សន្លឹកបៀរបើកច្រកព្រុំដែននៅលើដៃថៃដដែល!

ភ្នំពេញ:កម្ពុជា បានច្រានចោលព័ត៌មាន ដែលផ្សព្វផ្សាយដោយបណ្តញសង្គម និងសារព័ត៌មាន របស់ថៃ ថា «កម្ពុជាស្នើឱ្យបើកច្រកដឹកជញ្ជូនទំនិញសង្គ្រោះបន្ទាន់»។ ក្រសួង ការពារជាតិកម្ពុជា ថា នេះជាព័ត៌មានក្លែងក្លាយ និងផ្ទុយពីការពិតក្នុងចេតនា ដើម្បីបង្កការបំភ័ន្តសាធារណមតិជាតិ និងអន្តរជាតិ។ 

នៅក្នុងសេចក្តីប្រកាសព័ត៌មានចេញផ្សាយនៅរសៀលថ្ងៃទី១៥ ខែមេសា លោកស្រី ម៉ាលី សុជាតា អ្នកនាំពាក្យក្រសួងការពារជាតិ បានសម្តែងការខកចិត្ត និងបដិសេធចំពោះព័ត៌មានខាងលើនេះទាំងស្រុង។

លោកស្រី ម៉ាលី សុជាតិ បានគូសបញ្ជាក់ថា ថៃបានបិទច្រកព្រំដែនដោយឯកតោភាគី ដូច្នេះបើថៃចង់បើកឡើងវិញ វាក៏ជាការទទួលខុសត្រូវរបស់ថៃ ក្នុងការបើកឡើងវិញជាឯកតោភាគី។ ទោះជាយ៉ាងណាលោកស្រីបញ្ជាក់ថា កម្ពុជា តែងតែបានត្រៀមខ្លួនរួចជាស្រេច ដើម្បីឆ្លើយតបដោយសមស្រប និងត្រឹមត្រូវ។ អ្នកនាំពាក្យក្រសួងការពារជាតិ បញ្ជាក់ដូច្នេះ មុននឹងអំពាវនាវឱ្យសាធារណជន ប្រុងប្រយ័ត្ន ចៀសវៀងការចាញ់បោកព័ត៌មានមិនពិត និងក្លែងក្លាយ ដោយត្រូវផ្ទៀងផ្ទាត់ប្រភពឱ្យបានច្បាស់លាស់។