លោក ប្រាក់ សុខុន៖ ជម្លោះត្រូវតែដោះស្រាយដាច់ខាត តាមរយៈការសន្ទនា ការទូត និងការគោរពច្បាប់អន្តរជាតិ

អង្គការសហប្រជាជាតិ៖ នៅរសៀលថ្ងៃទី២៦ ខែឧសភា ឆ្នាំ២០២៦ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិបានអញ្ជើញថ្លែងសុន្ទរកថាជាតិ នៅក្នុងកិច្ចប្រជុំបើកចំហកម្រិតខ្ពស់ របស់ក្រុមប្រឹក្សាសន្តិសុខអង្គការសហប្រជាជាតិ។ 

លោកឧបនាយករដ្ឋមន្ត្រី បានសង្កត់ធ្ងន់ថា នៅក្នុងយុគសម័យ ដែលពិភពលោកកំពុងកើនឡើងនូវបញ្ហាប្រឈម ជម្លោះប្រដាប់អាវុធ និងភាពតានតឹងភូមិសាស្ត្រនយោបាយ ការគោរពបូរណភាពទឹកដី និងការដោះស្រាយបញ្ហាដោយសន្តិវិធី ត្រូវតែបន្តដើរតួជាមូលដ្ឋានគ្រឹះដ៏រឹងមាំ នៃសណ្តាប់ធ្នាប់អន្តរជាតិ។

អំឡុងពេលថ្លែងសុន្ទរកថា លោកឧបនាយករដ្ឋមន្ត្រី បានបញ្ជាក់ជាថ្មីនូវការប្តេជ្ញាចិត្តឥតងាករេរបស់កម្ពុជា ចំពោះធម្មនុញ្ញអង្គការសហប្រជាជាតិ និងបានថ្លែងថា ដោយដកស្រង់ចេញពីបទពិសោធប្រវត្តិសាស្ត្រផ្ទាល់របស់កម្ពុជា លោកបានគូសបញ្ជាក់ថា ជម្លោះត្រូវតែដោះស្រាយដាច់ខាតតាមរយៈការសន្ទនា ការទូត និងការគោរពច្បាប់អន្តរជាតិ។

លោក ប្រាក់ សុខុន បានថ្លែងអំណរគុណយ៉ាងជ្រាលជ្រៅរបស់កម្ពុជា ចំពោះសហគមន៍អន្តរជាតិ ដែលបានគាំទ្រឱ្យមានបទឈប់បាញ់ និងការដោះស្រាយដោយសន្តិវិធីនៃជម្លោះព្រំដែនកម្ពុជា-ថៃ.។

នៅរសៀលថ្ងៃទី២៦ ខែឧសភា ឆ្នាំ២០២៦ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិនៃកម្ពុជា បានមានជំនួបពិភាក្សាការងារជាមួយ ឯកឧត្តម Sihasak Phuangketkeow ឧបនាយករដ្ឋមន្ត្រី រដ្ឋមន្ត្រីការបរទេសថៃ ក្នុងឱកាសអញ្ជើញចូលរួមកិច្ចប្រជុំបើកចំហកម្រិតខ្ពស់របស់ក្រុមប្រឹក្សាសន្តិសុខអង្គការសហប្រជាជាតិ នាទីក្រុងញូវយ៉ក។

តាមសេចក្តីប្រកាសដដែល លោក ប្រាក់ សុខុន បានបញ្ជាក់ថា កម្ពុជាត្រៀមអនុវត្តវិធានការដែលថ្នាក់ដឹកនាំនៃប្រទេសទាំងពីរ បានឯកភាពគ្នាក្នុងជំនួបនៅកោះសេប៊ូ ប្រទេសហ្វីលីពីន ដើម្បីកសាងទំនុកចិត្តឡើងវិញ និងជំរុញការស្វែងរកដំណោះស្រាយដោយសន្តិវិធី។

ក្រសួងការបរទេសកម្ពុជា បានឱ្យដឹងថា ជំនួបនេះ គឺជាការបន្តអនុវត្តតាមកិច្ចពិភាក្សាត្រីភាគីរវាងមេដឹកនាំកម្ពុជា ថៃ និងហ្វីលីពីន ដែលបានធ្វើឡើងក្នុងឱកាសកិច្ចប្រជុំកំពូលអាស៊ានលើកទី៤៨ កាលពីថ្ងៃទី៧ ខែឧសភា នៅកោះសេប៊ូ។ ក្នុងជំនួបនោះ ថ្នាក់ដឹកនាំបានប្រគល់ភារកិច្ចឱ្យរដ្ឋមន្ត្រីការបរទេសកម្ពុជា និងថៃ ពិភាក្សាអំពីវិធានការកសាងទំនុកចិត្ត និងមធ្យោបាយឆ្ពោះទៅមុខ។

ភាគីកម្ពុជា បញ្ជាក់ថា ក្នុងអំឡុងកិច្ចពិភាក្សា រដ្ឋមន្ត្រីការបរទេសទាំងពីរ បានផ្លាស់ប្តូរទស្សនៈគ្នាដោយបើកចំហ និងត្រង់ទៅត្រង់មក ពាក់ព័ន្ធនឹងស្ថានភាពព្រំដែនរវាងប្រទេសទាំងពីរ។

ក្នុងជំនួបនោះ លោក ប្រាក់ សុខុន ក៏បានគូសបញ្ជាក់ឡើងវិញនូវជំហររបស់កម្ពុជា ចំពោះការចាប់ផ្តើមប្រើប្រាស់យន្តការផ្សះផ្សាដោយបង្ខំ (Compulsory Conciliation) ក្រោមអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS)។ កម្ពុជា ក៏បានអំពាវនាវឱ្យភាគីថៃ អនុវត្តឱ្យបានពេញលេញ និងដោយសុច្ឆន្ទៈនូវខ្លឹមសារនៃសេចក្តីប្រកាសរួម ចុះថ្ងៃទី២៧ ខែធ្នូ ឆ្នាំ២០២៥។