រដ្ឋមន្ត្រីក្រសួងហិរញ្ញវត្ថុអះអាងថាសេដ្ឋកិច្ចកម្ពុជា ត្រូវបានរំពឹងថា អាចនឹងសម្រេចបាន ៥ភាគរយ សម្រាប់ឆ្នាំ២០២៦ឧកញ៉ាគិតម៉េងសុំឲ្យកែទម្រង់ច្បាប់ពន្ធដា

ភ្នំពេញ៖ លោកឧបនាយករដ្ឋមន្ត្រី អូន ព័ន្ធមុនីរ័ត្ន លើកឡើងថា ទោះបីត្រូវប្រឈមនឹងភាពមិនប្រាកដប្រជាកាន់តែស្រួចស្រាល់ក្នុងបរិការណ៍សកល ក៏ដូចជា ត្រូវប្រឈមនឹងការរំលោភលើអធិបតេយ្យជាតិ និងបូរណភាពទឹកដី យ៉ាងណាក្តី, ក៏សេដ្ឋកិច្ចកម្ពុជា ត្រូវបានរំពឹងថា អាចនឹងសម្រេចបានកំណើនក្នុងរង្វង់ប្រមាណ ៥,២ភាគរយ ក្នុងឆ្នាំ២០២៥ និងប្រមាណ ៥ភាគរយ សម្រាប់ឆ្នាំ ២០២៦ ។

ថ្លែង ក្នុងពិធីបើក «វេទិកាពន្ធដារកម្ពុជា», ក្រោមប្រធានបទ៖ ការលើកកម្ពស់អនុលោមភាពសារពើពន្ធ សម្រាប់ការអភិវឌ្ឍសេដ្ឋកិច្ចកម្ពុជា» ដែលត្រូវបានសហការរៀបចំដោយអគ្គនាយដ្ឋានពន្ធដារ នៃក្រសួងសេដ្ឋកិច្ច និង ហិរញ្ញវត្ថុ និងសភាពាណិជ្ជកម្មកម្ពុជា នៅថ្ងៃទី៥ ខែកុម្ភៈ ឆ្នាំ២០២៦ នាទីស្នាក់ការកណ្តាល នៃអគ្គនាយកដ្ឋានពន្ធដារលោកឧបនាយករដ្ឋមន្ត្រី អូន ព័ន្ធមុនីរ័ត្ន បានបន្តថា កិច្ចខិតខំឥតរាថយ និងឆន្ទៈមោះមុតរបស់រាជរដ្ឋាភិបាល សំដៅកែលម្អបរិយាកាសសម្រាប់ធុរកិច្ច និងការវិនិយោគ បានជំរុញឲ្យការវិនិយោគផ្ទាល់ពីក្រៅប្រទេសបន្តកើនខ្ពស់គួរជាទីមោទនៈ។

ជាក់ស្តែង ផ្អែកតាមទិន្នន័យរបស់ក្រុមប្រឹក្សាអភិវឌ្ឍន៍កម្ពុជា ការចុះបញ្ជីគម្រោងវិនិយោគពីបរទេស ក្នុងឆ្នាំ២០២៥ កន្លងទៅ មានទំហំទុនសរុបប្រមាណ ១០ប៊ីលានដុល្លារអាម៉េរិក, មានកំណើន ៤៥% បើធៀបនឹងឆ្នាំ២០២៤ ។ ជាមួយគ្នា ក្នុងវិស័យពាណិជ្ជកម្មក្រៅប្រទេស, ការនាំចេញរបស់កម្ពុជា ក្នុងឆ្នាំ ២០២៥ ក៏បន្តរក្សាបាននូវចលនការកំណើនល្អ គួរឲ្យកត់សម្គាល់។

ការនាំចេញសរុបក្នុងឆ្នាំ២០២៥ បានកើនប្រមាណជាង ១៧%, បើធៀបនឹងឆ្នាំ២០២៤។ មួយវិញទៀត រំហូរទេសចរបរទេសមកកាន់កម្ពុជា ពិសេសកញ្ចប់ទេសចរណ៍ទីផ្សារឆ្ងាយ ក៏នៅដំណើរការជាធម្មតា និងមាននិន្នាការកើនផងដែរ តួយ៉ាងដូចជា ទេសចរពីអឺរ៉ុប, អូស្ត្រាលី និងឥណ្ឌា។

លោក ឧបនាយករដ្ឋមន្ត្រី វាយតម្លៃថា ការរៀបចំនូវ «វេទិកាពន្ធដារកម្ពុជា» នេះ គឺជាការផ្តល់កាលានុវត្តភាពដ៏វិសេសមួយ ដើម្បីពង្រឹងនិងពង្រីកភាពជាដៃគូឲ្យកាន់តែប្រសើរឡើងថែមទៀត រវាងរដ្ឋបាលសារពើពន្ធ, វិស័យឯកជន, ក្រសួង-ស្ថាប័ន ពាក់ព័ន្ធនៃរាជរដ្ឋាភិបាល, ដៃគូអភិវឌ្ឍ, ព្រមទាំង អង្គការ និងស្ថាប័នអន្តរជាតិ, តាមរយៈការចូលរួមក្នុងកិច្ចសន្ទនា, ការផ្លាស់ប្តូរមតិយោបល់និងបទពិសោធ, និងការចែករំលែកនូវឧត្តមានុវត្តលើប្រធានបទសំខាន់ៗ ដើម្បីជំរុញនិងលើកកម្ពស់អនុលោមភាពសារពើពន្ធ សំដៅធានានូវចីរភាពនៃកំណើនចំណូលជូនរដ្ឋ បង្កើនជំនឿចិត្តរបស់វិស័យឯកជន មកលើយន្តការប្រមូលចំណូលរបស់រដ្ឋ ព្រមទាំងរួមចំណែកពង្រឹងប្រព័ន្ធប្រមូលចំណូលពន្ធជូនរដ្ឋឲ្យកាន់តែមានប្រសិទ្ធភាព, ស័ក្តិសិទ្ធិភាព, តម្លាភាព, គណនេយ្យភាព, សមភាព និងសមធម៌ ។

កម្ពុជា ដាក់ឲ្យដំណើរការប្រព័ន្ធបច្ចេកវិទ្យាព័ត៌មានពន្ធដារកម្ពុជា ហៅកាត់ថា GDT Home Tax ដែលជាថ្នាលបច្ចេកវិទ្យាឌីជីថលដ៏ទំនើប សម្រាប់ការផ្តល់សេវាប្រកបដោយប្រសិទ្ធភាព និងទំនុកចិត្តិខ្ពស់ជូនអ្នកជាប់ពន្ធ ខណៈដែលប្រព័ន្ធថ្មីនេះ នឹងអនុញ្ញាតឲ្យអ្នកប្រើប្រាស់ចូលទៅពិនិត្យ និងបំពេញកាតព្វកិច្ចសារពើពន្ធ តាមទូរស័ព្ទដៃ និង កុំព្យូទ័រ បានយ៉ាងងាយស្រួល, រហ័ស, សាមញ្ញ និងមានសុវត្ថិភាព។លោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានលើកឡើងថា វេទិកាពន្ធដារកម្ពុជា ដែលជាយន្តការថ្មីដើម្បីបំពេញបន្ថែមទៀតពីលើយន្តការ កិច្ចសហការជាមួយវិស័យឯកជនដែលកំពុងអនុវត្តស្រាប់ គឺជាឱកាសល្អសម្រាប់ការបញ្ចេញមតិ និងផ្លាស់ប្តូរយោបល់ពីភាគីពាក់ព័ន្ធទាំងអស់ ជាពិសេសក្នុងឱកាសដែលមានការចូលរួមពីភាគីពាក់ព័ន្ធទាំងអស់ ទាំងស្ថាប័នរដ្ឋ, ទាំងវិស័យឯកជន, ទាំងតំណាងស្ថានទូត និងកុងស៊ុល, និងទាំងដៃគូអភិវឌ្ឍនានា។

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានគណៈកម្មាធិការសម្របសម្រួលក្រុមការងារវិស័យឯកជនសម្រាប់យន្តការវេទិការាជរដ្ឋាភិបាល-ផ្នែកឯកជន និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា បានស្នើឲ្យរាជរដ្ឋាភិបាល ពិចារណាបន្តធ្វើវិសោធនកម្ម ឬកែលម្អច្បាប់ពន្ធដារមួយចំនួន ជាប្រចាំក្នុងរយៈពេល ១ ឬ ២ឆ្នាំម្តង ទោះបីជាច្បាប់ពន្ធដារកម្ពុជា ទើបតែត្រូវបានធ្វើវិសោធនកម្មកាលពីពេលថ្មីៗនេះក៏ដោយ។

ជាមួយគ្នានេះ អ្នកឧកញ៉ា គិត ម៉េង ក៏បានស្នើសុំឯកឧត្តមឧបនាយករដ្ឋមន្ត្រី អូន ព័ន្ធមុន្នីរ័ត្ន ព្រមទាំងឯកឧត្តម គង់ វិបុល អគ្គនាយកពន្ធដារ បង្កើតគណៈកម្មការពិសេសមួយ ដែលរួមមានភាគីផ្នែកឯកជន និងភាគីពន្ធដារ ដើម្បីពិភាក្សាអំពីការកែលម្អច្បាប់ពន្ធដារដែលមានគោលបំណងបង្កើនភាពងាយស្រួល ពង្រឹងទំនុកចិត្តរបស់វិនិយោគិន និងពន្លឿនកំណើនសេដ្ឋកិច្ច។

អ្នកឧកញ៉ា បានគូសបញ្ជាក់ថា៖ «ខ្ញុំសូមស្នើឯកឧត្តមឧបនាយករដ្ឋមន្ត្រី បើអនុញ្ញាត គឺល្អ ព្រោះយើងដាក់ [វិសោធនកម្មច្បាប់] ទៅពេលនោះវាត្រូវ តែសភាពការណ៍វិវត្តន៍ទៅរហូត ហើយសម័យឥឡូវមាន AI ក៏ច្រើន ហើយខ្ញុំក៏សំណូមពរដល់ផ្នែកឯកជនទាំងអស់គ្នាដែរ តើវិស័យអ្វីដែលយើងចង់ឲ្យស្ទុះកើនឡើង ដូច្នេះយើងត្រូវដាក់ស្នើជូន ឯកឧត្តមឧបនាយករដ្ឋមន្ត្រី និងឯកឧត្តម គង់ វិបុល ដើម្បីយើង ធ្វើវិសោធនកម្មច្បាប់ណាមួយដើម្បីជួយទៅវិស័យនោះ»។