ក្រុមហ៊ុន រតនៈសម្បត្តិកាប់ឈើនៅភ្នំសំកុសសម្តេចក្រឡាហោម ស ខេង បញ្ជាឲ្យចៅហ្វាយខេត្តពោធិ៍សាត់ រដ្ឋមន្ត្រីក្រសួងបរិស្ថាន ពិនិត្យមើលតែគេសង្ស័យថាអត់បានការ!?
21-September-2026 / ព័ត៌មានជាតិ
ភ្នំពេញៈ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃថ្លែងនៅក្នុងពិធីបុណ្យបញ្ចុះខណ្ឌសីមាព្រះវិហារ និងឆ្លងសមិទ្ធផលនានា នៅវត្តនទីជោត្តនារាម (ហៅវត្តខ្យោកជើង) ស្ថិតនៅក្នុងភូមិខ្យោកជើង ឃុំពពឹស ស្រុកស្វាយអន្ទរ ខេត្តព្រៃវែង កាលពីព្រឹកថ្ងៃទី២៥ ខែឧសភា ឆ្នាំ២០១៩ បានបញ្ជាឲ្យចៅហ្វាយខេត្តពោធិ៍សាត់ រដ្ឋមន្ត្រីក្រសួងបរិស្ថាន និងក្រសួងមហាផ្ទៃ ចុះពិនិត្យមើលករណីលួចកាប់ឈើនៅក្នុងដែនអភិរក្សភ្នំសំកុស ស្ថិតនៅជិតជួរភ្នំក្រវ៉ាញ ខេត្តពោធិ៍សាត់ រួចធ្វើរបាយការណ៍មកសម្តេច ដើម្បីមានវិធានការ។
សូមបញ្ជាក់ថា៖ប្រជាពលរដ្ឋនៅតំបន់ការពារព្រៃភ្នំសំកុសរាយការណ៍ថា ក្រុមហ៊ុន រតនៈសម្បត្តិបាន យកលេសមានសិទ្ធធ្វើដីសម្បទានសេដ្ឋកិច្ច ប៉ុន្តែបែរជារកស៊ីកាប់ឈើក្នុងព្រៃការពារភ្នំសំកុស នៅក្បែរនោះទៅវិញ។ ក្រុមហ៊ុនមួយនេះបានជួលកម្មករខ្មែរ និងវៀតណាមប្រមាណ ២០០នាក់ ឱ្យទៅកាប់ឈើក្នុងព្រៃការពារមួយនេះ យ៉ាងគគ្រឹកគគ្រេងរហូតផ្អើលសត្វព្រៃ។
ចំណែកកម្មករស៊ីឈ្នួលកាប់ឈើឱ្យក្រុមហ៊ុនអះអាងថា កម្មករខ្មែរនិងវៀតណាមបែងចែកជាក្រុមប្រមាណ ១០នាក់ក្នុង១ក្រុម ចូលទៅកាប់ឈើក្នុងព្រៃដោយគិតប្រាក់ឈ្នួល ៥ដុល្លារក្នុងមួយម៉ែត្រគីប។ ឈើដែលកាប់នោះខាងក្រុមហ៊ុនឱ្យជ្រើសមុខកាត់ចាប់ពី ៧តឹកឡើងទៅ ហើយឈើខុសខ្នាតឱ្យអាររលំចោលពេញព្រៃ ដើម្បីងាយស្រួលក្នុងការដឹកជញ្ជូន។ បន្ទាប់ពីកម្មករអារឈើរួចហើយ មានឡានរបស់ក្រុមហ៊ុនដឹកឈើយកទៅទុកក្នុងសិប្បកម្មកែច្នៃរបស់ខ្លួន។
លោក ជា ហ៊ាន ប្រធានអង្គការប្រឆាំងអំពើពុករលួយទប់ស្កាត់ធនធានធម្មជាតិ និងការពារសិទ្ធិពលរដ្ឋបាន ឲ្យដឹងថា កាលពី ២ ខែមុន លោកបានដាក់របាយការណ៍សុំអន្តរាគមន៍ពីលោក ស ខេង ស្ដីពីការកាប់បំផ្លាញព្រៃឈើក្នុងតំបន់ព្រៃអភិរក្សនៅខេត្តកោះកុង កំពង់ស្ពឺ និងខេត្តពោធិ៍សាត់ ជាពិសេសនៅតំបន់ជួរភ្នំក្រវាញខេត្តពោធិ៍សាត់ ដែលកើតឡើងខ្លាំងជាងគេ។
លោកថា៖ «អត់មានចំណាត់ការដោយសារយកលេសថាជាដីក្រុមហ៊ុនរបស់ឧកញ៉ា ទ្រី ភាព ប៉ុន្តែមានតែឈ្មោះទេ គឺព្រៃនៅតំបន់ហ្នឹងអត់មាន (ក្រុមហ៊ុន) ទេគឺដឹកចេញពីតំបន់ក្រៅចូលមកក្រុមហ៊ុនហ្នឹង។ តាមពិតក្រុមហ៊ុនហ្នឹងរលាយបាត់ហើយ ប៉ុន្តែគ្រាន់តែគាត់ (មន្ត្រី) យកលេសថាឈើរបស់ក្រុមហ៊ុន»។
បើតាមលោក ជា ហ៊ាន នៅរដូវវស្សាឈើក្នុងតំបន់អភិរក្សត្រូវបានកាប់ស្ដុកទុក រង់ចាំដឹកទៅលក់ក្នុងប្រទេសវៀតណាមនៅរដូវប្រាំង។បច្ចុប្បន្ន កម្ពុជាមានតំបន់ការពារធម្មជាតិឧទ្យានជាតិលើផ្ទៃដី ៧ លាន ៥ សែនហិកតា ស្មើនឹង ៤១% នៃផ្ទៃដីសរុបរបស់ប្រទេសកម្ពុជា។ ក្រសួងបរិស្ថាន មានមន្ត្រីអនុរក្ស ១២២០ នាក់ដើម្បីចុះល្បាត និងបង្ក្រាបបទល្មើសធនធានធម្មជាតិ ការបរបាញ់សត្វខុសច្បាប់ និងអភិរក្សធនធានធម្មជាតិ។ នេះបើតាមមន្ត្រីក្រសួងបរិស្ថាន។តែលទ្ធផលដូចជាមិនបានល្អឡើយបទល្មើសនៅតែមានដដែល។
ជាក់ស្តែងកាលពីព្រឹកថ្ងៃទី០៨ ខែឧសភា ឆ្នាំ២០១៩កន្លងមកនេះ លោក អង មង្គល រដ្ឋលេខាធិការក្រសួងមហាផ្ទៃលោក សាយ សំអាល់ រដ្ឋមន្ត្រីក្រសួងបរិស្ថាន និងលោក ម៉ៅ ធនិន អភិបាលខេត្តពោធិ៍សាត់ បានធ្វើដំណើររួមគ្នាតាមឧត្តម្ភាចក្រមួយគ្រឿង ចាប់ពីព្រលានយន្តហោះពោធិចិនតុង ដើម្បីត្រួតពិនិត្យមើលស្ថានភាពតំបន់ការពារធម្មជាតិ «ដែនជម្រកសត្វព្រៃភ្នំឱរ៉ាល់ ដែនជម្រកសត្វព្រៃភ្នំសំកុស និងឧទ្យានជាតិជួរភ្នំក្រវ៉ាញកណ្តាល» ក្នុងភូមិសាស្ត្រខេត្តពោធិ៍សាត់ ដែលជាប់ខេត្តកំពង់ស្ពឺ និងខេត្តកោះកុងដែរ ។
តែប្រហែលអត់បានការអីហ្នឹងហើយបានជាសម្តេចក្រឡាហោមសខេងប្រកាសបញញ្ជារជាចំហរម្តងទៀត។ទោះជាមានការសាទរតែប្រជាពរដ្ឋថាប្រហែលបានតែមាត់ព្រោះកាលពីចុងខែធ្នូឆ្នាំ២០១៨សម្តេចក្រឡាហោមក៏បានបញ្ជាឲ្យចៅហ្វាយខេត្តមណ្ឌលគីរីលោកស្វាយសំអ៊ាងចុះស្រាវជ្រាវសេចក្តីរាយការណ៍ពីការកាប់បំផ្លាញព្រៃឈើក្នុងខេត្តមណ្ឌលគិរីដែរតែស្វាយសំអ៊ាងរកមិនឃើញឆ្លើយថាអត់មានហង!៕
