សាលាដំបូងខេត្តកំពង់ស្ពឺ និងកងទ័ពជើងគោគ ប្រាប់ពីការឃាត់ខ្លួនលោកវរសេនីយ៍ទោ សុខ ស៊ីនណារ៉េតពេលកូនតវ៉ា!!
11-February-2026 / សន្តិសុខសង្គម
ខេត្តកំពង់ស្ពឺ៖សាលាដំបូងខេត្តកំពង់ស្ពឺ និងកងទ័ពជើងគោគ បានចេញមកបញ្ជាក់ថា ការចាប់ខ្លួនលោកវរសេនីយ៍ទោ សុខ ស៊ុនណារ៉េត ឪពុករបស់លោក ស៊ន តារា គឺពាក់ព័ន្ធនឹងករណីរក្សាទុក ដោយខុសច្បាប់នូវសារធាតុញៀន មិនមែនជារឿងនយោបាយឫកិច្ចការកងទ័ពនោះឡើយ។ការបកស្រាយបន្ទាប់ពីការការប្រតិកម្មពីកូនប្រុសគឺលោកស៊នដារ៉ាសកម្មជនប្រឆាំងនៅក្រៅប្រទេសតវ៉ា។
បញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ សូមគោរពជម្រាបជូន សាធារណៈជន និងអ្នកសារព័ត៌មាន មេត្តាជ្រាបថា៖ កាលពីថ្ងៃទី១៣ ខែវិច្ឆិកា ឆ្នាំ២០២៤ កម្លាំងកងរាជអាវុធហត្ថខេត្តកំពង់ស្ពឺ បានធ្វើការឃាត់ខ្លួនជនសង្ស័យឈ្មោះ សុខ ស៊ីនណារ៉េត ភេទប្រុស អាយុ៦៦ឆ្នាំ ពាក់ព័ន្ធនឹងករណីបទល្មើសរក្សាទុកដោយខុសច្បាប់នូវសារធាតុញៀន ប្រព្រឹត្តនៅភូមិដក់ពរ សង្កាត់ ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។ករណីខាង លើនេះ មិនមានការពាក់ព័ន្ធនឹងកិច្ចការកងទ័ព ឬកិច្ចការនយោបាយឡើយ គឺជាបទល្មើសព្រហ្មទណ្ឌ ជាក់ស្តែងដែលពាក់ព័ន្ធនឹងគ្រឿងញៀនប៉ុណ្ណោះ ។
បន្ទាប់មកនៅថ្ងៃទី១៤ ខែវិច្ឆិកា ឆ្នាំ២០២៤ អ្នកនាំពាក្យសាលាដំបូងខេត្តកំពង់ស្ពឺ ក៏បានចេញសេចក្តីប្រកាសជូនដល់សាធារណជន និងអ្នកសារព័ត៌ មាន ថា៖ កាលពីថ្ងៃទី១៤ ខែវិច្ឆិកា ឆ្នាំ២០២៤ សាលាដំបូងខេត្តកំពង់ស្ពឺ បានទទួលចាត់ការលើសំណុំរឿង ព្រហ្មទណ្ឌលេខៈ១៨៩៩ ចុះថ្ងៃទី ១៤ ខែវិច្ឆិកា ឆ្នាំ២០២៤ ទាក់ទិននឹងករណី រក្សាទុកដោយខុសច្បាប់នូវសារធាតុញៀន ដែលមានជនត្រូវចោទឈ្មោះ សុខ ស៊ីនណារ៉េត ភេទប្រុស ឆ្នាំកំណើត១៩៥៨ ត្រូវបានចោទប្រកាន់ពីបទៈ រក្សាទុក ដោយខុសច្បាប់នូវសារធាតុញៀន ប្រព្រឹត្តនៅភូមិដក់ពរ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ កាលពី ថ្ងៃទី១៣ ខែវិច្ឆិកា ឆ្នាំ២០២៤។
បទល្មើសព្រហ្មទណ្ឌដែលមានចែងឱ្យផ្តន្ទាទោសតាមបញ្ញត្តិមាត្រា៤០ នៃច្បាប់ស្តីពី ការត្រួតពិនិត្យគ្រឿងញៀន ដោយបានដកហូតគ្រឿងញៀនចំនួន ០២ (ពីរ)កញ្ចប់ ជាប្រភេទមេតំហ្វេតាមីន ទម្ងន់ ១៥,៥២(ដប់ប្រាំក្បៀសហាសិបពីរ)ក្រាម និងសារធាតុមិនច្បាស់ចំនួន ០១(មួយ)កញ្ចប់ ទម្ងន់ ១៣,៧៨ (ដប់បីក្បៀសចិតសិបប្រាំបី)ក្រាម។បន្ទាប់ពី សួរចម្លើយជនត្រូវចោទ និងពិនិត្យភស្តុតាងនានាក្នុងសំណុំ រឿង ចៅក្រមស៊ើបសួរសាលាដំបូងខេត្តកំពង់ស្ពឺ បានសម្រេចឃុំខ្លួនបណ្តោះអាសន្នលើជនត្រូវចោទខាងលើ ដើម្បីបន្តការស៊ើបសួរតាមនីតិវិធីច្បាប់។
សូបញ្ជាក់ថាករណីយ៍នេះ លោក ស៊ន តារា បានអំពាវនាវដល់អតីតសម្តេចនាយករដ្ឋមន្ត្រីកម្ពុជា សម្តេចតេជោ ហ៊ុន សែន ឱ្យដោះលែងឪពុករបស់លោកគឺ លោក សុខ ស៊ុនណារ៉េត ដែលត្រូវបានសាលាដំបូងខេត្តកំពង់ស្ពឺ ចោទប្រកាន់ពីបទ«រក្សាទុកដោយខុសច្បាប់នូវសារធាតុញៀន» ដែលប្រឈមមុខនឹងការជាប់ពន្ធនាគារពី ៥ឆ្នាំ ទៅ១០ឆ្នាំ តាមមាត្រា៤០ នៃច្បាប់ស្តីពីការត្រួតពិនិត្យគ្រឿងញៀន។
លោក ស៊ន តារា គឺជាសកម្មជននយោបាយរបស់អតីតគណបក្សសង្គ្រោះជាតិ ហើយកំពុងរស់នៅប្រទេសបារាំង និងបានបន្តនិយាយរិះគន់រដ្ឋាភិបាលកម្ពុជាមិនសំចៃមាត់លើបញ្ហាជាច្រើន រួមទាំងការគាបសង្កត់លើក្រុមអ្នកនយោបាយជំទាស់។លោក សុខ ស៊ុនណារ៉េត ជាមន្ត្រីយោធាជាន់ខ្ពស់ និងជាឪពុករបស់លោក ស៊ន តារា ត្រូវបានកងរាជអាវុធហត្ថខេត្តកំពង់ស្ពឺចាប់ខ្លួន កាលពីថ្ងៃទី ១៣ ខែវិច្ឆិកា។លោក ស៊ន តារា លើកឡើងថា ឪពុករបស់លោកជាមន្ត្រីយោធាដែលមានភក្តីភាពនឹងគណបក្សប្រជាជនកម្ពុជាតាំងពីដើមមក ដូច្នេះមិនគួរមានការចាប់ខ្លួន និងដាក់ពន្ធនាគារឪពុករបស់លោកបែបនោះឡើយ។ លោកថា មុខព្រួញនយោបាយគឺជារូបលោកទៅវិញទេ។
លោកស៊នដារ៉ាបញ្ជាក់តាមរយៈវីដេអូ ដែលបង្ហោះក្នុងគណនីយហ្វេសប៊ុករបស់លោក កាលពីថ្ងៃទី ១៤ ខែវិច្ឆិកាថា៖ «ខ្ញុំសូមអាជ្ញាធរនៃរដ្ឋាភិបាលកម្ពុជា អគ្គមហាសេនាធីបតីតេជោ ហ៊ុន សែន មេត្តាដោះលែងឪពុករបស់ខ្ញុំដែលជាជនស្លូតត្រង់។ ខ្ញុំយល់ច្បាស់ថា ផ្ទាំងមុខព្រួញសំដៅមករកខ្ញុំឯណោះទេ។ ប៉ុន្តែឪពុករបស់ខ្ញុំ គាត់គឺជាជនស្លូតត្រង់ និងជាមន្ត្រីរាជការមួយរូប ដែលស្មោះត្រង់ដាច់ខាតជាមួយគណបក្សប្រជាជនកម្ពុជាតាំងពីដើមមក»។
លោកបន្ថែមថា៖ «យើងម្នាក់ៗសុទ្ធតែប្រើពាក្យសន្តិភាព ឬក៏ម្លប់សន្តិភាព ខ្ញុំជឿជាក់យ៉ាងមុតមាំថាក្រុមគ្រួសាររបស់ខ្ញុំ ជាពិសេសឪពុករបស់ខ្ញុំអាចសោយសុខសន្តិភាព បើទោះបីជាខ្ញុំជាកូនដែលមានឆន្ទៈនិងគំនិតផ្ទុយអំពីឪពុករបស់ខ្ញុំយ៉ាងណាក៏ដោយ ប៉ុន្តែនិន្នាការនយោបាយជារឿងធម្មតា។ ខ្ញុំជឿថា សម្តេចមានគុណធម៌ មានធម៌មេត្តាប្រណីចំពោះឪពុករបស់ខ្ញុំដែលបានបម្រើគណបក្សប្រជាជន ហើយសម្តេចមានមុខព្រួញមករកខ្ញុំ សម្តេចមករកខ្ញុំទៅចុះ!»។
មានការកត់សម្គាល់ថាកាលពីកន្លងទៅ សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា និងបច្ចុប្បន្នជាប្រធានព្រឹទ្ធសភា ជារឿយៗមានប្រតិកម្មខ្លាំងៗទៅលើលោក ស៊ន តារា ចំពោះការអត្ថាធិប្បាយបែបរិះគន់ និងចំអកឡកលើយខាងនយោបាយតាមប្រព័ន្ធទំនាក់ទំនងសង្គមហ្វេសប៊ុក ជុំវិញការដឹកនាំរបស់គណបក្សប្រជាជនកម្ពុជា។សម្តេចតេជោ កាលពីថ្ងៃទី ២៥ ខែមេសា ឆ្នាំ ២០២៤ បានព្រមានដកតំណែងក្នុងក្របខណ្ឌយោធានិងប៉ូលិសរបស់ឪពុកបង្កើតនិងប្អូនថ្លៃស្រីរបស់លោក ស៊ន តារា ប្រសិនបើពួកគេមិនអាចណែនាំនិងអប់រំលោក ស៊ន តារា បានដោយលោក ហ៊ុន សែន បានចាត់ទុកលោក ស៊ន តារា ថាជា«ក្មេងពាលនិងព្រហើន»។
កាលនោះ ប្អូនប្រុសហើយនិងឪពុកបង្កើតរបស់លោក ស៊ន តារា ធ្លាប់ចេញសារអំពាវនាវឱ្យលោក ស៊ន តារា បញ្ឈប់ការរិះគន់លើគ្រួសាររបស់លោក ហ៊ុន សែន និងគណបក្សប្រជាជនកម្ពុជា ហើយវិលមកជួបជុំគ្រួសារនៅប្រទេសកម្ពុជាវិញ។ករណីយ៍នេះដែរសកម្មជនបណ្តាញសង្គមលោកជេមសុខក៏បានអំពាវនាវឲ្យដោះលែងផងដែរ។
