សម្តេចបវរធិបតី ហ៊ុន ម៉ាណែតអះអាងពីនយោបាយសាច់គោនិងស្ពៃនៅ តំបន់សេដ្ឋកិច្ចពិសេសក្រុងព្រះសីហនុ
17-December-2025 / សេដ្ឋកិច្ច
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងនៅថ្ងៃទី២២ ខែឧសភា ឆ្នាំ២០២៥ថា តំបន់សេដ្ឋកិច្ចពិសេសក្រុងព្រះសីហនុ នៅខេត្តព្រះសីហនុ មានលក្ខណៈពិសេសជាងតំបន់ផ្សេងៗ នៅកម្ពុជា។
ក្នុងឱកាសអញ្ជើញអបអរសាទរការទទួលបានក្រុមហ៊ុនវិនិយោគចំនួន២០០ និងសំណេះសំណាលជាមួយកម្មករនិយោជិតជាង ៣ម៉ឺននាក់ នៅតំបន់សេដ្ឋកិច្ចពិសេសក្រុងព្រះសីហនុ សម្តេចមហាបវរធិបតី បានបញ្ជាក់យ៉ាងដូច្នេះថា «ជាលក្ខណៈពិសេសតំបន់សេដ្ឋកិច្ចក្រុងព្រះសីហនុ មានលក្ខណៈពិសេសជាងតំបន់ផ្សេងៗនៅកម្ពុជា ដោយតំបន់នេះ ត្រូវបានទទួលស្គាល់, គាំទ្រ និងមានការចុះកិច្ចព្រមព្រៀងពង្រឹងទំនាក់ទំនង និងការអភិវឌ្ឍជាបន្តបន្ទាប់ ចាប់ពីថ្នាក់ក្រោមដល់ថ្នាក់លើ រវាងរដ្ឋាភិបាលកម្ពុជា-ចិន ដែលបានបើកការដ្ឋានសាងសង់ដំបូងនៅឆ្នាំ២០០៨ ជាពិសេសការរួមគ្នាអនុវត្ត «គំនិតផ្តួចផ្តើមខ្សែក្រវាត់ និងផ្លូវ»។
សម្តេចមហាបវរធិបតី ហ៊ុន ម៉ាណែតថ្លែងរំលឹកពីប្រវិត្តិកើតតំបន់សេដ្ឋកិច្ចពិសេសថា ក្នុងដំណើរទស្សនកិច្ចផ្លូវរដ្ឋលើកទី១ មកកាន់កម្ពុជា កាលពីខែតុលា ឆ្នាំ២០១៦, លោក ស៊ី ជីនពីង ប្រធានាធិបតីចិន ក៏បានលើកឡើងថា ភាគីចិននឹងលើកទឹកចិត្តសហគ្រាសចិនល្បីៗ ឱ្យធ្វើកិច្ចសហប្រតិបត្តិការ និង វិនិយោគក្នុងតំបន់សេដ្ឋកិច្ចពិសេសក្រុងព្រះសីហនុ។ ក្នុងអំឡុងកិច្ចប្រជុំជាន់ខ្ពស់នៃវេទិកាកំពូលកិច្ចសហប្រតិបត្តិការអន្តរជាតិ «ខ្សែក្រវាត់ និង ផ្លូវ» លើកទី២ ក្នុងឆ្នាំ២០១៩ នៅទីក្រុងប៉េកាំង, សម្ដេចតេជោ ហ៊ុន សែន ក៏បានបញ្ជាក់ថា ភាពជោគជ័យនៃការអភិវឌ្ឍតំបន់សេដ្ឋកិច្ចពិសេស ខេត្តព្រះសីហនុ ជាសក្ខីភាពមួយយ៉ាងច្បាស់នៃការកសាងគម្រោងផែនការសហប្រតិបត្តិការ «ខ្សែក្រវាត់ និង ផ្លូវ» រវាងប្រទេសទាំងពីរ។
សម្រាប់ការវិនិយោគរកស៊ីនៅស្រុកខ្មែរ សម្ដេចមហាបវរធិបតី ហ៊ុន ម៉ាណែត ថ្លែងថាកម្ពុជាមិនប្រកាន់ចំពោះអ្នកវិនិយោគមកពីប្រទេសណានោះឡើយ ពោលគឺស្វាគមន៍អ្នកវិនិយោគពីគ្រប់ប្រទេស។សម្ដេចនាយករដ្ឋមន្ត្រី បានគូសបញ្ជាក់ថា៖ «នៅពេលដែលអាមេរិក និងចិន មានការចរចារគ្នារឿងពាណិជ្ជកម្ម គេចោទថារដ្ឋាភិបាលខ្មែរយកស្ពៃ យកសាច់គោ ហើយខ្ញុំធ្លាប់និយាយម្ដងហើយនៅកំពត មិនថាស្ពៃ មិនថាសាច់គោ មិនថាបង្គា បង្កង កំពឹស មិនថាផ្លែឈើ កម្ពុជាយកទាំងអស់មិនថាប្រទេសណាទេ។ ហើយនៅក្នុងតំបន់សេដ្ឋកិច្ចពិសេសនេះ ពិតណាស់ផ្ដួចផ្ដើមដោយរដ្ឋាភិបាលកម្ពុជា-ចិន តែក៏មានរោងចក្រសហគ្រាសពីអាមេរិក ពីបារាំង ពីអឺរ៉ុប ពីប្រទេសផ្សេងៗនៅទីនេះ បានន័យថាយើងយកទាំងអស់ ដោយមិនប្រកាន់រើសអើងអ្នកណាទេ»។
សម្តេចមហាបវរធិបតី ហ៊ុន ម៉ាណែត បានថ្លែងឲ្យដឹងថា ខេត្តព្រះសីហនុ ចំនួនរោងចក្រសហគ្រាស បានកើនឡើងពី ៦៩សហគ្រាស ជាមួយកម្មករនិយោជិត ១០,៦១៩ នៅឆ្នាំ២០០៨ រហូតដល់ ៣,៨៣៣សហគ្រាស ជាមួយកម្មករនិយោជិត ១១៥,៨៥៤នាក់ គិតត្រឹមខែមេសា ឆ្នាំ២០២៥ ដោយទទួលបានប្រាក់ឈ្នួលមធ្យមសរុប ប្រមាណ ៣៥៩លានដុល្លារ ក្នុង១ឆ្នាំ។ ដោយឡែក សម្រាប់តំបន់សេដ្ឋកិច្ចពិសេសទាំង៥ នៅខេត្តព្រះសីហនុ មានរោងចក សហគ្រាស សរុបចំនួន ៣២៧សហគ្រាស មានកម្មករនិយោជិតចំនួន ៤៦,៧៥០នាក់ ទទួលបានប្រាក់ឈ្នួលមធ្យមសរុបប្រមាណ ១៥០លានដុល្លារ ក្នុង១ឆ្នាំ។
ទាក់ទងនិងផលប្រយជន៍នៃតំបន់សេដ្ឋកិច្ចពិសេសក្រុងព្រះសីហនុនេះដែរលោក វ៉ាង វិនប៊ីន ឯកអគ្គរដ្ឋទូតសាធារណៈរដ្ឋប្រជាមានិតចិន ប្រចាំនៅប្រទេសកម្ពុជា បានធ្វើការកត់សម្គាល់ថា សមិទ្ធផលរយៈពេល១៧ឆ្នាំ នៃការអភិវឌ្ឍតំបន់សេដ្ឋកិច្ចពិសេសក្រុងព្រះសីហនុ គឺបង្ហាញអំពីភាពរស់រវើកនៃទំនាក់ទំនងកម្ពុជា-ចិន និងកាន់តែស៉ីជម្រៅ ក្នុងរយៈពេល៧០ឆ្នាំកន្លងមកនេះ។ តំបន់សេដ្ឋកិច្ចពិសេសនេះ ត្រូវបានផ្ដួចផ្ដើមបង្កើតឡើងនៅឆ្នាំ២០០៨ ដោយសម្ដេចតេជោ ហ៊ុន សែន អតីតនាយករដ្ឋមន្ដ្រីនៃកម្ពុជា និងថ្នាក់ដឹកនាំរបស់ចិន។
បើតាមលោក វ៉ាង វិនប៊ីន, ចំនួនសហគ្រាសក្នុងតំបន់សេដ្ឋកិច្ចពិសេស ស្មើនឹងប្រមាណ ៧០% នៃចំនួនសហគ្រាសសរុបនៅក្នុងខេត្តព្រះសីហនុ ហើយបានបង្កើតការងារចំនួន ៣២០០០ ហើយទំហំនាំចូល និងនាំចេញសរុប មានច្រើនជាង ៧% នៃពាណិជ្ជកម្មអន្តរជាតិសរុបរបស់ប្រទេសកម្ពុជា និងបានក្លាយជាក្បាលម៉ាស៊ីន នៃការអភិវឌ្ឍន៍សេដ្ឋកិច្ចរបស់ខេត្តព្រះសីហនុ និងក្លាយជា «ចានបាយមាស» សម្រាប់ប្រជាជនខិតខំប្រឹងប្រែង នៃខេត្តព្រះសីហនុ។
លោកបានគូសបញ្ជាក់ទៀតថា តំបន់សេដ្ឋកិច្ចពិសេសក្រុងព្រះសីហនុ ត្រូវបានប្រធានាធិបតី Xi Jinping សរសើរថាជា «គំរូ នៃកិច្ចសហប្រតិបត្តិការជាក់ស្តែងរវាងចិន និងកម្ពុជា»។
ចាប់តាំងពីការបង្កើតឡើង ពឹងផ្អែកលើការយកចិត្តទុកដាក់ផ្ទាល់ខ្លួនរបស់មេដឹកនាំចិន និងកម្ពុជា ពឹងផ្អែកលើការគាំទ្រដ៏រឹងមាំរបស់រដ្ឋាភិបាលខេត្តជាំងស៊ូ និងខេត្តព្រះសីហនុ ពឹងផ្អែកលើបរិស្ថាន ពាណិជ្ជកម្មកាន់តែប្រសើរឡើងៗជាបន្តបន្ទាប់ ដោយមានការដឹកនាំរបស់សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត និងបានប្រែក្លាយពីព្រៃភ្នំមួយ ទៅជាមជ្ឈមណ្ឌលអភិវឌ្ឍន៍ដ៏រស់រវើក។
ឯកអគ្គរដ្ឋទូតចិនរូបនេះ បានលើកឡើងដែរថា នៅខែកន្លងទៅ ប្រធានាធិបតី Xi Jinping បានបំពេញទស្សនកិច្ចផ្លូវរដ្ឋនៅប្រទេសកម្ពុជា ប្រកបដោយជោគជ័យ។ សេចក្តីថ្លែងការណ៍រួម ដែលចេញដោយភាគីទាំងពីរបានបញ្ជាក់ថា «ប្រទេសចិនមានឆន្ទៈបន្តគាំទ្រការអភិវឌ្ឍ នៃតំបន់សេដ្ឋកិច្ចពិសេសក្រុងព្រះសីហនុ ផ្តោតលើចក្ខុវិស័យរបស់កម្ពុជា ក្នុងការកសាងតំបន់គំរូសេដ្ឋកិច្ចពហុមុខងារនៅខេត្តព្រះសីហនុ និងលើកទឹកចិត្តក្រុមហ៊ុនចិនដែលមានសមត្ថភាពកាន់តែច្រើនទៀត មកដាក់ការវិនិយោគទុននៅប្រទេសកម្ពុជា»។
លោក វ៉ាង វិនប៊ីន អះអាងថា ប្រទេសចិនមានឆន្ទៈរួមជាមួយភាគីកម្ពុជា ដើម្បីអនុវត្តលទ្ធផលនៃដំណើរទស្សនកិច្ចរបស់លោកប្រធានាធិបតី Xi មកកាន់ប្រទេសកម្ពុជា ពង្រឹងការតភ្ជាប់គ្នា នៃគំនិតផ្តួចផ្តើម «ខ្សែក្រវាត់ និងផ្លូវ» ជាមួយនឹង «យុទ្ធសាស្ត្របញ្ចកោណ» ជំរុញការអភិវឌ្ឍនៃតំបន់សេដ្ឋកិច្ចពិសេសក្រុងព្រះសីហនុ ឲ្យប្រកបដោយកម្រិតខ្ពស់ភាវូបនីយកម្ម បៃតងភាវូបនីយកម្ម ឌីជីថលភាវូបនីយកម្ម និងអន្តរជាតូបនីយកម្ម ផ្តល់ជំនួយដល់ភាគីកម្ពុជាដើម្បីសម្រេចបាននូវចក្ខុវិស័យឆ្នាំ២០៣០ និង២០៥០ របស់ខ្លួន និងបន្តចាក់កម្លាំងជំរុញទៅក្នុងការកសាងសហគមន៍ជោគវាសនារួមគ្រប់រដូវ ក្នុងយុគសម័យថ្មីចិន-កម្ពុជា៕
.jpg&h=97&w=146)
