ក្រសួងការបរទេសរិះគន់អាមេរិកការពារលោកគន់គីមនិងឧកញ៉ាទ្រីភាព
04-September-2023 / ផ្សេងៗ
ភ្នំពេញ៖ ក្រសួងការបរទេសកម្ពុជានៅថ្ងៃទី១០ធ្នូនេះបានសម្ដែងការខកចិត្ដយ៉ាងខ្លាំងចំពោះការកំណត់ជ្រើសរើសដោយបំពាននូវជនជាតិកម្ពុជាដែលបម្រើ ការងាររដ្ឋ និងក្នុងផ្នែកឯកជន ក្រោមច្បាប់សកលម៉ានីតស្គីរបស់អាមេរិក។
អ្នកនាំពាក្យក្រសួងការបរទេសកម្ពុជានៅថ្ងៃទី១០ ខែធ្នូនេះ បានចេញសេចក្តីថ្លែងការណ៍ លើកឡើងថា៖ «ទង្វើនេះធ្វើឱ្យមានការស្រងាកចិត្តយ៉ាងខ្លាំង នៅពេលដែលបុគ្គលសាធារណៈរបស់ប្រទេសមួយ ត្រូវបានក្លាយទៅជាកម្មវត្ថុ នៃវិធានការទណ្ឌកម្មរបស់ ប្រទេសដទៃផ្សេងទៀត ដោយផ្អែកលើការចោទប្រកាន់ដោយគ្មានមូលដ្ឋាន និងគ្មានការគោរពទាល់តែសោះចំពោះភាពឯករាជ្យនៃច្បាប់ និងយុត្តិធម៌របស់ប្រទេសមួយ។ ប្រការនេះគឺជាការបំពាន យ៉ាងធ្ងន់ធ្ងរលើគោលការណ៍អន្តរជាតិស្តីពីគោលការណ៍ស្មើភាពនៃអធិបតេយ្យ និងគោលការណ៍មិនជ្រៀតជ្រែកកិច្ចការផ្ទៃក្នុងរបស់ប្រទេសដទៃ ដូចមានចែងក្នុងធម្មនុញ្ញអង្គការសហប្រជាជាតិ និងច្បាប់អន្តរជាតិដ៏ទៃផ្សេងទៀត»។
សេចក្តីថ្លែងការណ៍ បញ្ជាក់ថា៖ «បទបញ្ជាប្រតិបត្តិនេះគឺជាការវាយប្រហារប្រឆាំងនឹងកិច្ចខិតខំប្រឹងប្រែងដើម្បីស្តារទំនុកចិត្ត និងភាពជឿជាក់រវាងកម្ពុជា និងសហរដ្ឋអាមេរិក តាមរយៈការផ្ញើសារទៅវិញទៅមកនាពេលថ្មីៗនេះរវាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងឯកឧត្តម ដូណាល់ ត្រាំ ប្រធានាធិបតីសហរដ្ឋអាមេរិក ដែលបានបញ្ជាក់យ៉ាងច្បាស់ថា សហរដ្ឋអាមេរិកគោរពអធិបតេយ្យភាព កម្ពុជា ហើយមានបំណងដ៏មុតមាំក្នុងការលើកស្ទួយទំនាក់ទំនងទ្វេរភាគី ដោយឈរលើការគោរពគ្នាទៅវិញទៅមក»។
អ្នកនាំពាក្យក្រសួងការបរទេស អះអាងថា ឯកឧត្តម គន់ គីម ត្រូវបានទទួលស្គាល់ជាសាធារណៈ ចំពោះការរួមចំណែកយ៉ាងច្រើនរបស់ឯកឧត្តម ក្នុងការការពារ និងថែររក្សាសុខសន្តិភាព ស្ថេរភាព និងសណ្តាប់សង្គម ហើយលោកឧកញ៉ា ទ្រី ភាព ក៏បានដើរតួនាទីដ៏សកម្មក្នុងការទ្រទ្រង់ការអភិវឌ្ឍសេដ្ឋកិច្ចសង្គមកម្ពុជាផងដែរ។
សូមជម្រាបថា ក្រសួងសេដ្ឋកិច្ច និងហិរញ្ញវត្ថុអាមេរិក នៅថ្ងៃទី០៩ ខែធ្នូ ដែលជាថ្ងៃទិវាប្រយុទ្ធប្រឆាំងអំពើពុករលួយអន្តរជា តិបានប្រកាសដាក់ទណ្ឌកម្មបង្កកទ្រព្យសម្បត្តិលើលោកឧកញ៉ា ទ្រី ភាព អគ្គនាយកក្រុមហ៊ុនទ្រី ភាពគ្រុប និងឯកឧត្តម គន់ គីម អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយ។
ក្រសួងសេដ្ឋកិច្ចអាមេរិក បានចោទប្រកាន់លោកទ្រី ភាព និង លោកគន់ គីម ដូចគ្នាថា បានជាប់ពាក់ព័ន្ធដោយផ្ទាល់ និងដោយប្រយោលក្នុងអំពើពុករលួយជាច្រើនករណីដូចជា ការគ្រប់គ្រងទ្រព្យសម្បត្តិរបស់រដ្ឋដោយមិនត្រឹមត្រូវ ការរឹបអូសទ្រព្យសម្បត្តិឯកជនដើម្បីផលប្រយោជន៍ផ្ទាល់ខ្លួន អំពើពុករលួយទាក់ទងនឹងកិច្ចសន្យារបស់រដ្ឋាភិបាលកម្ពុជា ឬ ការទាញយកធនធានធម្មជាតិ ឬ ស៊ីសំណូក។
សម្រាប់លោកទ្រី ភាព ក្រសួងសេដ្ឋកិច្ចអាមេរិកបានអះអាងថា បានប្រើប្រាស់នូវបណ្តាញដ៏ធំនៅកម្ពុជា ដើម្បីបង្កើតការសម្របសម្រួលការកាប់ឈើដោយខុសច្បាប់ដោយឃុបឃិតនឹងមន្ត្រីរដ្ឋាភិបាល ទិញការការពារពីរដ្ឋាភិបាល និង ទិញការការពារពីយោធា ដើម្បីបម្រើការធ្វើចរាចរផលិតផលឈើខុសច្បាប់របស់ខ្លួនទៅកាន់ប្រទេសវៀតណាម ចិន រុស្ស៊ី និងអឺរ៉ុប។ ចំណែក លោកគន់ គីមវិញ ក្រសួងសេដ្ឋកិច្ចអាមេរិកអះអាងថា ជាមនុស្សសំខាន់ម្នាក់នៅក្នុងគម្រោងអភិវឌ្ឍក្នុងខេត្តកោះកុង ហើយទទួលបានផលប្រយោជន៍យ៉ាងច្រើនពីក្រុមហ៊ុនចិន។ បើតាមអាមេរិក លោកគន់ គីម បានប្រើប្រាស់កងកម្លាំងយោធា ដើម្បីបំភិតបំភ័យ រុះរើ និងឈូសឆាយដីយកទៅប្រគល់ឱ្យក្រុមហ៊ុនចិន។
ក្រៅពីអ្នកទាំងពីរ សមាជិកគ្រួសារលោកគន់ គីម ៣នាក់ ព្រមទាំងក្រុមហ៊ុនអ្នកទាំង២សរុប១៦ក្រុមហ៊ុនទៀតក៏ស្ថិតនៅក្នុងបញ្ចីទណ្ឌកម្មរបស់អាមេរិកផងដែរ។ គួរបញ្ជាក់ថា នេះ គឺជាបន្ថែមការដាក់ទណ្ឌកម្មរបស់អាមេរិកមកមន្ត្រីរដ្ឋាភិបាលកម្ពុជា។ កាលពីខែមិថុនា ឆ្នាំ២០១៨ អាមេរិកក៏បានដាក់ទណ្ឌកម្មដូចគ្នានេះមកលើលោកហ៊ីង ប៊ុនហៀង ដែលជាមេបញ្ជាការបញ្ជាការដ្ឋានអង្គរក្សរបស់លោកនាយករដ្ឋមន្ត្រីកម្ពុជាហ៊ុន សែនផងដែរ ដោយចោទថា រំលោភសិទ្ធិមនុស្សធ្ងន់ធ្ងរ។
ទណ្ឌកម្មរបស់អាមេរិកនេះ គឺធ្វើឡើងក្រោមច្បាប់ Global Magnitsky។ ច្បាប់ Global Magni- tskyនេះ គឺជាច្បាប់សម្រាប់ដាក់ទណ្ឌកម្មលើមន្ត្រីនៃរដ្ឋាភិបាលបរទេសដែលប្រព្រឹត្តអំពើរំលោភសិទ្ធិមនុស្សធ្ងន់ធ្ងរ។ ច្បាប់នេះ ត្រូវបានអនុម័តដំបូងកាលពីឆ្នាំ២០១២ សម្រាប់តែដាក់ទណ្ឌកម្មលើមន្ត្រីនៃប្រទេសរុស្ស៊ីតែប៉ុណ្ណោះ។ ប៉ុន្តែក្រោយមក ច្បាប់នេះក៏ត្រូវបានពង្រីកវិសាលភាពជាសាកលតែម្តង។ រីឯការអនុវត្តនៅពេលនេះវិញ គឺធ្វើឡើងអនុលោមតាមបទបញ្ជាមួយដែលចុះហត្ថលេខាដោយប្រធានាធិបតីអាមេរិកកាលឆ្នាំ២០១៧ ដោយផ្តោតទាំងលើបញ្ហារំលោភសិទ្ធិមនុស្សធ្ងន់ធ្ងរ និង អំពើពុករលួយដែលអាចគំរាមកំហែងដល់ស្ថិរភាពនយោបាយអន្តរជាតិ និងប្រព័ន្ធសេដ្ឋកិច្ច។ 
