កម្ពុជា ក្លាយជាសមាជិកពេញសិទ្ធិរបស់អង្គការស្តង់ដារអន្តរជាតិ (ISO)

ភ្នំពេញ៖នៅថ្ងៃទី៨ ខែតុលា ឆ្នាំ២០២៥ អង្គការស្តង់ដារអន្តរជាតិ (ISO) ទើបបានអនុម័តដំឡើងកម្រិតសមាជិកភាពរបស់កម្ពុជា ពីសមាជិកទំនាក់ទំនង ទៅជាសមាជិកពេញសិទ្ធិនៅក្នុងកិច្ចប្រជុំមហាសន្និបាតលើកទី៤៧ របស់ខ្លួននៅប្រទេសរវ៉ាន់ដា ដែលជាវឌ្ឍនភាពដ៏សំខាន់មួយទៀតសម្រាប់កម្ពុជា។ 

លោក ចាន់ សូផា អគ្គនាយកវិទ្យាស្ថានស្តង់ដារកម្ពុជា បានលើកឡើងថា ក្នុងនាមជាសមាជិកពេញសិទ្ធិ កម្ពុជាមានសិទ្ធិចូលរួមនៅក្នុងគណៈកម្មការបច្ចេកទេសរបស់អង្គការ ISO ចូលរួមអភិវឌ្ឍស្តង់ដារពិភពលោក និងការពារផលប្រយោជន៍ជាតិនៅលើឆាកអន្តរជាតិក្នុងវិស័យស្តង់ដារ។

លោកបានបន្តថា ការដំឡើងកម្រិតសមាជិកភាពនេះអនុញ្ញាតឱ្យកម្ពុជាមានសំឡេង ក្នុងការអភិវឌ្ឍស្តង់ដារអន្តរជាតិដែលផ្តល់ផលដល់ឧស្សាហកម្ម និងពាណិជ្ជកម្មរបស់កម្ពុជា ហើយក៏ជាការបើកឱកាសដ៏សំខាន់សម្រាប់ទាំងវិស័យសាធារណៈ និងឯកជន ក្នុងការសហការអភិវឌ្ឍស្តង់ដារដែលផ្តោតលើអាទិភាពជាតិរបស់កម្ពុជាផងដែរ។

 លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត បច្ចេកវិទ្យា និងនវានុវត្តន៍ លើកឡើងនៅក្នុងទិវាស្តង់ដារពិភពលោកប្រចាំឆ្នាំ២០២៥ នៅថ្ងៃទី១៤ ខែតុលា ឆ្នាំ២០២៥នេះថា ស្តង់ដារបានជួយឱ្យប្រទេសនានាធ្វើការរួមគ្នា ឆ្ពោះទៅសម្រេចគោល ដៅអភិវឌ្ឍន៍ប្រកបដោយចីរភាព (SDGs) របស់អង្គការសហប្រជាជាតិ ដោយផ្តល់មូលដ្ឋានគ្រឹះផ្នែកបច្ចេកទេស សម្រាប់ជំរុញផលិត កម្ម លើកកម្ពស់ការធ្វើពាណិជ្ជកម្មប្រកបដោយការទទួលខុសត្រូវ នវានុវត្តន៍ និងធន់និងវិបត្តិ។

លោករដ្ឋមន្ត្រី បានបញ្ជាក់ថា ការចូលរួមរបស់កម្ពុជាក្នុងសកម្មភាពអភិវឌ្ឍន៍ស្តង់ដារអន្តរជាតិ គឺជាកិច្ចការមួយដ៏សំខាន់ សម្រាប់ការពារផលប្រយោជន៍ឧស្សាហកម្ម និងអាជីវកម្មនៅកម្ពុជា បច្ចុប្បន្នអង្គការ ISO មានសមាជិក១៧៤ ប្រទេស មានគណៈកម្មការបច្ចេកទេសចំនួន ៨២៩ ដែលបានអនុវត្តស្តង់ដារចំនួនជាង ២,៦ម៉ឺនស្តង់ដារ ក្នុងនោះមានប្រទេសជាសមាជិកជា ច្រើនបានចូលរួមយ៉ាងសកម្ម ក្នុងគណៈកម្មការបច្ចេកទេស និងបានជួយឱ្យប្រទេសទាំងនោះមានឧស្សាហកម្មរីកចម្រើន និងមាន ទីផ្សារធំទូលាយសម្រាប់ផលិតផលរបស់ខ្លួន៕