសីទនៃអង្គការសហប្រជាជាតិស្តីពីពាណិជ្ជកម្ម និងអភិវឌ្ឍន៍ចេញផ្សាយក្នុងខែវិច្ឆិកា ឆ្នាំ ២០២១ បានឲ្យដឹងថា វិធានការតឹងរឹងរបស់អ៊ីស្រាអែលលើតំបន់ស៊ីហ្សកដានីបានធ្វើឲ្យសេដ្ឋកិច្ចប៉ាឡេស្ទីនខាតបង់ជិត ៥៨ ០០០លានដុល្លារនារយៈពេលជិត ២០ឆ្នាំចុងក្រោយនេះ។ ប្រជាជនប៉ាឡេស្ទីន និងប្រទេសអារ៉ាប់មួយចំនួន រួមទាំងបស្ចិមប្រទេសជាច្រើនផង គឺចង់ឃើញប៉ាឡេស្ទីនមានរដ្ឋស្របច្បាប់មួយរស់ក្បែរអ៊ីស្រាអែលជិតខាង។
ចលនាប៉ាឡេស្ទីនហាម៉ាស់ដែលជាក្រុមប្រឆាំងនឹងចលនាប៉ាឡេស្ទីនហ្វាតារបស់អាបាស់បានវាយប្រហារ រិះគន់លោកអាបាស់យ៉ាងខ្លាំង។ ចលនាហាម៉ាស់ ចោទលោកអាបាស់ដែលទៅជួបលោកហ្កង់ដល់ទឹកដីអ៊ីស្រាអែលជាអំពើក្បត់ ជាទង្វើបំបែកបំបាក់ផ្ទៃក្នុងប៉ាឡេស្ទីន និងជាការជួយលើកទឹកចិត្តបណ្តាប្រទេសក្នុងតំបន់ឲ្យភ្ជាប់ទំនាក់ទំនងប្រក្រតីជាមួយអ៊ីស្រាអែល។ « ទំនាក់ទំនងរវាងរដ្ឋអំណាចប៉ាឡេស្ទីន និងអ៊ីស្រាអែលបានផ្លាស់ប្តូរពីកិច្ចសហប្រតិបត្តិការទៅជាការផ្គាប់ចិត្ត និងការចុះចូល » នេះជាការយល់ឃើញរបស់ឌីមីទ្រី ឌីលីយ៉ានី អ្នកប្រឆាំងម្នាក់នឹងលោកអាបាស់។
លោកម៉ាមូដ អាបាស់មានអាយុ ៦៥ឆ្នាំ និងបានកាន់តំណែងប្រធានរដ្ឋអំណាចប៉ាឡេស្ទីនតាំងពីឆ្នាំ ២០០៥bបន្ទាប់ពីលោកយ៉ាស៊ែរអារ៉ាហ្វាតចូលមរណៈភាព ។តែ ពលរដ្ឋប៉ាឡេស្ទីនជាច្រើនមិនសប្បាយចិត្តចំពោះការដឹកនាំគ្មានប្រសិទ្ធិភាព និងគ្មានច្រកចេញរបស់ថ្នាក់ដឹកនាំខ្លួន។ លទ្ធផលស្ទង់មតិចុងក្រោយឲ្យដឹងថា មានពលរដ្ឋប៉ាស្ទីនជិត ៨០% ចង់ឃើញលោកអាបាស់ចុះចេញពីតំណែង៕
