អង្គការស្រាវជ្រាវមួយនិយាយថាឧក្រិដ្ឋជនដ៏ធំម្នាក់ទៀតរត់ពីតៃវ៉ាន់មកសម្ងំបើកកន្លែងរកស៊ី និងជាប់ពាក់ព័ន្ធទីតាំងឆបោកនៅកម្ពុជា !

បុរសជនជាតិចិនតៃវ៉ាន់ឈ្មោះ ហ៊ូ មីង ជីន (Hsu Ming Chin) បានរត់ភៀសខ្លួនមកកម្ពុជានិងប្ដូរឈ្មោះថ្មីជា ថូម៉ាស់ ស៊ូ (Thomas Xu) បន្ទាប់ពីទទួលបានសញ្ជាតិខ្មែរនៅឆ្នាំ២០១៩ ដើម្បីគេចខ្លួនពីការតាមចាប់របស់អាជ្ញាធរតៃវ៉ាន់ ពាក់ព័ន្ធនឹងការផលិតគ្រឿងញៀន និងការចោទប្រកាន់រត់ពន្ធគ្រឿងញៀនដែលមានតម្លៃសរុប៣៦៤លានដុល្លារ។ 

អង្គការអន្តរជាតិមួយដែលជំនាញស៊ើបអង្កេតរឿងអំពើពុករលួយនិងបណ្ដាញឧក្រិដ្ឋកម្ម (OCCRP) បានចេញផ្សាយរបាយការណ៍នៅខែមករានេះថា ឧក្រិដ្ឋជនគ្រឿងញៀនរូបនេះ បានបើកជំនួញផ្នែកអចលនទ្រព្យដ៏ធំឈ្មោះលីស៊ីនគ្រុប (Lixin Group) នៅប្រទេសកម្ពុជា ហើយបានពង្រីកអាជីវកម្មទៅដល់ប្រទេសហ្សេអកហ្សី (Georgia) ដោយអះអាងថា ខ្លួនជាអ្នកវិនិយោគកើតនៅកម្ពុជា។

ក្រុមហ៊ុន លីស៊ីនគ្រុប (Lixin Group) របស់បុគ្គល ហ៊ូ មីង ជីន បានជាប់ឈ្មោះនៅក្នុងរបាយការណ៍របស់អង្គការសហប្រជាជាតិ ថាជាសហគ្រាសឧក្រិដ្ឋកម្មដ៏ធំមួយ ខណៈមានការរកឃើញថា លីស៊ីនគ្រុប បានជាប់ពាក់ព័ន្ធនឹងការអូសទាញកម្មករជនជាតិចិនឱ្យបម្រើការនៅតាមមជ្ឈមណ្ឌលឆបោកនៅកម្ពុជា។

ក្រោយពីបែកធ្លាយរឿងអាស្រូវ ឧក្រិដ្ឋ ហ៊ូ មីង ជីន បានផ្ទេរទ្រព្យសម្បត្តិ និងមុខរបររកស៊ី ទៅឱ្យប្រុសបង្កើតរបស់ខ្លួន ឈ្មោះ ហ៊ូ មីង ឆាវ ( Hsu Ming Chao) និងបានដកឈ្មោះ និងរូបថតរបស់ខ្លួនក្នុងនាមជាប្រធានក្រុមហ៊ុន លីស៊ីនគ្រុប ចេញពីគេហទំព័ររបស់ក្រុមហ៊ុន។

នៅកម្ពុជា ក្រុមហ៊ុន លីស៊ីនគ្រុប បានចាប់ដៃគ្នាជាមួយក្រុមហ៊ុនរបស់អ្នកស្រី ភួ ហ៊ុងស៊ួន ភរិយារបស់ឧកញ៉ា ស៊ី គង់ទ្រីវ ។  របាយការណ៍អង្គការខាងលើនិយាយថាបងប្អូនត្រកូល «ហ៊ូ» ក៏ឧបត្ថម្ភប្រាក់ជាច្រើនដល់ កាកបាទក្រហមកម្ពុជា ហើយទទួលបានឱកាសចូលជួបសំណះសំណាលផ្ទាល់ជាមួយភរិយាប្រធានព្រឹទ្ធសភាសម្តេចតេជោ ហ៊ុន សែន គឺជំទាវ ប៊ុន រ៉ានី និងអ្នកស្រី ម៉ែន សំអន ដែលជាឧត្តមប្រឹក្សាផ្ទាល់ព្រះមហាក្សត្រ និងជាអនុប្រធានគណបក្សប្រជាជនកម្ពុជា។មិនទាន់ឃើញមានប្រតិកម្មពីសាម៉ីខ្លួននិងអ្នកពាក់ពន្ធ័ចំពោះការចោទប្រកាន់របស់អង្គការខាងលើនេះនៅឡើយទេ?៕