វិទ្យាល័យច័ន្ទក្រឹស្នាធ្វើពិធីជួបជុំអាណាព្យាបាលសិស្សឆ្នាំ២០២៥-២០២៦ ដើម្បីស្វែងយល់ដឹងពីការបង្រៀន និងការសិក្សារបស់សិស្ស

ខេត្តព្រៃវែង: នៅព្រឹកថ្ងៃទី១៦ ខែធ្នូ ឆ្នាំ២០២៥ នៅក្នុងបរិវេណវិទ្យាល័យច័ន្ទក្រស្នា ស្ថិតក្នុងឃុំច្រេស ស្រុកមេសាង ខេត្តព្រៃវែង បានរៀបចំពិធីជួបជុំអាណា ព្យាបាលសិស្សានុសិស្ស ក្នុងគោល បំណងស្វែងយល់ដឹងពីការបង្រៀន និងការសិក្សារបស់កូនៗជាសិស្សានុសិស្សនិងការអភិវឌ្ឍន៍របស់សាលាវិទ្យាល័យច័ន្ទក្រឹស្នា ក្រោមអធិបតីភាពលោក យន ម៉ៅ នាយកវិទ្យាល័យច័ន្ទក្រស្នា រួមជាមួយលោកស្រី វ៉ាយ សាវី ក្រុមប្រឹក្សាឃុំច្រេស ព្រមទាំងលោក គ្រូ អ្នកគ្រូ និង មាតា បិតា អាណាព្យាបាលនិងសិស្សានុសិស្សមកពីគ្រប់ថ្នាក់ ចាប់ពីថ្នាក់ទី៧រហូតដល់ថ្នាក់ទី ១២ សរុបមានចំនួនប្រមាណជាង២០០០នាក់បានចូលរួម ។

ថ្លែងក្នុងអង្គពិធីនេះ លោក យន ម៉ៅ ក្នុងនាមជាគណៈគ្រប់គ្រងវិទ្យាល័យច័ន្ទក្រឹស្នា បានមានប្រសាន៍ថា : ក្នុងគោលបំណងបង្កើនគុណភាពនៃសិក្សារៀន សូត្រ ក៏ដូចជាការស្វែងយល់ដឹងពីចំណុចខ្លាំងចំណុចខ្សោយរបស់សិស្ស និងការបង្រៀនរបស់លោកគ្រូអ្នកគ្រូ ព្រមទាំងការអភិវឌ្ឍន៍ក្នុងវិទ្យាល័យច័ន្ទក្រស្នាផងដែរ ។ លោកនាយក វិទ្យាល័យច័ន្ទក្រស្នា បានបញ្ជាក់ថា:គិតមកដល់ឆ្នាំសិក្សា ២០២៥-២០២៦នេះ វិទ្យាល័យ ច័ន្ទក្រឹស្នា មានបុគ្គលិកសិក្សាចំនួន៩១នាក់ (ស្រី១៩នាក់ ) និងគ្រូកំរិតឧត្តមសិក្សាចំនួន៤១នាក់ ក្នុងនោះមានអ្នកគ្រូចំនួន២១នាក់ ។ចំណែកឯសិស្សានុសិស្សក្នុងឆ្នាំសិក្សា២០២៥-២០២៦នេះ មានចំនួនសរុប១៩៧៩នាក់ ហើយថ្មីៗនេះគឺបានទទួលចុះឈ្មោះសិស្សចំនួនជាង១០នាក់ ដែលជាជនភាសឹករត់គេចពីសង្រ្គាមដែលបង្កឡើង ដោយពួកយោធាសៀមឈ្លានពានទឹកដីខ្មែរនៅតាមបណ្តោយព្រំដែនខ្មែរ-ថៃមានដូចជាខេត្តឧត្តរមានជ័យ ខេត្តបាត់ដំបង និងខេត្តមួយចំនួនទៀត ។

លោក យន ម៉ៅ នាយកវិទ្យាល័យច័ន្ទក្រស្នា បានបញ្ជាក់ថា: សំរាប់ឆ្នាំសិស្សា ២០២៤-២០២៥ នៅទូទាំងវិទ្យា ល័យច័ន្ទក្រឹស្នាជាលទ្ធផលនៃការប្រឡងបាក់ឌុប គឺសិស្សបានប្រឡងជាប់៨៧ភាគរយ ក្នុងនោះសិស្សជាប់និទ្ទេស A មានចំនួន០៦នាក់ ក្នុងគោលដៅកំណត់របស់សាលា ចំនួន ១០នាក់ ឯការប្រឡងឌីប្លូម ជាលទ្ធផលទទួលបាន១០០ ភាគរយ ។ ដោយឡែកសំរាប់ ឆ្នាំសិក្សា២០២៥-២០២៦ នេះ វិទ្យាល័យច័ន្ទក្រស្នាបានកំណត់ និងដាក់គោលដៅអោយសិស្សថ្នាក់ទី ១២ ខិតខំសិក្សាដើម្បីប្រឡងបាក់ឌុបជាប់និទ្ទេស Aចំនួន២០នាក់ ។ ក្នុងឱកាស ជួបជុំអាណាព្យាបាលសិស្សឆ្នាំនេះ មាតា បិតា និងអាណា ព្យាបាលសិស្ស ជាច្រើននាក់ ក៏បានឡើងបញ្ចេញមតិសម្តែងនូវការអរគុណដល់លោកគ្រូ អ្នកគ្រូ និងសម្តែងនូវក្តីកង្វល់អំពីការពិបាកក្នុងការអប់រំកូនចៅរបស់គាត់ក៏ដូចជាសំណូមពរអោយលោកគ្រូ អ្នកគ្រូ យកចិត្តទុកដាក់ក្នុងការបង្រៀន និងអប់រំណែនាំដល់សិស្សខ្លះៗ (មួយចំនួនតូច) ដែលមិនខិតខំរៀនសូត្រ ហើយគេចសាលា ឬប្រព្រឹត្តអំពើ ពាលា ប្រាសចាកពីសីលធម៌សង្គម ។

ឆ្លៀតក្នុងឱកាសនេះដែរ គណៈគ្រប់សាលាក៏បានអំពាវនាវដល់មាតា បិតា និងអាណាព្យាបាលសិស្ស សុំអោយចូលរួមឧបត្ថម្ភថវិកាក្នុងការកសាងអភិវឌ្ឍន៍សាលាវិទ្យាល័យច័ន្ទក្រឹស្នា តាមទឹកចិត្ត មនុស្សធម៌ ទៅតាមលទ្ធភាពរបស់ក្រុមគ្រួសារសិស្សនីមួយៗ ។ ចុងបញ្ចប់នៃកម្មវិធី លោកស្រី វ៉ាយ សាវី ក្រុមប្រឹក្សាឃុំច្រេស បានឡើងមានប្រសាសន៍ សំណេះសំណាល នឹងលើកទឹកចិត្ត ព្រមទាំងជំរុញអោយសិស្សានុសិស្សទាំងអស់ ខិតខំរៀនសូត្រ ត្រង់ត្រាប់ស្តាប់ការអប់រំ និងគោរពវិន័យរបស់ សាលាហើយចៀសវាងអោយផុតពីការប្រព្រឹត្តអំពើខុសច្បាប់ ផ្សេងៗ ដើម្បីបានក្លាយជាទំពាំងស្នងឬស្សី និងមានអនាគតល្អគ្រប់ៗគ្នា ។ក្រៅពីការផ្តល់នូវដំបូន្មានល្អៗដល់សិស្សានុសិស្ស លោកស្រី វ៉ាយ សាវី ក៏បានអំពាវនាវដល់មាតា បិតា និង អាណាព្យាបាលសិស្សអោយចូលរួមចំណែកឧបត្ថម្ភគាំទ្រដល់វីរ:កងទ័ពយើងនៅសមរភូមិមុខ ដែលកំពុងឈរជើងការពារទឹកដីយ៉ាងអង់អាចក្លាហានតតាំងជាមួយខ្មាំងសត្រូវ តាមទឹកចិត្តសប្បុរសរៀងៗខ្លូនផងដែរ ៕ ដោយ: សុផល