សម្តេចធិបតីប្រកាសថា រាល់ការសម្រេចចិត្តទាំងអស់ របស់រាជរដ្ឋាភិបាលរឿងទឹកដីគឺតម្កល់ឧត្តមប្រយោជន៍ជាតិ និងប្រជាជនជាធំ

ភ្នំពេញ៖សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រកាសថា រាល់ការសម្រេចចិត្តទាំងអស់របស់រាជរដ្ឋាភិបាល គឺដើម្បីឧត្តមប្រយោជន៍ជាតិ និងប្រជាជនកម្ពុជាជាធំ ខណៈទាក់ទងនឹងបញ្ហាព្រំ ដែនរវាងកម្ពុជា និងថៃនេះ រាជរដ្ឋាភិបាលបានកំពុងធ្វើការដោះស្រាយយ៉ាងសកម្មបំផុតបើទោះបីជាសកម្មភាពនេះមិនក្តួងក្តាំងដូចការបាញ់គ្នាក៏ដោយ។ 

ក្នុងឱកាសអញ្ជើញជួបសំណេះសំណាលជាមួយសិស្សនិទ្ទេសA និងសិស្សបច្ចេកទេសវិជ្ជាជីវៈ នាព្រឹកថ្ងៃទី១០ ខែកុម្ភៈ ឆ្នាំ ២០២៦នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា សម្តេចពិតជាយល់អារម្មណ៍ចំពោះបងប្អូនរួមជាតិចំពោះស្ថានការណ៍ព្រំដែនរវាងកម្ពុជា និងថៃនាពេល បច្ចុប្បន្ននេះ ប៉ុន្តែទោះបីយ៉ាងណាសម្តេច បានប្រាប់ដល់ជនរួមជាតិទាំងអស់ថា រាល់ការសម្រេចចិត្តរបស់ រាជរដ្ឋាភិបាលគ្រប់ជំហានទាំងអស់គឺដោយការទទួលខុសត្រូវ ថ្លឹងថ្លែង វាយតម្លៃច្បាស់លាស់នៅក្នុងមុខ ព្រួញដែលត្រូវគិតគូរទាំងទឹកដី ទាំងប្រជាពលរដ្ឋរបស់យើង និងទាំងកងកម្លាំងរបស់យើងទាំងអស់។

សម្តេចធិបតី នាយករដ្ឋមន្រ្តី បានថ្លែងថា បើទោះបីជាការដោះស្រាយបញ្ហាព្រំដែនរវាងកម្ពុជានិងថៃនាពេលនេះមានទស្សនៈខុសគ្នាច្រើនក្តី ក៏ប៉ុន្តែរាជរដ្ឋាភិបាលបានកំពុងខិតខំធ្វើការដោះស្រាយនូវបញ្ហានេះជានិច្ចបើទោះបី ជារាជរដ្ឋាភិបាលមិនបានបង្ហាញជាសាធារណៈ ឬធ្វើសន្និសីទជាប្រចាំដើម្បីបង្ហាញដល់ជនរួមជាតិនោះ។ សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «ព្រំដែនកម្ពុជា-ថៃ ជាព្រំដែនអន្តរជាតិរវាងរដ្ឋនិងរដ្ឋ និងត្រូវបានការពារដោយច្បាប់អន្តរជាតិ ពិសេសធម្មនុញ្ញរបស់អង្គការសហប្រជាជាតិ ហេតុដូច្នេះ កម្ពុជាប្រកាន់ជំហរ ការការពារអធិបតេយ្យភាពជាតិ និងបូរណភាពដែនដីទាំងបច្ចុប្បន្ន និងអនាគត ដោយប្រើប្រាស់គ្រប់មធ្យោបាយដែលកម្ពុជាមាន ស្របតាមច្បាប់អន្តរជាតិ។ កម្ពុជា មិនទទួលស្គាល់ដាច់ខាត ការកែប្រែខ្សែបន្ទាត់ព្រំដែន ឬការកាន់កាប់ទឹកដីដោយខុសច្បាប់អន្តរជាតិ ឬតាមរយៈការប្រើប្រាស់កម្លាំង»។

សូមបញ្ជាក់ថាសម្តេចធិបតី ហ៊ុន ម៉ាណែត នៅថ្ងៃទី៤ ខែកុម្ភៈ ឆ្នាំ២០២៦ បានផ្ញើលិខិតមួយច្បាប់ទៅលោក អេម៉ានុយអែល ម៉ាក្រុង ប្រធានាធិបតីបារាំង ដើម្បីឆ្លើយតបទៅនឹងការបង្ហាញឆន្ទៈរបស់ប្រទេសបារាំង ក្នុងការត្រៀមខ្លួនផ្តល់ នូវឯកសារប្រវត្តិសាស្ត្រ និងបច្ចេកទេសពាក់ព័ន្ធនឹងព្រំដែនអន្តរជាតិរវាងប្រទេសកម្ពុជា និងថៃ ក្នុងករណីមានសំណើពីប្រទេសកម្ពុជា។ នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា។

តាមរយៈលិខិតនោះ សម្តេចធិបតី ហ៊ុន ម៉ាណែត បានបញ្ជាក់ជាថ្មីថា កម្ពុជាបានត្រៀមខ្លួនធ្វើការជាមួយបារាំង និងសហគមន៍អន្តរជាតិ ដើម្បីការពារសន្តិភាព តាមរយៈការគោរពច្បាប់អន្តរជាតិ និងការដោះស្រាយជម្លោះដោយសន្តិវីធី ដោយមិនប្រើការគំរាមកំហែង ឬការប្រើប្រាស់កម្លាំងនោះទេ។ ប្រមុខរដ្ឋាភិបាលកម្ពុជា បានស្នើសុំឱ្យប្រទេសបារាំងពិចារណាផ្តល់ការគាំទ្រ បច្ចេកទេសជំនាញ និងការប្រឹក្សាផ្តល់យោបល់ ព្រមទាំងសម្រួលការទទួល និងផ្តល់ឯកសារប្រវត្តិសាស្ត្រ និងបច្ចេកទេសពាក់ព័ន្ធនឹងព្រំដែនអន្តរជាតិរវាងកម្ពុជា និងថៃ ដែលជាមរតកនៃសម័យអាណាព្យាបាល។

សម្តេចធិបតី ហ៊ុន ម៉ាណែត ក៏បានបន្ថែមថា កម្ពុជាប្រកាន់ខ្ជាប់នូវជំហរដោះស្រាយនូវជម្លោះព្រំដែនកម្ពុជា-ថៃ ដោយសន្តិវិធី ដោយផ្អែកតាមច្បាប់អន្តរជាតិ ព្រមទាំងកិច្ចព្រមព្រៀងទាំងឡាយ ដែលកម្ពុជានិងថៃ បានព្រមព្រៀងជាមួយគ្នា ជាពិសេសការចុះវាស់វែង តាមយន្តការ JBC ដើម្បីកំណត់ភាពត្រឹមត្រូវ និងយុត្តិធម៌ សម្រាប់ប្រទេសទាំងពីរក្នុងការការពារអធិបតេយ្យភាព បូរណភាពដែនដីរៀងៗខ្លួន។ នេះជាគោលការណ៍ ស្របទៅតាមអ្វីដែលបន្សល់ទុកពីអាណានិគមដែលយើងមាន៕

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជាក៏បានប្រកាសប្រាប់ដល់ជនរួមជាតិទាំងអស់ផងដែរថា ទោះស្ថានភាពនេះ (បញ្ហាព្រំដែនកម្ពុជា-ថៃ) មានភាពស្មុគ្រស្មាញយ៉ាងណាក៏ដោយ ក៏រាជរដ្ឋាភិបាលនឹងខិតខំថែរក្សាការពារឲ្យខាងតែបាននូវបូរណភាពទឹកដី និងប្រជាជនកម្ពុជាយើងទាំងមូលដោយប្រើប្រាស់គ្រប់មធ្យោបាយទាំងអស់៕