ស្នងការនគរបាលភ្នំពេញបំភ្លឺរឿងចាប់ខ្លួនមន្ត្រីគណបក្សភ្លើងទៀនដែលចោទថាជាការគម្រាមកំហែង
ភ្នំពេញ៖ អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ នៅថ្ងៃទី១៦ ខែមករា ឆ្នាំ២០២៤នេះ បានចេញមកបញ្ជាក់ថា ការចាប់ខ្លួនលោក ខឹម ចាន់វណ្ណៈ ប្រធានស្តីទីគណៈកម្មាធិការប្រតិបត្តិ គណបក្សភ្លើងទៀនរាជធានីភ្នំពេញ និងជាប្រធានប្រតិបត្តិខណ្ឌពោធិ៍សែនជ័យ ពីបទ «ក្លែងបន្លំឯកសារ ស្នាមមេដៃ និងហត្ថលេខាក្លែងក្លាយ»។
ក្នុងសេចក្ដីប្រកាសព័ត៌មាន បានរៀបរាប់ថា នាថ្ងៃទី១១ ខែមករា ឆ្នាំ២០២៤ សមត្ថកិច្ចជំនាញ នៃស្នងការដ្ឋាននគរបាលរាជធានីភ្នំពេញ បានទទួលពាក្យបណ្តឹងពីជនរងគ្រោះចំនួន៣នាក់ ប្តឹងឈ្មោះ ខឹម ចាន់វណ្ណៈ ប្រធានស្តីទីគណៈកម្មាធិការប្រតិបត្តិ គណបក្សភ្លើងទៀនរាជធានីភ្នំពេញ និងជាប្រធានប្រតិបត្តិខណ្ឌពោធិ៍សែនជ័យ ពីបទ «ក្លែងបន្លំឯកសារ ស្នាមមេដៃ និងហត្ថលេខាក្លែងក្លាយ» របស់ពួកគាត់ដើម្បីចុះឈ្មោះចូលបញ្ជីរាយនាមបេក្ខជនបម្រុងក្រុមប្រឹក្សា សង្កាត់ផ្សារថ្មីទី៣ របស់គណបក្សភ្លើងទៀន ដោយគ្មានការអនុញ្ញាតពីសាមីខ្លួន ដែលបានប្រព្រឹត្តនៅរាជធានីភ្នំពេញ កាលពីថ្ងៃទី០៧ ខែវិច្ឆិកា ឆ្នាំ២០២៣ តាមរយៈការផ្តល់ភស្តុតាងពីសាមីជនរងគ្រោះទាំង៣រូប សមត្ថកិច្ចបានធ្វើកោសល្យវិច័យឃើញថា ពិតជាស្នាមមេដៃ និងហត្ថលេខាក្លែងបន្លំ។
ផ្អែកតាមលទ្ធផលកោសល្យវិច័យនេះ លោក សេង ហៀង ព្រះរាជអាជ្ញារង នៃអយ្យការអមសាលាដំបូង រាជធានីភ្នំពេញ បានចេញដីកាបញ្ហាឲ្យចូលខ្លួន លេខ ០២៥ អ.យ.ន ចុះថ្ងៃទី១៥ ខែមករា ឆ្នាំ២០២៤ ពាក់ព័ន្ធសំណុំរឿង ក្លែងបន្លំឯកសារ និងប្រើប្រាស់ឯកសារក្លែង ហើយសមត្ថកិច្ចបានឃាត់ខ្លួនជនឈ្មោះ ខឹម ចាន់វណ្ណៈ ភេទប្រុស អាយុ ៤៥ឆ្នាំ ជនជាតិខ្មែរ បញ្ជូនទៅតុលាការតាមនីតិវិធី នាថ្ងៃទី១៦ ខែមករា ឆ្នាំ២០២៤។ ការឃាត់ខ្លួននេះ គឺសមត្ថកិច្ចអនុវត្តតាមវិធានការច្បាប់ ដោយពុំមានហេតុផលអ្វីផ្សេងពាក់ព័ន្ធដល់គម្រាម កំហែង ធ្វើទុកបុកម្នេញលើសកម្មជននយោបាយណាមួយឡើយ។
សូមបញ្ជាក់ថានៅថ្ងៃទី១៥ ខែមករា ឆ្នាំ២០២៤ គណបក្សភ្លើងទៀនបានបញ្ជាក់តាមរយៈសេចក្ដីថ្លែការណ៍ ថា សមត្ថកិច្ចមានគ្នាប្រមាណ២០នាក់ ខ្លះស្លៀកពាក់ឯកសណ្ឋាន និងខ្លះស្លៀកពាក់ស៊ីវិលបានចូលទៅចាប់ខ្លួនលោក ខឹម ចាន់វណ្ណៈ ប្រធានស្ដីគណៈកម្មាធិការប្រតិបត្តិគណបក្សភ្លើងទៀនដោយមិនមានការបង្ហាញដីកាចាប់ខ្លួនទេ។ តាមគណបក្សភ្លើងទៀន លោក ខឹម ចាន់វណ្ណៈ ត្រូវបានសមត្ថកិច្ចចាប់ខ្លួននៅរសៀលថ្ងៃទី១៥ ខែមករា ឆ្នាំ២០២៤ នៅគេហដ្ឋានរបស់លោក ស្តិតភូមិប៉ប្រកខាងត្បូង សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
សម្រាប់គណបក្សភ្លើងទៀន ការចាប់ខ្លួនលោក ខឹម ចាន់វណ្ណៈជារូបភាពគំរាមកំហែងដើម្បីបំបាក់ស្មារតីប្រជាពលរដ្ឋកុំឲ្យចូលរួមសកម្មភាពនយោបាយជាមួយគណបក្សភ្លើងទៀន និងជាការធ្វើឲ្យបរិយាកាសនយោបាយមុនការបោះឆ្នោតអសកលក្នុងឆ្នាំ២០២៤ កាន់តែមានភាពអាប់អួរ។ គណបក្សភ្លើងទៀនបានអំពាវនាវឲ្យសមត្ថកិច្ចដោះលែងលោកខឹម ចាន់វណ្ណៈជាបន្ទាន់ និងដោយគ្មានលក្ខខណ្ឌ។គណបក្សប្រឆាំងមួយនេះក៏បានស្នើឲ្យបញ្ឈប់ការចាប់ខ្លួន ការឃុំខ្លួន ការគំរាមកំហែង និងការធ្វើទុក្ខបុកម្នេញលើសមាជិកសមាជិការបស់គណបក្សភ្លើងទៀនជាបន្តទៀត។ ការធ្វើដូច្នេះ គឺដើម្បីធានាឲ្យការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ និងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤ ប្រព្រឹត្តទៅដោយសេរី ត្រឹមត្រូវ និងយុត្តិធម៌។
អ្នកនាំពាក្យស្នងការនគរបាលភ្នំពេញលោក សំ វិច្ឆិកាបានបញ្ជាក់ថា ការចាប់ខ្លួនប្រធានស្ដីទីគណៈកម្មាធិការប្រតិបត្តិគណបក្សភ្លើងទៀនប្រចាំរាជធានីភ្នំពេញ គឺមានដីកាត្រឹមត្រូវ។ តាមលោក សំ វិច្ឆិកា ការចាប់ខ្លួនលោក ខឹម ចាន់វណ្ណៈ ដោយសារមានពាក្យបណ្ឌឹងពីជនរងគ្រោះចំនួន៣នាក់ដែលបានប្ដឹងលោក ខឹម ចាន់វណ្ណៈ ពីបទបានក្លែងបន្លំឯកសារសាធារណៈដោយឲ្យពួកគេទៅឈរឈ្មោះបម្រុងជាក្រុមប្រឹក្សាសង្កាត់ផ្សារថ្មីទី៣។តែលោក សំ វិច្ឆិកា មិនបានបញ្ជាក់ពីអត្តសញ្ញាណរបស់បុគ្គល៣នាក់ដែលបានប្ដឹងលោក ខឹម ចាន់វណ្ណៈទេ។ ខណៈនេះ លោក ខឹម ចាន់វណ្ណៈ បាននិងកំពុងបញ្ជូនខ្លួនទៅសាលាដំបូងរាជធានីភ្នំពេញដើម្បីបន្តនីតិវិធី។ នេះបើតាមលោក សំ វិច្ឆិកា។អ្នកនាំពាក្យនៃស្នងការដ្ឋាននគរបាលរាជធានីភ្នំពេញ សូមបដិសេធ និងច្រានចោលទាំងស្រុងការចោទ ប្រកាន់ទាំងបំពាន ដោយគ្មានហេតុផល គ្មានមូលដ្ឋានច្បាស់លាស់របស់គណបក្សភ្លើងទៀន ដែលបានចុះផ្សាយ កាលពីថ្ងៃទី ១៥ ខែមករា ឆ្នាំ២០២៤។
