សមត្ថកិច្ចបរិស្ថានចាប់រឹបអូស ឈើប្រភេទសុក្រំ ២៥ដុំ ម៉ូតូ៤គ្រឿងឲ្យមេព្រៃ តែជនសង្ស័យបានរត់គេចខ្លួន

ខេត្តក្រចេះ៖ក្រុមការងារក្រសួងបរិស្ថាន ដឹកនាំដោយឯកឧត្តមអគ្គាធិការនៃអគ្គាធិការដ្ឋាន នាយកដ្ឋានអធិការកិច្ចនៃអគ្គនាយកដ្ឋានតំបន់ការពារធម្មជាតិ នាយកដ្ឋានធនធានមនុស្ស នៃក្រសួងបរិស្ថាន និងមន្ទីរបរិស្ថានខេត្តក្រចេះ នាថ្ងៃទី ១៩ ខែកុម្ភ: ឆ្នាំ២០២៦ បានចុះពិនិត្យវាយតម្លៃសកម្មភាពការងារ របស់មន្រ្តីតាមតំបន់ការពារ និងបានដឹកនាំសហការ ជាមួយគណបញ្ជាការឯកភាពស្រុកសំបូរ បង្ក្រាបបទល្មើសធនធានធម្មជាតិ ជាក់ស្តែងនៅក្នុងស្រុកសំបូរ ខេត្តក្រចេះ ដោយចាប់រឹបអូស ឈើប្រភេទសុក្រំ ២៥ដុំ ម៉ូតូ៤គ្រឿង។ ជនសង្ស័យបានរត់គេចខ្លួន មុនពេលសមត្ថកិច្ចទៅដល់។  

ក្រុមការងារបានប្រគល់ជូនវត្ថុតាងរួមមានដូចខាងលើជូនសង្កាត់រដ្ឋបាលព្រៃឈើសណ្តាន់អនុវត្តនីតិវិធី ដើម្បីស្វែងរកជនសង្ស័យមកដាក់ទោសតាមច្បាប់។ ជាមួយគ្នានេះក្រុមការងារបន្តសហការជាមួយ អាជ្ញាធរមូលដ្ឋាន រួមជាមួយប្រជាពលរដ្ឋ ក៏ដូចជាឬក្រុមហ៊ុនដែលប្រកបអាជីវកម្ម ទូកដ ឬសាឡាងចម្លង កុំអនុញ្ញាតឲ្យមធ្យោបាយ រថយន្ត ម៉ូតូ ឬគោយន្តកែឆ្នៃទាំងឡាយណា ដែលមានដឹកបទល្មើស ធនធានធម្មជាតិ បានឆ្លង និងសូមចូលរួមសហការ ផ្តល់ព័ត៌មាន ដើម្បីសមត្ថកិច្ចចុះអន្តាគមន៍បង្ក្រាបឲ្យទាន់ពេលវេលា៕ ប្រភព និងរូបភាព៖ ក្រសួងបរិស្ថាន