វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4424 នាក់
ម្សិលមិញ 4292 នាក់
សរុប 14114123 នាក់
ភ្នំពេញ៖ សម្តេចតេជោ ហ៊ុន សែននាយករដ្ឋមន្ត្រីកម្ពុជា បានដាក់ចេញអនុសាសន៍ ៥ចំណុច ដើម្បីត្រៀមឆ្ពោះទៅកាន់ព្រឹត្តិការណ៍ស៊ីហ្គេម អាស៊ាន ប៉ារ៉ាហ្គេម ២០២៣ ។
ថ្លែងក្នុងពិធីបើកសម្ពោធជាផ្លូវការវិមាន នៃពហុកីឡដ្ឋានជាតិមរតតេជោ និងរាប់ថយក្រោយ ៥០២ថ្ងៃ ដល់ព្រឹត្តិការណ៍ស៊ីហ្គេម អាស៊ាន បារ៉ាហ្គេម ២០២៣ នាព្រឹកថ្ងៃទី ១៨ ខែធ្នូ ឆ្នាំ ២០២១នេះ សម្តេចតេជោ ហ៊ុន សែន បានថ្លែងថា៖ ទី១ ក្រសួងស្ថាប័ន រាជធានីខេត្ត មន្ទីរអង្គភាព កងកម្លាំងប្រដាប់អាវុធត្រូវចូលរួមផ្សព្វផ្សាយប្រកបដោយប្រសិទ្ធភាព នូវព្រឹត្តិការណ៍ប្រកួតស៊ីហ្គេម អាស៊ាន ប៉ារ៉ាហ្គេម ឆ្នាំ ២០២៣ តាមគ្រប់រូបភាព និងតាមប្រព័ន្ធផ្សព្វផ្សាយផ្សេងៗរបស់ខ្លួនឲ្យបានផុសនៅគ្រប់ទីកន្លែង។
ទី២ ក្រសួងការបរទេស និងសហប្រតិបត្តិការអន្តរជាតិ និងទូត តំណាងនៅក្រៅប្រទេស និងក្រសួងស្ថាប័ននានាត្រូវចូលរួមយុទ្ធនាការការទូត និងកិច្ចការបរទេសកីឡាដោយដាក់របៀបវារៈ នៃការផ្សព្វផ្សាយព្រះរាជាណាចក្រកម្ពុជាធ្វើជាម្ចាស់ផ្ទះរៀបចំព្រឹត្តិការណ៍ស៊ីហ្គេម អាស៊ាន ប៉ារ៉ាហ្គេមឆ្នាំ ២០២៣ ដោយប្រើប្រាស់គ្រប់វេទិកាសវនាការ ដើម្បីស្វែងរកការគាំទ្រជាលក្ខណៈអន្តរជាតិ។
ទី៣ រួមគ្នាលើកកម្ពស់មុខមាត់កម្ពុជា តាមរយៈឥទ្ធិពលព្រឹត្តិការណ៍ស៊ីហ្គេមអាស៊ាន ប៉ារ៉ាហ្គេម ឆ្នាំ ២០២៣ ក្នុងយុទ្ធនាការអប់រំ ផ្សព្វផ្សាយកីឡារស់ក្នុងសន្តិភាព ប្រជាជនម្នាក់លេងកីឡាមួយមុខ កម្ពុជាស្អាត កម្ពុជាកាត់បន្ថយគ្រោះថ្នាក់ចរាចរណ៍ និងកាត់បន្ថយឥទ្ធិពលគ្រឿងញៀន។
ទី ៤គណៈកម្មការជាតិរៀបចំការប្រកួតកីឡាអាស៊ី អាគ្នេយ៍ លើកទី ៣២ ឆ្នាំ ២០២៣ ត្រូវមានស្មារតីទទួលខុសត្រូវចំពោះការរៀបចំព្រឹត្តិការណ៍ស៊ីហ្គេម អាស៊ាន ប៉ារ៉ាហ្គេម ឆ្នាំ ២០២៣ ដោយគោរពតាមគោលការណ៍កីឡាបៃតង ដើម្បីរក្សាសេចក្តីថ្លៃថ្នូរ កិត្តិយស ក្នុងនាមជាម្ចាស់ផ្ទះរៀបចំព្រឹត្តិការណ៍ស៊ីហ្គេម ជាលើកដំបូង។ ជាមួយគ្នានេះ សម្តេចតេជោ ណែនាំអោយសហព័ន្ធកីឡាជាតិ កីឡាករ កីឡាការិនី កីឡាករ កីឡាការិនីជនពិការ សូមខិតខំប្រឹងប្រែងយកអស់កម្លាំងកាយចិត្ត បញ្ញាស្មារតីក្នុងការហ្វឹកហាត់អភិវឌ្ឍជំនាញវិជ្ជាជីវៈជាកីឡា និងបំពេញបេសកកម្មរៀងខ្លួនៗជាមួយ និងស្មារតីទទួលខុសត្រូវខ្ពស់ ដើម្បីធ្វើជាម្ចាស់ផ្ទះរៀបចំការប្រកួតកីឡា ស៊ីហ្គេម អាស៊ាន ប៉ារ៉ាហ្គេម ឆ្នាំ ២០២៣ ប្រកបដោយជោគជ័យ។
ទី៥ សម្ដេចតេជោ ហ៊ុន សែន បានអំពាវនាវដល់ ក្រុមហ៊ុនសហគ្រាសឯកជនទាំងអស់ ចូលរួមឧបត្ថម្ភគាំទ្រដល់មូលនិធិកីឡាអាស៊ី អាគ្នេយ៍ ឆ្នាំ ២០២៣ រៀបចំព្រឹត្តិការណ៍កីឡាស៊ីហ្គេម អាស៊ាន ប៉ារ៉ាហ្គេម ឆ្នាំ ២០២៣ ឲ្យទទួលបានជោគជ័យ។សម្ដេចតេជោ ហ៊ុន សែន ក៏បានបញ្ជាក់ថា «នេះគឺជាចំណុចទាំង ៥ ដែលខ្ញុំដាក់ចេញនូវអនុសាសន៍សម្រាប់ការបន្តទៅមុខក្នុងការរៀបចំរបស់យើង សូម្បីតែបញ្ហាថវិកាក៏យើងបានបង្កកប្រចាំឆ្នាំប្រមាណជា ៨លានដុល្លា ក្នុងមួយឆ្នាំ ដែលមានរយៈពេល ៤ឆ្នាំមកហើយសំរាប់ត្រៀមរៀបចំ»។
វិមានកីឡដ្ឋាន ដែលជាសំណង់ធំជាងគេនៃពហុកីឡដ្ឋានជាតិមរតកតេជោ ដែលកើតឡើងពីចំណងមិត្តភាព កម្ពុជា-ចិន ជាជំនួយឥតសំណងពីមិត្តចិនតម្លៃ១៥០លានដុល្លារងាមេរិក ស្ថិតក្នុងសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ។វិមានកីឡដ្ឋាន បានសាងសង់លើទំហំផ្ទៃដីប្រមាណ ១៦.២២ហិកតា ទំហំសំណង់ប្រហែល ៨.២៤ម៉ឺនម៉ែត្រការ៉េ គឺជាកីឡដ្ឋានខ្នាតធំ ដែលអាចផ្ទុកអ្នកទស្សនាបានរហូតដល់ ៦ម៉ឺននាក់ ហើយមានសមត្ថភាពទទួលរៀបចំព្រឹត្តិការណ៍ប្រកួតកីឡាថ្នាក់ជាតិ និងអន្តរជាតិធំៗកម្រិតពិភពលោក។ ពិសេសនឹងក្លាយជាកីឡដ្ឋានដ៏សំខាន់ សម្រាប់ត្រៀមស្វាគមន៍ការប្រកួតកីឡាស៊ីហ្គេម និងអាស៊ានប៉ារ៉ាហ្គេម នៅកម្ពុជា នាឆ្នាំ២០២៣ខាងមុខ ។