ហ្វេសប៊ុកសម្តេចតេជោហ៊ុនសែនមកវិញហើយតែជំនួយការជាអ្នកគ្រប់គ្រង
ភ្នំពេញ ៖ តាមរយៈគេហទំព័រហ្វេសប៊ុករបស់សម្ដេចតេជោ នាថ្ងៃ២០ កក្កដា នេះ បានគូសបញ្ជាក់ថា «នៅតែ ៣ថ្ងៃទៀតដល់ថ្ងៃបោះឆ្នោតហើយ សង្ឃឹមថាបងប្អូនបានត្រៀមខ្លួចរួចជាស្រេច ដើម្បីចូលរួមបោះឆ្នោតជូនបក្សទេវតាលេខរៀងទី១៨»។ការបង្ហោះសេចក្តីអំពាវនាវនេះគឺដកស្រង់ចេញ ពីក្នុង Twitter ផ្លូវការសម្តេចតេជោ ហ៊ុន សែន @hunsencambodia នៅថ្ងៃទី 19 ខែកក្កដា 2023 សម្តេចតេជោនាយករដ្ឋមន្ត្រី បានមានប្រសាសន៍អំពាវនាវ លើកទឹកចិត្តដល់ពលរដ្ឋខ្មែរ ទៅបោះឆ្នោតឲ្យបានគ្រប់គ្នានៅថ្ងៃទី ២៣ ខែកក្កដា ឆ្នាំ២០២៣ ដើម្បីជ្រើសរើសតំណាង គណបក្សដែលខ្លួនពេញចិត្តដែលជាកាតព្វកិច្ច និងសិទ្ធិរបស់ពលរដ្ឋម្នាក់ៗដែលនេះជាដំណើរការនៃលទ្ធិប្រជាធិបតេយ្យនៅក្នុងប្រទេសកម្ពុជា។
សម្តេចតេជោ ហ៊ុន សែន មានជំនឿមុតមាំថា នៅក្នុងថ្ងៃបោះឆ្នោតខាងមុខនេះ គឺនឹងមានចំនួនពលរដ្ឋច្រើនកុះករ ទៅបោះឆ្នោតមិនខានឡើយ “។ការបង្ហោះនេះបានបង្ហាញថាទំព័រហ្វេសប៊ុកសម្តេចនាយករដ្ឋមន្ត្រី ហ៊ុន សែន ដែលមានឈ្មោះថា«Samdach Hun Sen, Cambodian Prime Minister» បានចាប់ផ្តើមបើកដំណើរការឡើងវិញហើយកាលពីយប់ថ្ងៃពុធ បន្ទាប់ពីសម្តេចប្រកាសបិទឈប់ប្រើកាលពីចុងខែមិថុនាកន្លងទៅនិងបន្ទាប់មកប្រកាសដេញក្រុមប្រឹក្សាភិបាលនៃក្រុមហ៊ុនេតាមិនឲ្យនៅនិងចូលស្រុកខ្មែរផងដែរ។ តែការដំណើរការឡើងវិញនៃផេកហ្វេសប៊ុកសម្តេចតេជោហ៊ុនសែនដែលមានមនុស្ស ១៤លាននាក់ ចូលតាមដានពេលនេះ គឺស្ថិតនៅក្រោមការគ្រប់គ្រងកម្មសិទ្ធិរបស់លោក ដួង តារា ជំនួយការផ្ទាល់លោក ហ៊ុន សែន ទៅវិញទេ។
លោក ដួង តារា ជំនួយការផ្ទាល់លោកនាយករដ្ឋមន្ត្រី ហ៊ុន សែន បានសរសេរថានៅលើទំព័រហ្វេសប៊ុក ដែលមានឈ្មោះថា«Samdach Hun Sen, Cambodian Prime Minister» កាលពីថ្ងៃទី២៨ ខែមិថុនា ឆ្នាំ២០១០ លោកបានបង្កើតផេក «Samdach Hun Sen, Cambodian Prime Minister» នេះ ដើម្បីទុកប្រគល់ជូនលោកនាយករដ្ឋមន្ត្រី សម្រាប់ប្រើប្រាស់ក្នុងការទំនាក់ទំនងជាមួយប្រជាពលរដ្ឋខ្មែរទាំងក្នុង និងក្រៅប្រទេស ជាពិសេសដើម្បីបានដឹងអំពីសុខទុក្ខពលរដ្ឋដោយផ្ទាល់តាមរយៈសំណូមពរ និងមតិយោបល់តាមរយៈផេកនេះ។លោក ដួង តារា បញ្ជាក់ថាដោយសារតែលោកបានឃើញអំពីសារៈសំខាន់នៃបណ្តាញទំនាក់ទំនងសង្គមហ្វេសប៊ុកនេះ ទើបលោកសម្រេចបង្កើតផេកនេះឡើងទុកជូនលោក ហ៊ុន សែន យកទៅប្រើជាប្រយោជន៍ប្រទេសជាតិ។ តាមលោក ដួង តារា លោកមិនចង់បាត់បង់ផេកដ៏សំខាន់ ដែលលោកប្រើពេល១៣ឆ្នាំកន្លងមកនោះឡើយ។ លោក តារា ថាលោកបានសម្រេចចិត្តយកមកប្រើឡើងវិញ និងសូមស្នើសុំរក្សាផេកនេះទុកបន្តប្រើជាប្រយោជន៍សង្គមជាតិ ទោះបីសម្តេច ហ៊ុន សែន មិនប្រើក៏ដោយ។ទោះជាយ៉ាងណាបើគ្មានការឯកភាពពីសម្តេចតេជោទេទោះថ្លើមធមប៉ុនណាក៏លោកដួងតារាមិនហ៊ានដែរ!៕
ហ្វេសប៊ុក «Samdach Hun Sen, Cambodian Prime Minister» បានចាប់ផ្តើមផុសព័ត៌មានឡើងវិញជាលើកដំបូងនៅព្រឹកថ្ងៃទី២០ ខែកក្កដានេះ ដោយលើកឡើងពីTwitter លោក ហ៊ុន សែន ក្នុងការស្វាគមន៍របស់លោកដល់មន្ត្រីសង្កេតការណ៍បរទេសសម្រាប់ការបោះឆ្នោតឆ្នាំ២០២៣នេះ ជាង៣០០នាក់ មកពី៦៥ប្រទេស។កាលពីចុងខែមិថុនាសម្តេចនាយករដ្ឋមន្ត្រី ហ៊ុន សែន បានប្រកាសសម្រេចឈប់ប្រើប្រាស់ប្រព័ន្ធបណ្តាញសង្គមហ្វេសប៊ុក ដែលមានអ្នកចុចចូលចិត្ត(Likes) រហូតជាង១៤លាននាក់ ហើយងាកទៅប្រើប្រាស់បណ្តាញសង្គមរបស់ចិន និងរុស្ស៊ីវិញ គឺTik Tok និងតេឡេក្រាម។
ការសម្រេចបោះបង់ចោលហ្វេសប៊ុកសម្តេច ហ៊ុន សែន ពេលនោះ គឺធ្វើឡើងបន្ទាប់ពី ក្រុមក្រុមប្រឹក្សាភិបាលត្រួតពិនិត្យក្រុមហ៊ុន Meta បានអំពាវនាវឲ្យព្យួរទំព័រហ្វេសប៊ុករបស់លោក ហ៊ុន សែន រយៈពេល៦ខែ ក្រោមហេតុផលមានវីដេអូមួយ ដែលបានបង្ហោះតាមទំព័រហ្វេសប៊ុករបស់លោក បានរំលោភលើវិធានរបស់ក្រុមហ៊ុន Meta ស្តីពីការគំរាមកំហែង និងហិង្សា។ក្រោយមករដ្ឋាភិបាលកម្ពុជាក៏បានប្រកាសបិទការិយាល័យតំណាងក្រុមហ៊ុនហ្វេសប៊ុកនៅកម្ពុជា ប្រកាសហាមឃាត់សមាជិកក្រុមប្រឹក្សាភិបាលត្រួតពិនិត្យរបស់ក្រុមហ៊ុន Meta ចំនួន២២រូប មិនឲ្យចូល ឬមានវត្តមាននៅក្នុងប្រទេសកម្ពុជាដោយចាត់ទុកជា PERSONA NON GRATA។ ក្រសួងការបរទេសកម្ពុជាបានហៅអនុសាសន៍របស់ក្រុមប្រឹក្សាភិបាលត្រួតពិនិត្យរបស់ក្រុមហ៊ុន Meta ឲ្យផ្អាកជាបណ្តោះអាសន្នចំពោះគណនីហ្វេសប៊ុករបស់លោកនាយករដ្ឋមន្ត្រី ហ៊ុន សែន ថាមានលក្ខណៈនយោបាយ។
មិនទាន់មានប្រតិកម្មយ៉ាងណាដែរចំពោះការប្រកាសមិនស្វាគមន៍ដល់សមាជិកក្រុមប្រឹក្សាភិបាលត្រួតពិនិត្យរបស់ក្រុមហ៊ុន Metaគ្រាន់តែហ្វេសក្រុមហ៊ុនហ្វេសប៊ុកប្រកាសថាគេមិនបានបិទហ្វេសប៊ុកទេគឺសម្តេចជាអ្នកបិទខ្លួនឯង។ក្រោយពីលោក ដួង តារា ជំនួយការផ្ទាល់របស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងជាប្រធានគណបក្សប្រជាជនកម្ពុជា យកហ្វេសប៊ុកសម្តេចមកប្រើវិញនោះ តាមរយៈហ្វេសប៊ុកបានបង្ហាញក្តីសង្ឃឹមថា ប្រជាពលរដ្ឋនឹងត្រៀមខ្លួចរួចជាស្រេច ដើម្បីចូលរួមបោះឆ្នោតជូនគណបក្សកម្ពុជា មានរូបសញ្ញាទេវតាបាចផ្កាស្ថិតនៅលេខរៀងទី១៨។
