វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1402 នាក់
ម្សិលមិញ 5304 នាក់
សរុប 14140928 នាក់
ភ្នំពេញ៖ គិតត្រឹមល្ងាចម៉ោង៥ ថ្ងៃទី០៩ ខែវិច្ឆិកា ឆ្នាំ២០២០នេះ ក្រសួងសុខភិបាលបានរកឃើញ អ្នកឆ្លងកូវីដ១៩ ចំនួន ០៣នាក់ទៀតដែលជាអ្នកដែលបានប៉ះពាល់ជាមួយគណៈប្រតិភូហុងគ្រី កាលពីថ្ងៃទី០៣ ខែវិច្ឆិកា។
សេចក្ដីប្រកាសរបស់ក្រសួងសុខាភិបាលបានឲ្យដឹងថា អ្នកឆ្លងមាន៖- លោក សួស យ៉ារ៉ា អាយុ៤៧ឆ្នាំ ជាសមាជិករដ្ឋសភា មានអាសយដ្ឋាននៅខណ្ឌទួលគោក រាជធានីភ្នំពេញ។ - លោក ស ចិត្រា អាយុ៤៧ឆ្នាំ ជាអគ្គលេខាធិការរងក្រសួងកសិកម្ម រុក្ខាប្រមាញ់ និងនេសាទ មានអាសយដ្ឋាននៅសង្កាត់ទួលទំពូង១ ខណ្ឌចំការមន រាជធានីភ្នំពេញ- លោកឯកអគ្គរដ្ឋទូតហុងគ្រី អាយុ ៦៨ឆ្នាំ ស្នាក់នៅសណ្ឋាគារមួយក្នុងរាជធានីភ្នំពេញ។
សរុប អ្នកឆ្លងកូវីដ១៩ ពីព្រឹត្តិការណ៍ថ្ងៃទី០៣វិច្ឆិកានោះ បានកើនដល់ ០៤នាក់ រាប់បញ្ចូលទាំងអង្គរក្សជនជាតិខ្មែរ ដែលបានរកឃើញកាលពីម្សិលមិញ។សូមបញ្ជាក់ថាអ្នកដែលវិជ្ជមានវិរុសកូវិត១៩ដោយសាប៉ះពាល់រដ្ឋមន្ត្រីការបរទេសហុងគ្រីគឺជាអង្គរក្ស័ការពារផ្ទាល់ជនជាតិខ្មែរម្នាក់ផ្ទះនៅអូរបែក្អមរាជធានីភ្នំពេញ។
ដោយឡេកនៅស្រុកបារាំងឯនោះវិញអ្នកការទូតកម្ពុជា ២នាក់ និងបុគ្គលិកក្នុងស្រុកចំនួន ២នាក់របស់ស្ថានឯកអគ្គរាជទូតកម្ពុជាប្រចាំប្រទេសបារាំង មានជំងឺកូវីដ-១៩។ សេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី៩ ខែវិច្ឆិកានេះបានឲ្យដឹងថា៖ អ្នកទាំង៤កំពុងសម្រាកព្យាបាលនៅផ្ទះរៀងៗខ្លួន ហើយក្រៅពីនេះស្ថានទូតដែលស្ថិតនៅក្រុងប៉ារីស កំពុងរង់ចាំលទ្ធផលតេស្តបុគ្គលិកក្នុងស្រុកម្នាក់ទៀត។
ស្ថានទូតខ្មែរអះអាងថា ស្ថាប័ននៅតែបន្តការងារជាប្រក្រតីតាមប្រព័ន្ធព័ត៌មានវិទ្យា។
ទាក់ទងរឿងនេះតាមរយៈ ទំព័រ Facebook ផ្លូវការ សម្ដេចតេជោ ហ៊ុន សែន បានបញ្ជាក់ថា "ដើម្បីកម្រិតកុំឲ្យមនុស្សកើនឡើង តម្រូវឲ្យអ្នកដែលបាន និងកំពុងធ្វើចត្តាឡីស័ក កុំចេញទៅជួបជាមួយមនុស្សផ្សេងទៀត។ ប្រសិនជួបជាមួយអ្នកណា ត្រូវយកអ្នកនោះមកធ្វើតេស្ត និងធ្វើចត្តាឡីស័កថែមទៀត ដែលនឹងធ្វើឲ្យកាន់តែលំបាក ប្រើពេលកាន់តែយូរ ហើយមនុស្សកាន់តែច្រើន។
ដើម្បីបញ្ជៀសករណីដូចដែលលើកឡើងខាងលើ ខ្ញុំសុំចេញបទបញ្ជាឲ្យក្រសួងសុខាភិបាល អាជ្ញាធររាជធានីភ្នំពេញ និងខេត្តកណ្តាល ពិនិត្យតាមដាន គ្រប់មនុស្ស ដែលបាននិងកំពុងធ្វើចត្តាឡីស័ក ប្រសិនពួកគាត់អនុវត្ត មិនបានត្រឹមត្រូវក្នុងការធ្វើចត្តាឡីស័កតាមផ្ទះទេ សូមអញ្ជើញពួកគាត់ទៅធ្វើចត្តាឡីស័ក តាមទីកន្លែងដែលរៀបចំដោយ ក្រសួងសុខាភិបាល ដោយមានការយាមកាមពីកម្លាំងនគរបាល ឬកងរាជអាវុធហត្ថឲ្យបានហ្មត់ចត់"។
សូមជម្រាបថា លទ្ធផលធ្វើតេស្ដលើកទី២ រកមេរោគកូវីដ-១៩ នៅថ្ងៃទី០៩ ខែវិច្ឆិកា ឆ្នាំ២០២០នេះ សម្ដេច និងសម្ដេចកិត្តិព្រឹទ្ធបណ្ឌិត ព្រមទាំងអ្នកនៅជាមួយសម្ដេចទាំងអស់ លទ្ធផលអវិជ្ជមានជំងឺកូវីដ-១៩។
សម្ដេចតេជោ ហ៊ុន សែន ក៏កំពុងរង់ចាំលទ្ធផល នៃការធ្វើតេស្តមនុស្សជិត៩០០នាក់ផ្សេងទៀត ដែលបានប៉ះពាល់ដោយផ្ទាល់ ឬដោយប្រយោល ក្នុងដំណើរទស្សនកិច្ចរបស់រដ្ឋមន្ដ្រីការបរទេស និងពាណិជ្ជកម្មហុងគ្រី។ សម្ដេច បានហៅព្រឹត្តិការណ៍នេះថា ជាព្រឹត្តិការណ៍ ៣វិច្ឆិកា។
សម្ដេចបានអះអាងថា ព្រឹត្តិការណ៍ ៣វិច្ឆិកា នឹងត្រូវបិទបញ្ចប់នៅក្រោយពេលដែលមនុស្សប្រមាណ៩០០នាក់ ដឹងថា វិជ្ជមាន ឬអវិជ្ជមាន ដែលត្រូវការពេលប្រមាណ៣សប្តាហ៍ទៀត៕