និស្សិតកម្ពុជា២៤នាក់ទៀត នឹងចេញទៅសិក្សាថ្នាក់អនុបណ្ឌិត និងបណ្ឌិតនៅជប៉ុន

ភ្នំពេញ៖មន្ត្រីរាជការចំនួន ២៤ នាក់ទទួលបានឱកាសសិក្សានៅសាកលវិទ្យាល័យនានាក្នុងប្រទេសជប៉ុន តាមរយៈគម្រោងអាហារូបករណ៍អភិវឌ្ឍន៍ធនធានមនុស្ស (JDS) ដោយក្នុងនោះចំនួន ២២នាក់ ទទួលបានអាហារូបករណ៍សិក្សាថ្នាក់អនុបណ្ឌិត ចំណែក២នាក់ទៀតសិក្សាថ្នាក់បណ្ឌិត។ 

ក្នុងពិធីជប់លៀងជូនដំណើរសិស្សនិស្សិត កាលពីល្ងាចថ្ងៃទី៤ ខែសីហា នៅនិវេសនដ្ឋានឯកអគ្គរាជទូតជប៉ុន រាជធានីភ្នំពេញលោក ណាហ្គាសិ កេនស៊ូកិ ភារធារីស្តីទី ស្ថានទូតជប៉ុនប្រចាំកម្ពុជា សង្ឃឹមថាសិស្សនិស្សិត នឹងទាញយកអត្ថប្រយោជន៍ច្រើនបំផុតពីឱកាសគ្រប់យ៉ាងនៅប្រទេសជប៉ុន មិនត្រឹមតែក្នុងការសិក្សាប៉ុណ្ណោះទេ ប៉ុន្តែថែមទាំងក្នុងជីវិតជាក់ស្ដែងនៅខាងក្រៅថ្នាក់រៀនផងដែរ។ លោកលើកទឹកចិត្តនិស្សិតទាំងអស់បង្កើតមិត្តភាពជាមួយជនជាតិជប៉ុនឱ្យបានច្រើនតាមដែលអាចធ្វើទៅបាន ដើម្បីទទួលបានការគាំទ្រអំឡុងសិក្សានៅប្រទេសជប៉ុន។

ស្របពេលទំនាក់ទំនងការទូតកម្ពុជា ជប៉ុន កំពុងស្ថិតនៅក្នុងកម្រិត​ភាពជាដៃគូយុទ្ធសាស្ត្រ​គ្រប់ជ្រុងជ្រោយ ដែលជាកម្រិតខ្ពស់បំផុត ហើយរដ្ឋាភិបាលនៃប្រទេសទាំងពីរកំពុង​បន្ត​ពង្រឹង​កិច្ចសហប្រតិបត្តិការ​លើ​គ្រប់វិស័យ​។ លោក សង្ឃឹមថានិស្សិតទាំងអស់ នឹងដើរតួនាទីយ៉ាងសំខាន់ក្នុងការចូលរួមពង្រឹងភាពជាដៃគូនេះបន្ថែមទៀត តាមរយៈការប្រើប្រាស់ចំណេះដឹង បទពិសោធន៍  ដើម្បីកសាងអនាគតដ៏រឹងមាំសម្រាប់ប្រទេសជប៉ុន និងកម្ពុជា។

គម្រោងអាហារូបករណ៍អភិវឌ្ឍន៍ធនធានមនុស្ស (JDS) គឺជប៉ុនបានផ្ដល់ជូនកម្ពុជា ដោយបានចាប់ផ្ដើមនៅក្នុងឆ្នាំ២០០០ ក្នុងគោលបំណងផ្ដល់ការគាំទ្រដល់ការអភិវឌ្ឍធនធានមនុស្សនៅកម្ពុជា តាមរយៈការផ្ដល់ឱកាសដល់មន្ត្រីវ័យក្មេងបម្រើការងារក្នុងក្រសួងស្ថាប័នសំខាន់ៗ បានទៅសិក្សាថ្នាក់បរិញ្ញាបត្រជាន់ខ្ពស់ និងបណ្ឌិតនៅប្រទេសជប៉ុន។

រហូតមកដល់បច្ចុប្បន្ន មាននិស្សិតកម្ពុជាជិត ៦០០នាក់បានសិក្សានៅប្រទេសជប៉ុនក្រោមកម្មវិធី JDS។ និស្សិតបញ្ចប់ការសិក្សាជាច្រើន បាននិងកំពុងចូលរួមចំណែកយ៉ាងសកម្មក្នុងការចូលរួមអភិវឌ្ឍសង្គមសេដ្ឋកិច្ចកម្ពុជា និងក្លាយជាមន្ត្រីជាន់ខ្ពស់ក្នុងជួររាជរដ្ឋាភិបាលកម្ពុជា៕