រដ្ឋមន្ត្រីក្រសួងការបរទេសថាការចាប់ខ្លួន លោក ចេន ហ្ស៊ី ជាការឆ្លុះបញ្ចាំងពីការប្តេជ្ញាចិត្តយ៉ាងមុតមាំរបស់កម្ពុជា ក្នុងការប្រយុទ្ធប្រឆាំងឧក្រិដ្ឋកម្មឆបោកតាមប្រព័ន្ធបច្ចេកវិទ្យា!

ភ្នំពេញ៖ ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានប្រាប់កាសែតថា ការចាប់ខ្លួន លោក ចេន ហ្ស៊ី កាលពីពេលថ្មីៗនេះ គឺជាការឆ្លុះបញ្ចាំងពីការប្តេជ្ញាចិត្តយ៉ាងម៉ឺងម៉ាត់របស់កម្ពុជា ក្នុងការប្រយុទ្ធប្រឆាំងឧក្រិដ្ឋកម្មឆ្លងដែន ហើយកម្ពុជាបន្តកិច្ចសហប្រតិបត្តិការយ៉ាងជិតស្និទ្ធជាមួយប្រទេសដៃគូក្នុងការបង្រ្កាបឧក្រិដ្ឋកម្មឆ្លងដែន ជាពិសេសឧក្រិដ្ឋកម្មឆបោកតាមប្រព័ន្ធបច្ចេកវិទ្យា (Online Scams)។ 

ផ្តល់បទសម្ភាសន៍ជាមួយសារព័ត៌មាន Reuters កាលពីថ្ងៃទី១៤ ខែមករា ឆ្នាំ២០២៦ លោកប្រាក់សុខុន បានបញ្ជាក់ថា៖ «កម្ពុជាប្តេជ្ញាចិត្តក្នុងការបន្តកិច្ចសហប្រតិបត្តិការលើការបង្រ្កាបឧក្រិដ្ឋកម្មឆ្លងដែន ក៏ដូចជាឧក្រិដ្ឋកម្មឆបោកតាមប្រព័ន្ធបច្ចេកវិទ្យា ជាមួយប្រទេសជាច្រើនមានដូចជា៖ សហរដ្ឋអាម៉េរិក ចិន សាធារណរដ្ឋកូរ៉េ និងប្រទេសជិតខាងមានដូចជា វៀតណាម និងថៃ ជាដើម ហើយការចាប់ខ្លួន លោក ចេន ហ្ស៊ី គឺជាលទ្ធផលនៃការស៊ើបអង្កេតដ៏យូរមួយ»។

លោក ឧបនាយករដ្ឋមន្ត្រី បានគូសបញ្ជាក់ថា៖ «លោក ចេន ហ្ស៊ី មានសញ្ជាតិកម្ពុជា ប៉ុន្តែនៅពេលដែលយើងធ្វើការស៊ើបអង្កេត សញ្ជាតិរបស់គាត់មិនត្រូវបានទទួលបានដោយស្របច្បាប់នោះទេ ហើយគាត់ក៏ជាជនជាតិចិនផងដែរ ។ដូច្នេះយើងបានសម្រេចចិត្តធ្វើបត្យាប័នគាត់ទៅប្រទេសចិន»។

មានសេចក្តីរាយការថា ព្រះករុណាព្រះមហាក្សត្រ បានត្រាស់បង្គាប់ដកគោរមងារអ្នកឧកញ៉ាពីលោក ចេន ហ្ស៊ី និងសញ្ជាតិខ្មឺរកាលពីខែធ្នូ ឆ្នាំ២០២៥។តែមិនមានពត៍មានស្តីពីការដកសញ្ជាតិនិងគោរម្យងារត្រូវបានបង្ហាញជាសាធារណ:ដូចមុនៗទ។ លោកចេនហ្ស៊ីប្រធានក្រុមហ៊ុនព្រិនស៍គ្រុបដែលមានទ្រព្យសម្បតិ្តអចលន:ទ្រព្យនិងចលន:ទ្រព្យរាប់រយលានដុល្លារនៅកម្ពុជាត្រូវបានសមត្ថកិច្ចឃាត់ខ្លួននៅថ្ងៃទី០៦ ខែមករា ឆ្នាំ២០២៦ និងបានបញ្ជូនទៅសាធារណរដ្ឋប្រជាមានិតចិន។

រាជរដ្ឋាភិបាលមិនបានឲ្យដឹងទេថាតើទ្រព្យសម្បត្តិរបស់ចេនហ្ស៊ីត្រូវបានចាត់ការបែបណានោះទេក្រៅការប្រកាសរបស់ធាគារជាតិឲ្យអតិថិជនធនាគាទៅតវ៉ានិងនិយតករប្រកាសបញ្ឈប់ឲ្យទិញលក់អចលន:ទ្រព្យក្រុមហ៊ុនព្រិនស៍តែប៉ុណ្ណោះ។សូមបញ្ជាក់ដែរថាលោកឯកអគ្គរដ្ឋទូតចិនវ៉ាងវិនប៊ិនប្រចាំកម្ពុជាក៏បានបង្ហោះហ្វេសប៊ុកអំពីបញ្ហាឧក្រឹដ្ឋកម្មឆបោកអនឡាញនៅកម្ពុជាដោយទាមទាឲ្យមានកិច្ចសហការបង្ក្រាបផងដែរ។