ក្រសួងបរិស្ថានព្រលះមេបក្សខ្មែរក្រោកដែលមានលិខិតបេសកកម្មចុះធ្វើការថាជាទង្វើគ្មានការទទួលសខុសត្រូវមិនចេះធើការ?!
27-October-2025 / ព័ត៌មានជាតិ
ភ្នំពេញ៖ ក្រសួងបរិស្ថានបានចាត់ទុកសកម្មភាពរបស់ប្រតិភូគណបក្សខ្មែរក្រោក ដឹកនាំដោយលោក សុខ សុវណ្ណវឌ្ឍនាសប៊ុង សមាជិកឧត្តមក្រុមប្រឹក្សាពិគ្រោះនិងផ្តល់យោបល់ កំឡុងពេលចុះបំពេញបេសកកម្មនៅក្នុងតំបន់ឧទ្យានជាតិព្រះសីហនុ(រាម) ក្នុងខេត្តព្រះសីហនុកាលពីទី២ខែឧសភាឆ្នាំ២០២០ភ្ជាប់ដោយលិខិតបំពេញបេសកកម្មថាជានេះទង្វើគ្មានការទទួលខុសត្រូវ និងភាពមិនយល់ដឹងពីរបៀបរបប និងនីតិវិធីនៃការបំពេញការងារ នៅក្នុងក្របខណ្ឌនៃការងាររដ្ឋបាលសាធារណៈ។
ក្រសួងបរិស្ថានតាមរយៈសេចក្តីប្រកាសព័ត៌មានមួយចុះថ្ងៃទី៣ឧសភាលើកឡើងថា លោក សុខ សុវណ្ណវឌ្ឍនាសប៊ុង មានចរឹតក្រអឺតក្រទមនិងបានប្រើប្រាស់ពាក្យសម្តីប្រមាថ មួលបង្កាច់ ចោទប្រកាន់ដោយគ្មានមូលដ្ឋានភស្តុតាងច្បាស់លាស់ទៅលើអាជ្ញាធរមូលដ្ឋាន និងមន្ត្រីមានសមត្ថកិច្ច គឺមិនសាកសមជាអ្នកមានសមត្ថកិច្ច និងជាដៃគូរាជរដ្ឋាភិបាល ចុះបំពេញបេសកកម្មនោះទេ។
ក្រសួងបរិស្ថាននៅបានបដិសេធចំពោះការចោទប្រកាន់ទាំងលាយរបស់ប្រធានគណបក្សខ្មែរក្រោកនេះទៅសមត្ថកិច្ច។ ក្រសួងលើកឡើងថា ក្រសួងបានបើកចំហរនិងតែងតែផ្តល់កិច្ចសហការដល់សមាជិកឧត្តមក្រុមប្រឹក្សាពិព្រោះនិងផ្តល់យោបល់ ប៉ុន្តែស្នើសុំឲ្យប្រធានប្រតិភូគណបក្សខ្មែរក្រោកនេះស្វែងយល់អំពីបែបបទការងាររដ្ឋបាលសាធារណៈ និងតីតិវិធីច្បាប់ក្នុងការចុះបំពេញការងារ ដោយគួរជូនដំណឹងនិងស្នើសុំកិច្ចសហការពីក្រសួង ដែលស្ថាប័នជំនាញ។
ក្រសួងបរិស្ថានថាប្រធានគណបក្សមួយចុះបំពេញការងារដោយមិនដឹងទិសតំបន់បែបនេះ មិនបាននាំមកនូវផលប្រយោជន៍ដល់សង្គមជាតិឡើយផ្ទុយទៅវិញគឺបង្កើតនូវភាពអនាធិបតេយ្យនិងជាការលើកទឹកចិត្តដល់ជនល្មើសរុករានទន្ទ្រានកាន់កាប់ដីរដ្ឋដោយខុសច្បាប់ទៅវិញទេ។ក្រសួងបរិស្ថានបានបដិសេធរាល់ការលើកឡើងរបស់ លោក សុខ សុវណ្ណវឌ្ឍនាសប៊ុង ដែលបានចុះផ្សាយលើបណ្តាញសង្គមនិងបានស្នើឲ្យប្រធានគណបក្សខ្មែរក្រោកនេះ ទទួលខុសត្រូវនូវអ្វីដែលខ្លួនបានផ្សាយ។
លោក សុខ សុវណ្ណវឌ្ឍនាសប៊ុង មិនទាន់មានប្រតិកម្មយ៉ាងណាចំពោះការលើកឡើងរបស់ក្រសួងបរិស្ថាននេះនោះឡើយទេតែ លោកវីល្លាម បានសរសេរសារតាមហ្វេសប៊ុក កាលពី ថ្ងៃទី២ ខែឧសភា ឆ្នាំ ២០២០ ឲ្យដឹងថា៖ក្បួនដំណើរស្របច្បាប់ របស់ឧត្តមក្រុមប្រឹក្សាពិគ្រោះ និងផ្ដល់យោបល់ ត្រូវគេបង្ខាំងរារាំងដំណើរដោយ ក្រុមសន្តិសុខឯកជន និងមន្ត្រីបរិស្ថាន ដឹកនាំដោយឈ្មោះ មួ ឆាយ និងមន្ត្រីរដ្ឋបាលស្រុក ខណៈដែលយើងខ្ញុំធ្វើដំណើរចុះទៅពិនិត្យរកការពិត ក្រោយខ្ញុំទទួលដំណឹងថា អាជ្ញាធរប្រើប្រាស់ហឹង្សា បង្ខាំងពលរដ្ឋ ពីចន្លោះ៣០ ទៅ៥០នាក់ ជាពិសេសករណីនេះ ធ្លាប់មានពលរដ្ឋស្លាប់ ដោយការបង្ខាំងនេះទៀតផង ដែលករណីនេះកើតឡើងនៅភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ ។
លោកវីល្លាម បានបន្តថា មន្ត្រីបរិស្ថាន និងពួកសន្តិសុខឯកជន នេះ បានឃាំងដំណើរពួកយើងខ្ញុំ ដោយឲ្យយើងខ្ញុំចាំគោលការណ៍ជាបន្តបន្ទាប់ ទោះមានលិខិតបេសកកម្ម ពីស្ថាប័នមកក៏ដោយ ខណៈដែលផ្លូវនេះ ជាផ្លូវតែមួយគត់សម្រាប់ទៅទីតាំងកើតហេតុ ដោយសល់ត្រឹម១គីឡូមែត្រទៀតប៉ុណ្ណោះ គឺដល់ទីតាំងកើតហេតុហើយ ។លោកវីល្លាមថា នេះជាទង្វើបំពានដោយចេតនា របស់មន្ត្រីពាក់ព័ន្ធ ក្នុងការព្យាយាមបិទបាំងការពិត និងបង្កើតចលនាអបគមន៍នៅទីនេះ៕
