កម្ពុជាថាផ្ទុះគ្រាប់នៅមុំបីរបួសទាហ៊ានកម្ពុជាថៃថាកម្ពុជាបាញ់ផ្លោងចូលដីវារបួសទាហានម្នាក់

ព្រះវិហារ៖នៅវេលាម៉ោង៧៖២៧នាទីព្រឹក ថ្ងៃទី៦ ខែមករា ឆ្នាំ២០២៦ ក្នុងភូមិសាស្ត្រមុំបី ខេត្តព្រះវិហារ កងកម្លាំងកម្ពុជាបានរៀបចំសណ្តាប់ធ្នាប់ និងរបៀបរៀបរយ នៅមូលដ្ឋានឈរជើងរបស់ខ្លួនក្នុងដែនអធិបតេយ្យរបស់កម្ពុជា ស្របពេលជាមួយគ្នានោះក៏មានការផ្ទុះគ្រាប់ចេញពីគំនរសំរាម បណ្តាលឱ្យកងកម្លាំងកម្ពុជាដែលកំពុងបំពេញការងារនៅទីនោះរងរបួសធ្ងន់និងស្រាលចំនួន២នាក់។ បច្ចុប្បន្នកងកម្លាំងដែលរងរបួសដោយសារឧបទ្ទវហេតុខាងលើ បានបញ្ជូនទៅព្យាបាលនៅមន្ទីរពេទ្យរួចរាល់ហើយ។ នេះបើតាមការបញ្ជាក់របស់លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ។ 

បើតាមអ្នកនាំពាក្យក្រសួងការពារជាតិ បានបញ្ជាក់បន្ថែមថា ក្នុងករណីខាងលើនេះក្រុមការងារសម្របសម្រួលរវាងភាគីកម្ពុជា-ថៃបាននឹងកំពុងធ្វើការរួមគ្នា ហើយក្រុមទំនាក់ទំនងនៃប្រទេសទាំងពីរបានសាកសួរនិងផ្តល់ព័ត៌មាន ដើម្បីដោះស្រាយជាមួយគ្នារួចរាល់ហើយអំពីបញ្ហានេះ។ផ្ទុយទៅវិញ សារព័ត៌មានថៃឯណោះវិញបែរជាមានការចុះផ្សាយដោយដកស្រង់សេចក្តីថ្លែងការណ៍របស់កងទ័ពថៃក្នុងន័យចោទប្រកាន់ថា កម្ពុជាបានរំលោភបទឈប់បាញ់។ ថៃចោទថាកម្ពុជាបានបាញ់គ្រាប់កាំភ្លើងត្បាល់ចូលទៅក្នុងខេត្តឧប៊ុនរ៉ាចាថានីរបស់ប្រទេសថៃ បណ្តាលឱ្យទាហានថៃម្នាក់រងរបួសស្រាលដោយសារអំបែងគ្រាប់ ហើយត្រូវបានជម្លៀសចេញដើម្បីព្យាបាល។

គួរជម្រាបថា បើតាមលោកស្រីឧត្តមសេនីយ៍ឯក ម៉ាលី សុជាតាបានរំលឹក ដោយឈរលើស្មារតីនៃការដោះស្រាយបញ្ហាដោយសន្តិវិធីផ្អែកលើក្របខណ្ឌច្បាប់អន្តរជាតិ និងក្នុងនាមជាប្រទេសដែលមានការទទួលខុសត្រូវខ្ពស់ និងស្រឡាញ់សន្តិភាពដ៏ពិតប្រាកដ រាជរដ្ឋាភិបាលកម្ពុជា កងកម្លាំងរបស់កម្ពុជា បញ្ជាក់ពីការប្តេជ្ញាចិត្តយ៉ាងម៉ឺងម៉ាត់ ស្មោះត្រង់ សុចរិតក្នុងការគោរព និងអនុវត្តយ៉ាងពេញលេញ និងខ្ជាប់ខ្ជួននូវលក្ខខណ្ឌនិងកិច្ចព្រមព្រៀងនាពេលកន្លងមក។ នៅក្នុងនោះមានបទឈប់បាញ់រវាងកម្ពុជា-ថៃ ដែលបានចុះហត្ថលេខាកាលពីថ្ងៃទី២៨ ខែកក្កដា ឆ្នាំ២០២៥, សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ ដែលភាគីទាំងពីរបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥, សេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) ដែលបានចុះហត្ថលេខានៅថ្ងៃទី២៧ ខែធ្នូ ឆ្នាំ២០២៥ និងឯកសារព្រមព្រៀងផ្សេងៗ ដើម្បីឆ្ពោះទៅការធ្វើឱ្យប្រសើរឡើងវិញឆាប់រហ័ស និងការវិលត្រឡប់ទៅរកប្រក្រតីភាព សន្តិភាព ស្ថិរភាព និងសុវត្ថិភាពជូនប្រជាពលរដ្ឋដែលរស់នៅតាមបណ្តាយព្រំដែនប្រទេសទាំងពីរ។

ទាក់ទងបញ្ហានេះដែរនាយករដ្ឋមន្ត្រីចាំផ្ទះ លោក អនុធីន ឆានវីរៈគុល បានលើកឡើងថា កងកម្លាំងថៃបានដាក់ពាក្យបណ្តឹងតវ៉ាទៅកាន់ប្រទេសកម្ពុជា បន្ទាប់ពីគ្រាប់កាំភ្លើងត្បាល់មួយគ្រាប់បានធ្លាក់មកលើទឹកដីថៃ នៅតំបន់ភ្នំលេខ ៤៦៩ (Hill 469) ក្នុងតំបន់ Chong Bok ដែលបានបណ្តាលឱ្យទាហានម្នាក់រងរបួស ហើយកំពុងរង់ចាំការបកស្រាយពីទីក្រុងភ្នំពេញ។ នេះបើតាមការចុះផ្សាយរបស់កាសែតថៃ The Nation ខណៈក្រសួងការពារជាតិកម្ពុជា បានឱ្យដឹងថានាព្រឹកនេះដែរ មានករណីផ្ទុះគ្រាប់ចេញពីគំនរសំរាម ដែលបណ្តាលឱ្យយោធាកម្ពុជាពីរនាក់រងរបួស។

នៅវិមានរដ្ឋាភិបាលនាទីក្រុងបាងកក ក្នុងថ្ងៃអង្គារ ទី៦ ខែមករានេះ លោក អនុធីន ឆានវីរៈគុល បានផ្តល់ព័ត៌មានដល់ប្រព័ន្ធផ្សព្វផ្សាយអំពីគ្រាប់កាំភ្លើងត្បាល់មួយគ្រាប់ ដែលត្រូវបានចោទថាបានបាញ់ចេញពីភាគីកម្ពុជា ហើយបានធ្លាក់នៅតំបន់ភ្នំលេខ៤៦៩ ក្នុងតំបន់ Chong Bok។ លោក អនុទីន បានបន្តថា រដ្ឋាភិបាលបានទទួលព័ត៌មានថ្មីៗ ជាបន្តបន្ទាប់ ហើយស្ថាប័នពាក់ព័ន្ធកំពុងអនុវត្តតាមនីតិវិធីដែលបានកំណត់ក្នុងអនុស្សរណៈនៃការយោគយល់គ្នា (MoU)។

លោកបានបន្ថែមថា ក្រសួងការបរទេសក៏បានផ្ញើលិខិតទៅកាន់រដ្ឋមន្ត្រីការបរទេសកម្ពុជា ដើម្បីស្នើសុំការបកស្រាយផងដែរ ដោយបញ្ជាក់ថា ហេតុការណ៍នេះ អាចចាត់ទុកថាជាការរំលោភលើកិច្ចព្រមព្រៀងឈប់បាញ់។ លោកបានមានប្រសាសន៍ថា ប្រទេសថៃកំពុងស្នើឱ្យកម្ពុជាផ្តល់ការបំភ្លឺតាមផ្លូវទូតជាផ្លូវការ។

លោក អនុទីន បានបញ្ជាក់ថា ប្រទេសថៃមិនទាន់បានប្រើប្រាស់ច្បាប់នៃការប៉ះទង្គិច (Rules of Engagement) ឬចាត់វិធានការឆ្លើយតបណាមួយនៅឡើយទេ ប៉ុន្តែលោកបានសង្កត់ធ្ងន់ថា យោធាបានត្រៀមខ្លួនរួចជាស្រេច ហើយរាល់ការឆ្លើយតបណាមួយនឹងត្រូវសម្រេចដោយភាគីថៃ។បើតាមសម្តីនេះបង្ហាញថាថៃបានយកលេសនេះគម្រាមកម្ពុជាដែលទាមទាកោះប្រជុំJbC។តែថៃវាមិនចង់ប្រជុំព្រោះវាទាមទាយកលទ្ធផលដែលទាហ៊ានវាធ្វើបានដើម្បីឃោសនាបោះឆ្នោតសិន។ម្យ៉ាងក៏មិនប្រាកដថាថៃវាព្រមដកថយចេញពីកន្លែងដែលវាកាន់កាប់ឈរជើងជាក់ស្តែងឡើយ។ទោះជាកម្ពុជាសំអាងច្បាប់អន្តរជាតិក៏ដោយព្រោះថៃដឹងថាកម្ពុជាគ្មានបង្អែកសម្រាប់ៀបសង្កត់វាដូចជំនាន់មុនទេ៕